مجمع الزوائد ومنبع الفوائد

امام شعبی بیان کرتے ہیں : میں نے سیدنا عبداللہ بن عمر رضی اللہ عنہما سے سوال کیا : کیا ایک اونٹ اور ایک گائے سات افراد کی طرف سے کفایت کر جاتے ہیں ؟ انہوں نے فرمایا : اے شعبی ! کیا وہ سات آدمیوں کے لئے ہوں گے ؟ میں نے کہا: سیدنا محمد صلی اللہ علیہ وسلم کے اصحاب کا تو یہی کہنا ہے کہ نبی اکرم صلی اللہ علیہ وسلم نے یہ سنت مقرر کی ہے کہ ایک اونٹ سات آدمیوں کی طرف سے اور ایک گائے سات آدمیوں کی طرف سے قربان کی جائے گی تو سیدنا عبداللہ بن عمر رضی اللہ عنہما نے ایک شخص سے دریافت کیا : اے فلاں ! کیا ایسا ہی ہے ؟ اس نے جواب دیا : جی ہاں ۔ تو سیدنا عبداللہ بن عمر رضی اللہ عنہما نے فرمایا : مجھے اس کا پتہ نہیں تھا ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک اونٹ اور ایک گائے سات افراد کی طرف سے ہو گی “ ۔
یہ روایت امام طبرانی نے معجم صغیر اور معجم اوسط میں نقص کی ہے ، اور اس کی سند میں ایک راوی حفص بن جمیع ہے ، اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : حدیبیہ کے سال میں نے نبی اکرم صلی اللہ علیہ وسلم کو دیکھا آپ نے اپنے اصحاب میں سے سات افراد کو قربانی کے ایک جانور میں حصہ دار قرار دیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی معاویہ بن یحیی صدفی ہے ، اور وہ ضعیف ہے ۔