مجمع الزوائد ومنبع الفوائد

سیدنا عمرو بن عبسہ رضی اللہ عنہ بیان کرتے ہیں : ایک شخص نے عرض کی : یا رسول اللہ ! اسلام کیا ہے ؟ نبی اکرم صلی اللہ علیہ وسلم نے فرمایا : یہ کہ تم اپنے دل کو فرمانبردار کر لو اور مسلمان تمہاری زبان اور تمہارے ہاتھ کے حوالے سے محفوظ رہیں اس شخص نے دریافت کیا : کون سا اسلام زیادہ فضیلت رکھتا ہے نبی اکرم صلی اللہ علیہ وسلم نے ارشاد فرمایا : ایمان اس نے عرض کی : ایمان کیا ہے نبی اکرم صلی اللہ علیہ وسلم نے ارشاد فرمایا : یہ کہ تم اللہ تعالیٰ اس کے فرشتوں اس کی کتابوں اس کے رسولوں اور مرنے کے بعد دوبارہ زندہ کیے جانے پر ایمان رکھو اس نے دریافت کیا : کون سا ایمان زیادہ فضیلت رکھتا ہے آپ نے ارشاد فرمایا : ہجرت اس نے عرض کی : ہجرت سے مراد کیا ہے نبی اکرم صلی اللہ علیہ وسلم نے فرمایا : یہ کہ تم برائی سے لاتعلق ہو جاؤ اس نے دریافت کیا : کون سی ہجرت زیادہ فضیلت رکھتی ہے آپ نے ارشاد فرمایا : جہاد اس نے دریافت کیا : جہاد سے مراد کیا ہے ؟ ( نبی اکرم صلی اللہ علیہ وسلم نے ارشاد فرمایا : ) یہ کہ جب تمہارا کفار سے سامنا ہو تو تم ان کے ساتھ جنگ کرو اس نے دریافت کیا : کون سا جہاد زیادہ فضیلت رکھتا ہے ؟ آپ نے ارشاد فرمایا : ( اس شخص کا ) جس کے گھوڑے کے پاؤں کاٹ دیے جائیں اور اس کا خون بہا دیا جائے نبی اکرم صلی اللہ علیہ وسلم نے ارشاد فرمایا : ” پھر دو عمل ہیں جو تمام اعمال سے زیادہ افضل ہیں البتہ اس شخص کا معاملہ مختلف ہے ، جس نے ان دونوں کی مانند عمل کیا ہو ، مبرور حج یا عمرہ “ ۔
یہ روایت امام حمد نے اور امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا ماعز رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ سے سوال کیا گیا کون سا عمل زیادہ فضیلت رکھتا ہے آپ نے ارشاد فرمایا : صرف اللہ تعالی پر ایمان رکھنا ( یعنی اللہ تعالیٰ کی وحدانیت پر ایمان رکھنا ) پھر جہاد اور پھر مبرور حج تمام اعمال پر وہی فضیلت رکھتا ہے ، جس طرح سورج کے طلوع ہونے سے لے کر اس کے غروب ہونے کے درمیان کا فاصلہ ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور امام أحمد کے رجال ” صحیح “ کے رجال ہیں ۔

سیدہ شفاء رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو سنا ایک شخص نے آپ سے سوال کیا کون سا عمل زیادہ فضیلت رکھتا ہے ؟ آپ نے ارشاد فرمایا : اللہ تعالیٰ پر ایمان رکھنا اس کی راہ میں جہاد کرنا اور مبرور حج“ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مبرور حج کا بدلہ صرف جنت ہے “ ۔
یہ روایت امام أحمد نے نقل کی ہے ۔ اس کی سند میں ایک راوی محمد بن ثابت ہے ، اور وہ ضعیف ہے ۔

سیدنا جابر بن عبدالله رضی اللہ عنہما نبی اکرم کا یہ فرمان نقل کرتے ہیں : ” مبرور حج کی جزا صرف جنت ہے عرض کی گئی : اس کے مبرور ہونے سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : کھانا کھلانا اور پاکیزہ گفتگو کرنا“ ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مبرور حج کی جزا صرف جنت ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یحیی بن صالح ایلی ہے عقیلی کہتے ہیں : یحیی بن بکیر نے اس کے حوالے سے منکر روایات نقل کی ہیں ۔ ( علامہ ہیثمی فرماتے ہیں : ) میں یہ کہتا ہوں : حج کی فضیلت کے بارے میں بہت سی احادیث کتاب الج کے آخر میں آئیں گی ، اگر اللہ نے چاہا ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” حج میں خرچ کرنا اللہ کی راہ میں خرچ کرنے کی مانند ہے کہ اس کا اجر سات سو گنا ہوتا ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے ۔ اس کی سند میں ایک راوی ابوزہیر ہے میں نے کسی کو اس کا ذکر کرتے ہوئے نہیں پایا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ کی راہ میں حج کرنا اس میں ایک درہم خرچ کرنا سات سو گنا ( اجر و ثواب کا باعث بنتا ہے ) “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایسا شخص ہے ، جس سے میں واقف نہیں ہوں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” خانہ کعبہ کی ایک زبان اور دو ہونٹ ہیں اس نے اللہ تعالیٰ کی بارگاہ میں شکایت کرتے ہوئے یہ کہا: اے میرے پروردگار ! میرے پاس آنے والے اور میری زیارت کرنے والے تھوڑے ہو گئے ہیں ، تو اللہ تعالیٰ نے یہ وحی کی : میں ایسے انسانوں کو پیدا کروں گا ، جو خشوع والے ہوں گے سجدہ کرنے والے ہوں گے وہ تمہاری طرف یوں آئیں گے جس طرح کبوتری اپنے انڈوں کی طرف جاتی ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سہل بن قرین ہے ، اور وہ ضعیف ہے ۔

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا داؤد نبی علیہ السلام نے عرض کی : اے میرے معبود تیرے بندوں کا تجھ پر کیا حق ہو گا جب وہ تیرے گھر کی زیارت کے لئے تیری بارگاہ میں آئیں تو اللہ تعالیٰ نے فرمایا : ہر ملاقاتی کا میزبان پر حق ہوتا ہے اے داؤد ! ان لوگوں کا مجھ پر یہ حق ہو گا کہ میں انہیں دنیا میں عافیت عطا کروں گا ، اور جب میں ان سے ملوں گا ، تو ان کی مغفرت کر دوں گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن حمزہ رقی ہے ، اور وہ ضعیف ہے ۔

سیدنا جابر بن عبداللہ رضی اللہ عنہما ” مرفوع “ حدیث کے طور پر یہ بات نقل کرتے ہیں : حج کرنے والا شخص کبھی ” امعار “ کا شکار نہیں ہوتا سیدنا جابر رضی اللہ عنہ سے دریافت کیا گیا : ” امعار “ سے مراد کیا ہے ؟ انہوں نے فرمایا : یعنی وہ فقیر نہیں ہوتا ۔
یہ روایت امام طبرانی نے معجم اوسط میں نقل کی ہے ، اور امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص حج کرنے کے لئے یا عمرہ کرنے کے لئے نکلتا ہے ، اور راستے میں مر جاتا ہے ، تو اسے ( حساب کے لئے ) پیش نہیں کیا جائے گا ، اور اس سے حساب نہیں لیا جائے گا اس سے کہا: جائے گا : تم جنت میں داخل ہو جاؤ “ ۔ سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ طواف کرنے والوں کے حوالے سے فخر کا اظہار کرتا ہے “ ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ۔ امام طبرانی کی سند میں ایک راوی محمد بن صالح عدوی ہے میں نے کسی کو اس کا ذکر کرتے ہوئے نہیں پایا ہے اس کے بقیہ رجال ” صحیح“ کے رجال ہیں امام ابویعلیٰ کی سند میں ایک راوی عائذ بن بشیر ہے ، اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص حج کرنے کے لئے نکلتا ہے ، اور مر جاتا ہے ، تو اللہ تعالیٰ اُس کے لیے قیامت کے دن تک کے لئے حاجی کا ثواب نوٹ کرتا ہے ، اور جو شخص عمرہ کرنے کے لئے نکلتا ہے ، اور مر جاتا ہے اللہ تعالیٰ اس کے لئے قیامت کے دن تک عمرے کرنے والے کا ثواب نوٹ کرتا ہے ، اور جو شخص اللہ کی راہ میں جنگ میں حصہ لینے کے لئے نکلتا ہے ، اور مر جاتا ہے اللہ تعالیٰ اس کے لئے قیامت تک غازی کا اجر نوٹ کرتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی جمیل بن ابومیمونہ ہے ، جس کا ذکر ابن ابوحاتم نے کیا ہے ۔ انہوں نے اس کے بارے میں کوئی جرح یا تعدیل ذکر نہیں کی ہے ۔ ابن حبان نے اس کا تذکرہ کتاب ” الثقات“ میں کیا ہے ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک یہ گھر اسلام کے ستونوں میں سے ایک ستون ہے ، جو شخص بیت اللہ کا حج کرتا ہے ، یا عمرہ کرتا ہے ، تو وہ اللہ تعالیٰ کے ذمہ ہوتا ہے کہ اگر وہ شخص مر گیا ، تو اللہ تعالیٰ اسے جنت میں داخل کرے گا ، اور اگر اللہ تعالی نے اسے اس کے گھر والوں کی طرف لوٹا دیا تو اسے اجر اور غنیمت کے ہمراہ لوٹائے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن عبداللہ بن عبید بن عمیر ہے ، اور وہ متروک ہے ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو بھی مسلمان اللہ کی راہ میں جہاد کرنے کے لئے یا حج کرنے کے لئے احرام باندھ کر یا تلبیہ پڑھتے ہوئے نکلتا ہے ، تو سورج اس کے گناہوں سمیت غروب ہو جاتا ہے ، اور وہ ان گناہوں سے نکل جاتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ایسا ہے ، جس سے میں واقف نہیں ہوں ۔

سیدنا عبداللہ بن جراد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : تم لوگ حج کرو کیونکہ حج گناہوں کو یوں دھو دیتا ہے ، جس طرح پانی میں کو دھو دیتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یعلی بن اشدق ہے ، اور وہ کذاب ہے ۔ حج کی فضیلت کے بارے میں بہت سی احادیث آگے اس کے بعد آئیں گی ، اگر اللہ نے چاہا ۔