مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” چھوٹا دنبہ بڑے بکرے سے زیادہ بہتر ہوتا ہے “ ۔ داؤد نامی راوی کہتے ہیں : سید سے مراد جلیل ( یعنی بڑا یا صحت مند ) ہوتا ہے ۔
یہ روایت امام أحمد نے نقل کی ہے اس کی سند میں ایک راوی ابوثفال ہے امام بخاری رحمہ اللہ کہتے ہیں : اس میں غور و فکر کی گنجائش ہے ۔

سیدنا ابوہریرہ رضی اللہ عنہ بیان کرتے ہیں : سیدنا جبرائیل علیہ السلام قربانی کے دن نبی اکرم صلی اللہ علیہ وسلم کی خدمت میں حاضر ہوئے نبی اکرم صلی اللہ علیہ وسلم نے فرمایا : ہماری اس قربانی کے بارے میں تم کیا سمجھتے ہو ؟ انہوں نے بتایا آسمان والے اس کے حوالے سے فخر کا اظہار کرتے ہیں اے سیدنا محمد ( صلی اللہ علیہ وسلم ) آپ یہ بات جان لیں کہ چھوٹا دنبہ بڑے بکرے سے زیادہ بہتر ہوتا ہے : اے سیدنا محمد ( صلی اللہ علیہ وسلم ) آپ یہ بات جان لیں چھوٹا دنبہ بڑی گائے اور بیل سے زیادہ بہتر ہوتا ہے اور اگر اللہ تعالیٰ کو یہ پتہ ہوتا کہ اس سے زیادہ فضیلت والا بھی کوئی جانور ہے ، تو سیدنا ابراہیم علیہ السلام کو فدیے میں وہ دوسرا جانور دے دیا جاتا ۔
یہ روایت امام بزار نے نقل کی ہے اس کی سند میں ایک راوی اسحاق حنینی ہے اور وہ ضعیف ہے ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں یہ حکم دیا تھا کہ ( ہم قربانی کے جانور ) کی آنکھ اور کان کا بغور جائزہ لے لیں ۔
یہ روایت امام بزار نے نقل کی ہے اور امام طبرانی نے معجم اوسط میں نقل کی ہے اس کی سند میں ایک راوی محمد بن کثیر قرشی ملائی ہے ، جسے یحیی بن معین نے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہم مقابلہ اور مدابرہ کو ( یعنی وہ جانور جس کے کان کے پچھلے حصے میں سے معمولی سا کاٹ کر اس کو لٹکنے کے لیے چھوڑ دیں ) اور جس کا کان چیر دیا گیا ہو ، اور جس کے آنکھ یا کان میں گول سوراخ کیا گیا ہو ، اسے ذبح نہیں کرتے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبدالغفار بن قاسم ہے اور وہ متروک ہے ۔

سیدنا ابومسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قربانی کے جانور میں کانے یا بالکل لاغر یا خارش زدہ یا جس کے تھن مکمل طور پر کاٹ دیے گئے ہوں اس کی قربانی جائز نہیں ہے “ ۔
یہ روایت امام طبرانی نے معجم اوسط میں نقل کی ہے اطباء سے مراد تھن ہیں یعنی وہ جانور جس کے تھن کاٹ دیے گئے ہوں ۔ اس کی سند میں ایک راوی علی بن عاصم بن صہیب ہے ، جس میں ضعف پایا جاتا ہے ویسے اس کی توثیق کی گئی ہے ۔

سیدنا عبداللہ بن زید رضی اللہ عنہ بیان کرتے ہیں : قربانی کی جگہ پر وہ نبی اکرم صلی اللہ علیہ وسلم کے پاس موجود تھے وہ تھے اور ساتھ میں انصار سے تعلق رکھنے والا ایک شخص تھا ۔ نبی اکرم صلی اللہ علیہ وسلم نے قربانی کے جانور تقسیم کیے تو ان صاحب کو اور ان کے ساتھی کو کچھ نہیں ملا پھر نبی اکرم صلی اللہ علیہ وسلم نے اپنے کپڑے میں سر کے بال مونڈوا کر رکھوا دیے پھر وہ دیدیے اور آپ نے وہ کچھ لوگوں میں تقسیم کروا دیے پھر نبی اکرم صلی اللہ علیہ وسلم نے اپنے ناخن تراشے تو ان کے ساتھی کو بھی اپنے بال دیے راوی کہتے ہیں : وہ بال ہمارے پاس موجود تھے ان پر مہندی اور کتم ( نام کی بوٹی ) کا خضاب لگا ہوا تھا ۔

ایک روایت میں یہ الفاظ ہیں : ” قربانی کے دن وہ نبی اکرم صلی اللہ علیہ وسلم کے پاس موجود تھے ، وہ تھے اور قریش سے تعلق رکھنے والے ایک اور صحابی تھے نبی اکرم صلی اللہ علیہ وسلم نے قربانی کے جانور تقسیم کیے تو ان صاحب کو کچھ نہیں ملا اور ان کے ساتھی کو بھی کچھ نہیں ملا پھر نبی اکرم صلی اللہ علیہ وسلم نے اپنا سر مونڈوا کر بال کپڑے میں رکھوائے اور وہ انہیں دیے تو وہ کچھ لوگوں میں تقسیم کر دیے گئے “ ۔ ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد حسب سابق حدیث ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیده ام بلال رضی اللہ عنہ نبی اکرم صلی اللہ علیہ وسلم کا یہ فرمان نقل کرتی ہیں : ” دنبے ( یا بھیڑ ) کے بچے کو قربان کر لو ! کیونکہ یہ جائز ہے “ ۔
یہ روایت امام أحمد نے نقل کی ہے اور امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے کچھ بکریاں سیدنا سعد بن ابی وقاص رضی اللہ عنہ کی طرف بھیجیں تاکہ وہ انہیں نبی اکرم صلی اللہ علیہ وسلم کے اصحاب کے درمیان تقسیم کر دیں لوگ وہ چیز حاصل کرتے رہے یہاں تک کہ ان میں سے ایک بکرا بچ گیا تو سیدنا سعد بن ابی وقاص رضی اللہ عنہ نے اپنے حج تمتع کے موقع پر خود اس کی قربانی کی ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا سعد بن ابی وقاص رضی اللہ عنہ کو بکری کا بچہ دیا تھا اور انہیں یہ حکم دیا تھا کہ وہ اس کی قربانی کر لیں ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی ابن لہیعہ ہے ، جس میں ضعف پایا جاتا ہے ، لیکن اس کے باوجود وہ حسن الحدیث ہے ۔

محمد بن سیرین بیان کرتے ہیں : سیدنا عمران بن حصین رضی اللہ عنہ نے فرمایا : میں بچے جانور کی قربانی کر لوں یہ میرے نزدیک اس سے زیادہ پسندیدہ ہو گا کہ میں بوڑھے جانور کی قربانی کروں ، کیونکہ ( بچہ جانور ، قربانی ) کا زیادہ حق دار ہوتا ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ بیٹھے ہوئے تھے ایک شخص آپ کے پاس آیا وہ ایک موٹا تازہ بکرے کا بچہ لے کر آیا اور ایک دنبے کا بچہ لے کر آیا جو کمزور اور ہلکا پھلکا سا تھا ، اس نے عرض کی : یا رسول اللہ ! یہ چھوٹا دنبہ ہے ، جو کمزور اور ہلکا پھلکا ہے اور یہ چھوٹا بکرا ہے ، جو موٹا تازہ ہے اور صحت مند ہے اور یہ ان دونوں میں زیادہ بہتر ہے ، تو کیا میں اس کی قربانی کر دوں ؟ نبی اکرم صلی اللہ علیہ وسلم نے فرمایا : تم اس کی قربانی کر دو ! کیونکہ اللہ تعالی کے لئے بہتر چیز ہونی چاہیے ۔
یہ روایت امام ابویعلیٰ نے حنش عبدی کی روایت کے طور پر نقل کی ہے میں نے کسی کو ان کے حالات بیان کرتے ہوئے نہیں پایا ہے ۔