مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے ایک عیسائی گنجے ( شاید مالدار شخص مراد ہے ) کے پاس بھیجا تاکہ وہ نبی اکرم صلی اللہ علیہ وسلم کو کچھ کپڑے دیدے کہ جب گنجائش ہو گی ( تو اسے رقم دے دی جائے گی ) میں اس شخص کے پاس آیا میں نے کہا: اللہ کے رسول نے مجھے تمہاری طرف بھیجا ہے تاکہ تم انہیں کچھ کپڑے دے دو ، گنجائش میسر ہونے پر ( ان کی قیمت ادا کر دی جائے گی ) تو اس نے کہا: گنجائش کیا ہے ؟ اور گنجائش کب آئے گی ؟ اللہ کی قسم ! سیدنا محمد صلی اللہ علیہ وسلم کا نہ تو کوئی جانور ہے اور نہ ہی کوئی زمین ہے ، میں واپس آیا ، میں نبی اکرم صلی اللہ علیہ وسلم کی خدمت میں حاضر ہوا جب آپ نے مجھے ملاحظہ کیا ، تو ارشاد فرمایا : اللہ کے دشمن نے غلط کہا: ہے میں سب سے بہتر خرید و فروخت کرنے والا ہوں ، تم میں سے کوئی ایک شخص چیتھڑوں سے بنا ہوا لباس پہن لے ، یہ اُس کے لئے اس سے زیادہ بہتر ہے کہ وہ امانت کو حاصل کر لے ( یہاں ایک لفظ کے بارے میں راوی کو شک ہے ) ایسی چیز ، جو اُس کی نہ ہو ۔
یہ روایت امام أحمد نے نقل کی ہے ۔

سیدنا انس رضی اللہ عنہ کے حوالے سے امام طبرانی نے معجم اوسط اور امام بزار نے امام طبرانی کی روایت کی مانند روایت نقل کی ہے ، راوی بیان کرتے ہیں : نبی اکرم صلی اللہ علیہ وسلم نے مجھے یہودیوں کے پاس بھیجا ، تاکہ میں گنجائش میسر ہونے تک ان سے ادھار کے طور پر کوئی چیز لے لوں ، تو ایک شخص نے کہا: انہیں کہاں سے گنجائش ملے گی ؟ وہ تو ایسے فرد ہیں جن کی نہ تو کوئی اصل ہے اور نہ ہی کوئی فرع ہے میں واپس نبی اکرم صلی اللہ علیہ وسلم کے پاس آیا اور آپ کو اس بارے میں بتایا تو آپ نے ارشاد فرمایا : ” اللہ کے دشمن نے جھوٹ کہا: ہے ، اگر وہ ہمیں دے دیتا تو ہم نے ( اس کی رقم ) ادا کر دینی تھی “ ۔ اس روایت کی سند میں ایک راوی ایسا ہے ، جس کا نام جابر بن یزید بیان کیا گیا ہے وہ کہتے ہیں : یہ جعفی نہیں ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم کے ہاں ایک مہمان آیا نبی اکرم صلی اللہ علیہ وسلم کے پاس اس وقت کوئی ایسی چیز موجود نہیں تھی ، جو اس کے لئے سہولت کا باعث ہو سکے تو نبی اکرم صلی اللہ علیہ وسلم نے یہودیوں سے تعلق رکھنے والے ایک شخص کی طرف پیغام بھیجا کہ اللہ کے رسول سیدنا محمد صلی اللہ علیہ وسلم تمہیں یہ کہہ رہے ہیں تم ہمیں رجب کے پہلی کے چاند پر ادائیگی کرنے کی شرط پر کچھ آٹا ادھار دے دو ، اس نے کہا: جی نہیں ! صرف رہن کے طور پر دیا جا سکتا ہے ، راوی کہتے ہیں : میں نبی اکرم صلی اللہ علیہ وسلم کی خدمت میں حاضر ہوا اور آپ کو اس بارے میں بتایا تو آپ نے ارشاد فرمایا : ” اللہ کی قسم ! میں آسمان کے بارے میں بھی امین ہوں اور زمین کے بارے میں بھی امین ہوں ، اگر وہ مجھے ادھار دے دیتا تو میں نے اسے ادائیگی کر ہی دینی تھی “ ۔ راوی کہتے ہیں : جب میں آپ کے پاس سے نکلا ، تو یہ آیت نازل ہو گئی : ” اور تم اپنی نگاہیں اُن چیزوں کی طرف نہ لے جاؤ ، جو ہم نے ان میں سے بعض لوگوں کو ( دنیاوی ) ساز و سامان میں سے دی ہیں ۔ ۔ ۔ ۔ ۔ ۔ ۔ ۔ ۔ “ یہ آیت کے آخر تک ہے ۔ اس میں نبی اکرم صلی اللہ علیہ وسلم کو دنیا سے الگ رہنے کی ترغیب دی گئی ہے ۔
یہ روایت امام طبرانی نے معجم کبیر میں اور امام بزار نے نقل کی ہے اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔