مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم تاجروں کے ایک گروہ کے پاس تشریف لائے اور فرمایا : اے تاجروں کے گروہ ! ان لوگوں نے آپ کی بات کا جواب دیا اور گردنیں آپ کی طرف موڑ لیں تو آپ نے ارشاد فرمایا : ” قیامت کے دن اللہ تعالیٰ تمہیں فاجروں کی شکل میں اٹھائے گا البتہ اس شخص کا معاملہ مختلف ہے ، جو سچ بولتا ہے نیکی کرتا ہے اور امانت ادا کرتا ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی حارث بن عبیدہ ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تجارت میں کوئی بھلائی نہیں ہے البتہ اس شخص کا معاملہ مختلف ہے ، جو سودے کی ( غیر ضروری ) تعریف نہیں کرتا اور وہ جو چیز خریدتا ہے اس کی مذمت نہیں کرتا ہے اور وہ حلال کماتا ہے اور حلال ہی دیتا ہے اور اس بارے میں قسم اٹھانے سے الگ رہتا ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عمر بن راشد ہے ، جسے عجلی نے ثقہ قرار دیا ہے اور جمہور نے اسے ضعیف کہا: ہے ۔

سیدنا واثلہ بن اسقع رضی اللہ عنہ بیان کرتے ہیں : نبی اکرم صلی اللہ علیہ وسلم ہماری طرف تشریف لائے ہم اس وقت تجارت کر رہے تھے آپ نے فرمایا : اے تاجروں کے گروہ ! تم جھوٹ بولنے سے بچ کے رہنا “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن اسحاق غنوی ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔

سیدنا عبدالرحمن بن شبل انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک تاجر ہی گناہگار ہوں گے بے شک تاجر ہی گناہگار ہوں گے ایک صاحب نے عرض کی : یا رسول اللہ ! کیا اللہ تعالیٰ نے اس خرید و فروخت کو حلال قرار نہیں دیا ہے ۔ نبی اکرم صلی اللہ علیہ وسلم نے ارشاد فرمایا : جی ہاں ! آپ نے فرمایا : یہ لوگ بولتے ہیں تو جھوٹ بولتے ہیں اور قسم اٹھاتے ہیں ( تو جھوٹی قسم اٹھا کر ) گناہگار ہوتے ہیں “ ۔
یہ روایت امام أحمد نے اس طرح نقل کی ہے ۔

یہ روایت امام طبرانی نے معجم کبیر میں نقل کی ہے وہ بیان کرتے ہیں : سیدنا عبدالرحمن بن شبل رضی اللہ عنہ سے یہ روایت منقول ہے ۔ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” تم قرآن پڑھو اور اس میں غلو نہ کرو اور اس سے جفا نہ کرو اور اس کا معاوضہ نہ کھاؤ اور اس کے ذریعے ( مال کی ) کثرت کے طلبگار نہ بنو “ ۔ میں نے نبی اکرم صلی اللہ علیہ وسلم کو یہ بھی ارشاد فرماتے ہوئے سنا ہے : ” بے شک تاجر لوگ ہی گناہگار ہوں گے لوگوں نے عرض کی : یا رسول اللہ ! کیا اللہ تعالی نے خرید و فروخت کو حلال قرار نہیں دیا ہے ؟ نبی اکرم صلی اللہ علیہ وسلم نے فرمایا : جی ہاں ! لیکن یہ بات بھی ہے ) جب یہ لوگ بات کرتے ہیں جھوٹ بولتے ہیں اور قسم اٹھاتے ہیں تو گناہگار ہوتے ہیں“ ۔ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک فاسق لوگ ہی جہنمی ہیں لوگوں نے عرض کی : یا رسول اللہ ! فاسق لوگ کون ہیں ؟ نبی اکرم صلی اللہ علیہ وسلم نے ارشاد فرمایا : خواتین ایک شخص نے عرض کی : یا رسول اللہ ! کیا یہ خواتین ہماری مائیں ہماری بہنیں اور ہماری بیویاں نہیں ہیں ؟ نبی اکرم صلی اللہ علیہ وسلم نے ارشاد فرمایا : جی ہاں ! لیکن جب انہیں کوئی چیز دی جائے تو یہ شکر گزار نہیں ہوتی ہیں اور جب انہیں آزمائش میں مبتلا کیا جائے تو یہ صبر نہیں کرتی ہیں “ ۔ ان تمام روایات کے رجال ثقہ ہیں ” ادب“ سے متعلق باب میں یہ ایک اور سند کے ساتھ منقول ہے ، جو اس سے زیادہ طویل روایت ہے ۔