مجمع الزوائد ومنبع الفوائد

ابوزبیر بیان کرتے ہیں : میں نے سیدنا جابر رضی اللہ عنہ سے خانہ کعبہ کا طواف کرنے کے بارے میں دریافت کیا ، تو انہوں نے بتایا ہم طواف کرتے تھے اور آغاز میں اور اختتام پر رکن پر ہاتھ پھیرتے تھے ہم صبح کی نماز کے بعد سورج کے نکلنے تک اور عصر کی نماز کے بعد سورج کے غروب ہونے تک طواف نہیں کرتے تھے ۔ انہوں نے یہ بات بیان کی میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” سورج شیطان کے سینگ میں طلوع ہوتا ہے “ ۔
یہ روایت امام أحمد نے نقل کی ہے اس کی سند میں ایک راوی ابن لہیعہ ہے ، جس کے بارے میں کلام کیا گیا ہے لوگوں نے اس کی نقل کردہ حدیث کو حسن قرار دیا ہے ۔

سیدنا جابر رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ نے فرمایا : اے عبدمناف ! تم رات یا دن کی کسی بھی گھڑی میں کسی شخص کو اس گھر کا طواف کرنے اور نماز ادا کرنے سے نہ روکنا ۔
یہ روایت امام بزار نے نقل کی ہے اور اس کے رجال صحیح کے رجال ہیں امام بزار کہتے ہیں ابوموسیٰ نے
یہ روایت ہمیں اسی طرح بیان کی ہے ان کی مراد ابوموسیٰ زمن ہے ۔ انہوں نے بنوعمیر کے محلے میں اڑتالیس ہجری میں یہ بات بیان کی تھی پھر انہوں نے دوبارہ یہ حدیث بیان کی ، تو انہوں نے یہ کہا: عبدالوہاب نے ایوب کے حوالے سے ابن زبیر کے حوالے سے
یہ روایت نقل کی ہے ۔ انہوں نے اس میں یہ بات بیان نہیں کی کہ
یہ روایت سیدنا جابر رضی اللہ عنہ سے منقول ہے اور یہی درست ہے ، جو ایوب نے نقل کیا ہے اس کی وجہ یہ ہے کہ پہلی مرتبہ میں ان کی زبان سے غلطی ہو گئی تھی
یہ روایت ابوزبیر کے حوالے سے عبداللہ بن بابا کے حوالے سے سیدنا جبیر بن مطعم رضی اللہ عنہ کے حوالے سے بھی منقول ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے بنو عبدمناف ! میں تمہیں ایسی حالت میں ہرگز نہ پاؤں کہ تم نے رات کی یا دن کی کسی بھی گھڑی میں کسی شخص کو اس گھر کا طواف کرنے سے روکا ہو “ ۔
یہ روایت امام طبرانی نے معجم کبیر میں عمران بن محمد بن ابولیلی کے حوالے سے عبدالکریم کے حوالے سے مجاہد سے نقل کی ہے اگر تو یہ عبدالکریم جزری ہے ، تو پھر اس روایت کے رجال ثقہ ہیں اور اگر یہ ابن ابومخارق ہے ، تو پھر یہ حدیث ضعیف ہے ۔

عمرو بن دینار بیان کرتے ہیں : میں نے سیدنا عبداللہ بن عمر رضی اللہ عنہما کو دیکھا انہوں نے عصر کے بعد سات مرتبہ طواف کیا پھر دو رکعت ادا کر لیں پھر انہوں نے یہ بات بیان کی سورج کے طلوع ہونے کے وقت ( نماز ادا کرنے کو ) مکروہ قرار دیا گیا ہے کیونکہ نبی اکرم صلی اللہ علیہ وسلم نے یہ ارشاد فرمایا ہے : ” بے شک سورج شیطان کے دو سینگوں کے درمیان طلوع ہوتا ہے “ ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

ابوشعبہ بیان کرتے ہیں : میں نے سیدنا امام حسن رضی اللہ عنہ اور سیدنا امام حسین رضی اللہ عنہ کو عصر کے بعد طواف کرتے ہوئے اور دو رکعت ادا کرتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے ابوشعبہ نامی یہ راوی بکری ہیں جیسا کہ مزی نے ان کا ذکر کیا ہے میں نے کسی کو ان کے حالات بیان کرتے ہوئے نہیں پایا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دو طواف ایسے ہیں جنہیں کرنے والے شخص کے گناہوں کی مغفرت ہو جاتی ہے خواہ وہ گناہ کتنے ہی کیوں نہ ہوں ، صبح کی نماز کے بعد اس طرح طواف کرنا کہ آدمی سورج طلوع ہونے کے وقت اس سے فارغ ہو اور عصر کی نماز کے بعد اس طرح طواف کرنا کہ آدمی سورج غروب ہونے کے وقت اس سے فارغ ہو لوگوں نے عرض کی : یا رسول اللہ اگر اس سے پہلے ہو یا اس کے بعد ہو ؟ تو نبی اکرم صلی اللہ علیہ وسلم نے ارشاد فرمایا : وہ اس کے ساتھ لاحق ہو جائے گا “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبدالرحیم بن زیدعمی ہے اور وہ متروک ہے ۔