مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں نبی اکرم صلی اللہ علیہ وسلم نے ایک شخص کو سنا جو ثبرمہ کی طرف سے تلبیہ پڑھ رہا تھا نبی اکرم صلی اللہ علیہ وسلم نے دریافت کیا : شبرمہ کون ہے ؟ راوی بیان کرتے ہیں : ان لوگوں نے اس کے ساتھ رشتہ داری کا ذکر کیا ، تو نبی اکرم صلی اللہ علیہ وسلم نے دریافت کیا : کیا تم نے اپنی طرف سے حج کر لیا ہے ؟ اس نے جواب دیا : جی نہیں ! نبی اکرم صلی اللہ علیہ وسلم نے فرمایا : پھر تم اپنی طرف سے حج کرو پھر شبرمہ کی طرف سے حج کرنا ۔
یہ روایت امام ابویعلیٰ نے نقل کی ہے اس کی سند میں ایک راوی ابن ابولیلی ہے اور اس کے بارے میں کلام کیا گیا ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو یہ کہتے ہوئے سنا : میں شبرمہ کی طرف سے حاضر ہوں ۔ نبی اکرم صلی اللہ علیہ وسلم نے دریافت کیا : کیا تم نے اپنی طرف سے حج کر لیا ہوا ہے ؟ اس نے عرض کی : جی نہیں ! نبی اکرم صلی اللہ علیہ وسلم نے فرمایا : تم اپنی طرف سے حج کرو پھر شبرمہ کی طرف سے حج کرنا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی ثمامہ بن عبیدہ ہے اور وہ ضعیف ہے ۔