مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ سفر کرو تم صحت مند رہو گے اور سلامت رہو گے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن ہارون ابوعلقمہ فروی ہے ، اور وہ ضعیف ہے ۔ اس سے پہلے روزے کی فضیلت سے متعلق باب میں سیدنا ابوہریرہ رضی اللہ عنہ کے حوالے سے منقول حدیث گزر چکی ہے ۔

سعید بن ابوسعید مقبری روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سفر عذاب کا ایک ٹکڑا ہے ، جو آدمی کو اس کی نماز روزے اور عبادت کے حوالے سے مشغول رکھتا ہے ، جب کوئی شخص سفر کے حوالے سے اپنا کام پورا کر لے تو اسے جلدی اپنے گھر والوں کی طرف چلے جانا چاہیے “ ۔
( علامہ ہیثمی فرماتے ہیں : ) میں یہ کہتا ہوں : انہوں نے اس روایت کو اسی طرح ” مرسل “ روایت کے طور پر نقل کیا ہے اسی مضمون کی روایت ” صحیح “ میں سیدنا ابوہریرہ رضی اللہ عنہ سے منقول حدیث کے طور پر منقول ہے ، اور وہ امام مالک کی سمی کے حوالے سے ابوصالح کے حوالے سے سیدنا ابوہریرہ رضی اللہ عنہ سے نقل کردہ روایت ہے ، جو اس سند کے حوالے سے مستند نہیں ہے
یہ روایت امام أحمد نے نقل کی ہے ۔

سیدہ عائشہ صدیقہ رضی اللہ عنہا اور سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سفر عذاب کا ایک ٹکڑا ہے ، جو تم میں سے کسی ایک شخص کو سونے سے کھانے سے پینے سے لذت حاصل کرنے سے روک دیتا ہے ، تو جب کوئی شخص اپنا کام پورا کر لے تو وہ اپنے گھر والوں کی طرف جلدی چلا جائے “ ۔ ( علامہ ہیثمی فرماتے ہیں : ) میں یہ کہتا ہوں : سیدنا ابوہریرہ رضی اللہ عنہ کے حوالے سے منقول حدیث ” صحیح “ میں مذکور ہے ۔ اس کی سند میں ایک راوی رواد بن جراح ہے ، جس کے بارے میں بہت زیادہ کلام کیا گیا ہے ۔ ابن حبان نے اسے ” ثقہ “ قرار دیا ہے وہ کہتے ہیں : یہ غلطی کر جاتا ہے
یہ روایت امام طبرانی نے معجم اوسط میں نقل کی ہے ۔