مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے قربانی کے دن انہیں اپنے اہل خانہ کے ہمراہ منی کی طرف بھیج دیا تھا تاکہ وہ صبح صادق کے ساتھ ہی جمرات کو کنکریاں مار لیں ۔
یہ روایت امام أحمد نے نقل کی ہے اس کی سند میں ایک راوی شعبہ ہے ، جو سیدنا عبداللہ بن عباس رضی اللہ عنہما کا غلام ہے امام أحمد اور دیگر حضرات نے اسے ثقہ قرار دیا ہے اور اس کے بارے میں کلام کیا گیا ہے ۔

سیدنا جابر رضی اللہ عنہ بیان کرتے ہیں : مجھے نہیں معلوم کہ نبی اکرم صلی اللہ علیہ وسلم نے اسے کتنی کنکریاں ماری تھیں ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا حرملہ بن عمرو رضی اللہ عنہ جو ابوعبدالرحمن ہیں وہ بیان کرتے ہیں : حجتہ الوداع کے موقع پر میں اپنے چچا سیدنا سنان بن سنہ رضی اللہ عنہ کے پیچھے سواری پر موجود تھا جب ہم نے عرفات میں وقوف کیا ہوا تھا تو میں نے نبی اکرم صلی اللہ علیہ وسلم کو دیکھا کہ آپ نے اپنی ایک انگلی دوسری پر رکھی ہوئی تھی میں نے اپنے چچا سے دریافت کیا : نبی اکرم صلی اللہ علیہ وسلم کیا ارشاد فرما رہے ہیں ؟ انہوں نے بتایا آپ فرما رہے ہیں : تم چٹکی میں آنے والی کنکریاں مارنا ۔
یہ روایت امام أحمد نے امام بزار نے اور امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا حمزہ بن عمرو اسلمی رضی اللہ عنہ بیان کرتے ہیں : میں نے عرفہ میں نبی اکرم صلی اللہ علیہ وسلم کو دیکھا میرے چچا نے مجھے پیچھے بٹھایا ہوا تھا نبی اکرم صلی اللہ علیہ وسلم نے اپنی ایک انگلی دوسری پر رکھی ہوئی تھی میں نے دریافت کیا : نبی اکرم صلی اللہ علیہ وسلم کیا ارشاد فرما رہے ہیں ؟ انہوں نے بتایا : نبی اکرم صلی اللہ علیہ وسلم یہ فرما رہے ہیں کہ جمرات کو ایسی کنکریاں مارو جو چٹکی میں آ جاتی ہوں ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں وہ فرماتے ہیں : اس سند کے ساتھ اس روایت کو صرف ایوب نے یعنی غافقی نے نقل کیا ہے لوگوں نے اسے ابن حرملہ کے حوالے سے یحیی بن ہند کے حوالے سے اسلم بن خارجہ سے نقل کیا ہے ۔

سیدنا ہرماس بن زیاد رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا میں اپنے والد کے پیچھے سواری پر موجود تھا قربانی کے دن آپ اپنی اونٹنی عضباء پر موجود تھے لوگ آپ کے ارد گرد موجود تھے میں نے اپنے والد سے دریافت کیا : نبی اکرم صلی اللہ علیہ وسلم کیا ارشاد فرما رہے ہیں : میرے والد نے بتایا آپ یہ فرما رہے ہیں تم چٹکی میں آنے والی کنکریاں مارنا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدہ اسماء بنت ابوبکر رضی اللہ عنہا بیان کرتی ہیں نبی اکرم صلی اللہ علیہ وسلم نے ارشاد فرمایا : ” مضر کے جمرات کو کنکریاں مارنا “ ( راوی بیان کرتے ہیں : ) پہلے ہر قبیلہ مخصوص جمرہ کو کنکریاں مارا کرتا تھا ۔
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں جن سے میں واقف نہیں ہوں ۔

سیدنا عبدالرحمن بن عثمان تیمی رضی اللہ عنہ بیان کرتے ہیں : اللہ کے رسول نے ہمیں یہ حکم دیا کہ ہم جمرات کو ایسی کنکریاں ماریں جو چٹکی میں آ جاتی ہوں یہ حجتہ الوداع کے موقع کی بات ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ نے دوسرے جمرہ کے قریب پہلے جمرہ سے زیادہ طویل وقوف کیا تھا پھر آپ جمرہ عقبہ کے پاس آئے آپ نے اسے کنکریاں ماریں لیکن آپ اس کے پاس ٹھہرے نہیں ۔
یہ روایت امام أحمد نے نقل کی ہے اس کی سند میں ایک راوی حجاج بن ارطاۃ ہے اور اس کے بارے میں کلام کیا گیا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم اس وقت تک کنکریاں نہیں مارتے تھے جب تک سورج ڈھل نہیں جاتا تھا ۔
یہ روایت امام بزار نے نقل کی ہے اس کی سند میں ایک راوی حجاج بن ارطاۃ ہے اور اس کے بارے میں کلام کیا گیا ہے ۔

ابوطفیل بیان کرتے ہیں : میں نے سیدنا عبداللہ بن عباس رضی اللہ عنہما سے کہا: آپ کی قوم کا یہ کہنا ہے کہ نبی اکرم صلی اللہ علیہ وسلم نے صفا اور مروہ کے درمیان سعی کی تھی اور یہ چیز سنت ہے انہوں نے بتایا کہ ان لوگوں نے سچ کہا: ہے سیدنا ابراہیم علیہ السلام کو جب مناسک ادا کرنے کا حکم دیا گیا تو شیطان سعی کے ایک مقام پر ان کے سامنے آیا اس نے سیدنا ابراہیم علیہ السلام کے ساتھ دوڑ لگائی تو سیدنا ابراہیم علیہ السلام اس سے آگے نکل گئے پھر سیدنا جبرائیل عالی ہم انہیں ساتھ لے کر جمرہ عقبہ کی طرف گئے تو شیطان ان کے سامنے آیا تو انہوں نے اسے سات کنکریاں ماریں یہاں تک کہ وہ چلا گیا پھر وہ درمیانی جمرہ کے پاس ان کے سامنے آیا تو انہوں نے اسے سات کنکریاں ماریں وہیں سیدنا ابراہیم علیہ السلام نے سیدنا اسماعیل علیہ السلام کو لٹا دیا سیدنا اسماعیل علیہ السلام کے جسم پر ایک سفید قمیص تھی ۔ انہوں نے کہا: اے ابا جان ! میرے پاس اور کوئی ایسا کپڑا نہیں ہے ، جس میں آپ مجھے کفن دیں تو آپ اسے اتار دیں اور اس میں مجھے کفن دے دیجئے گا جب سیدنا ابراہیم علیہ السلام اسے اتارنے لگے تو ان کے پیچھے سے پکار کر کہا: گیا : اے ابراہیم ! تم نے خواب کو سچ کر دیا ہے سیدنا ابراہیم علیہ السلام نے مڑ کر دیکھا تو وہاں ایک سینگوں والا سفید رنگ کا سیاہ آنکھوں والا دنبہ موجود تھا سیدنا عبداللہ بن عباس رضی اللہ عنہما بیان کرتے ہیں : مجھے اپنے بارے میں یہ بات یاد ہے کہ ہم اس قسم کے دنبے تلاش کیا کرتے تھے راوی بیان کرتے ہیں : پھر سیدنا جبرائیل علیہ السلام انہیں لے کر جمرہ قصوی کی طرف گئے شیطان ان کے سامنے آیا انہوں نے اسے سات کنکریاں ماریں یہاں تک کہ وہ چلا گیا پھر سیدنا جبرائیل انہیں لے کر منی کی طرف گئے اور بولے : یہ منی ہے یونس بیان کرتے ہیں : یعنی لوگوں کے ٹھہرنے کی جگہ ہے پھر وہ انہیں لے کر مزدلفہ آئے اور بولے : یہ مشعر حرام ہے پھر وہ انہیں لے کر عرفہ گئے سیدنا عبداللہ بن عباس رضی اللہ عنہما نے فرمایا کیا تم یہ بات جانتے ہو عرفہ کا یہ نام کیوں رکھا گیا ہے ؟ میں نے جواب دیا : جی نہیں ! انہوں نے فرمایا : سیدنا جبرائیل علیہ السلام نے سیدنا ابراہیم علیہ السلام سے دریافت کیا : کیا تم نے پہچان لیا ہے ( یہاں ایک لفظ یونس نامی راوی نے مختلف نقل کیا ہے ) سیدنا ابراہیم علیہ السلام نے جواب دیا : جی ہاں ! سیدنا عبداللہ بن عباس رضی اللہ عنہما فرماتے ہیں : اسی وجہ سے اس جگہ کا نام عرفہ رکھا گیا ہے پھر انہوں نے فرمایا : کیا آپ جانتے ہیں تلبیہ کیسے ہوتا ہے میں نے جواب دیا وہ کیسا ہوتا تھا ؟ انہوں نے بتایا جب سیدنا ابراہیم علیہ السلام کو یہ حکم دیا گیا کہ وہ لوگوں کے درمیان حج کا اعلان کریں تو تمام پہاڑ ان کے سامنے پست ہو گئے اور وادیاں کے سامنے بلند کر دی گئیں تو ان کے درمیان انہوں نے حج کا اعلان کیا ۔
یہ روایت امام أحمد نے اور امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” سیدنا جبرائیل سیدنا ابراہیم علیہ السلام کو ساتھ لے کر جمرہ عقبہ کی طرف گئے شیطان ان کے سامنے آیا تو سیدنا ابراہیم علیہ السلام نے اسے سات کنکریاں ماریں تو وہ ( زمین میں دھنس گیا ) پھر وہ درمیانی جمرہ کے پاس آئے تو شیطان ان کے سامنے آیا انہوں نے اسے سات کنکریاں ماریں تو وہ دھنس گیا پھر وہ جمرہ قصوی کے پاس آئے تو انہوں نے اسے سات کنکریاں ماریں تو وہ دھنس گیا سیدنا ابراہیم علیہ السلام نے اپنے صاحبزادے سیدنا اسحاق علیہ السلام کو ذبح کرنے کا ارادہ کیا ، تو ( یہاں متن میں یہی مذکور ہے لیکن درست یہ ہے کہ سیدنا اسماعیل علیہ السلام کو ذبح کرنے کا ارادہ کیا ) تو انہوں نے اپنے والد سے کہا: اے میرے ابا جان جب آپ مجھے ذبح کرنے لگیں گے تو آپ مجھے باندھ دیجئے گا کیونکہ اگر میں تڑپ تو میرے خون کے چھینٹے آپ پر پڑیں گے سیدنا ابراہیم علیہ السلام نے انہیں باندھ دیا جب انہوں نے چھری تیز کی اور انہیں ذبح کرنے کا ارادہ کیا ، تو پیچھے سے انہیں یہ کہا: گیا : اے ابراہیم ! تم نے خواب کو سچا کر دیا “ ۔
یہ روایت امام أحمد نے نقل کی ہے اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا عبداللہ بن عباس رضی اللہ عنہما بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کے پاس آئے تاکہ آپ کو مناسک دکھائیں ثبیر آپ کے سامنے آیا نبی اکرم صلی اللہ علیہ وسلم منی میں داخل ہو گئے ۔ انہوں نے نبی اکرم صلی اللہ علیہ وسلم کو جمرات دکھائے پھر آپ کو مزدلفہ دکھایا پھر آپ کو عرفات دکھایا جب آپ جمرہ کے پاس تھے تو شیطان ان کے سامنے آیا آپ نے اسے سات کنکریاں ماریں تو وہ دھنس گیا پھر وہ آپ کے سامنے آیا یہاں تک کہ انہوں نے جمرہ عقبہ کا بھی ذکر کیا کہ وہ وہاں بھی وہ دھنس گیا اور پھر چلا گیا ۔

سیدنا عبداللہ بن عباس رضی اللہ عنہما کے حوالے سے منقول ایک روایت میں یہ الفاظ ہیں : سیدنا جبرائیل نبی اکرم صلی اللہ علیہ وسلم کو ساتھ لے کر گئے تاکہ انہیں مناسک دکھائیں وہ انہیں لے کر جمرہ عقبہ کے پاس آئے تو وہاں ابلیس موجود تھا سیدنا جبرائیل علیہ السلام نے ان سے کہا: تو انہوں نے اسے سات کنکریاں ماریں تو وہ زمین میں دھنس گیا پھر وہ جمرہ وسطی کے پاس آئے تو وہاں بھی ابلیس موجود تھا سیدنا جبرائیل علیہ السلام نے انہیں کہا: تو انہوں نے سات کنکریاں ماریں تو وہ زمین میں دھنس گیا پھر وہ تیسرے جمرہ کے پاس آئے تو وہاں بھی ایسا کیا پھر وہ مزدلفہ آئے تو انہوں نے وہاں سے تلبیہ پڑھا ۔ یہ تمام روایات امام طبرانی نے معجم کبیر میں نقل کی ہیں ۔ ان کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا عبداللہ بن عمر رضی اللہ عنہما بیان کرتے ہیں : ایک شخص نے نبی اکرم صلی اللہ علیہ وسلم سے جمرات کو کنکریاں مارنے کے بارے میں دریافت کیا : ہمیں اس کا کیا ثواب ملے گا تو میں نے آپ کو یہ ارشاد فرماتے ہوئے سنا “ تم اپنے پروردگار کے پاس انہیں اس وقت پاؤ گے جب تمہیں ان کی شدید ضرورت ہو گی “ ۔
یہ روایت امام طبرانی نے معجم اوسط اور معجم کبیر میں نقل کی ہے اس کی سند میں ایک راوی حجاج بن ارطاۃ ہے اور اس کے بارے میں کلام کیا گیا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم جمرات کو کنکریاں مارو گے تو قیامت کے دن یہ چیز تمہارے لئے نور ہو گی “
یہ روایت امام بزار نے نقل کی ہے اس کی سند میں ایک راوی صالح مولی توامہ ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : ہم نے عرض کی : یا رسول اللہ ! یہ جمرات کا کیا معاملہ ہے انہیں ہر سال کنکریاں ماری جاتی ہیں تو ہم یہ گمان کرتے ہیں کہ یہ کم ہو جاتی ہیں نبی اکرم صلی اللہ علیہ وسلم نے ارشاد فرمایا : ان میں سے جو مقبول ہوتی ہیں وہ اٹھا لی جاتی ہیں اگر ایسا نہ ہوتا تو تم پہاڑوں جتنی کنکریاں دیکھتے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی یزید بن سنان تمیمی ہے اور وہ ضعیف ہے ۔