مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مسلمان بھائی کی بھوک کا خیال کر کے اسے کچھ کھلائے یہاں تک کہ اس کو سیر کر دے تو اللہ تعالی اس کی مغفرت کر دیتا ہے ، اور اسے یوں سیراب کرے گا کہ وہ سیر ہو جائے گا “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی بکر بن خنیس ہے ، اور وہ ضعیف ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے بھائی کو کھلاتا ہے یہاں تک کہ اسے سیر کر دیتا ہے ، اور اسے پانی پلاتا ہے یہاں تک کہ اسے سیراب کر دیتا ہے ، تو اللہ تعالیٰ اسے جہنم سے سات خندقوں جتنا دور کر دے گا جن میں سے ہر دو خندقوں کے درمیان پانچ سو سال کی مسافت کا فیصلہ ہو گا“ ۔
یہ روایت امام طبرانی نے معجم کبیر میں نقل کی ہے ، اور معجم اوسط میں اس کی مانند نقل کی ہے ، تاہم اس میں انہوں نے یہ الفاظ نقل کیے ہیں : ” جو شخص اپنے بھائی کو روٹی کھلائے ۔ ۔ ۔ ۔ ۔ ۔ ۔ ۔ ۔ ۔ “ ۔ اس روایت کی سند میں ایک راوی رجاء بن ابوعطاء ہے ، اور وہ ضعیف ہے ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم سے سوال کیا گیا کون سا عمل زیادہ فضیلت رکھتا ہے ؟ نبی اکرم صلی اللہ علیہ وسلم نے ارشاد فرمایا : ” تمہارا مومن پر خوشی داخل کرنا ( یوں کہ ) اس کی بھوک کے عالم میں تم اسے سیر کر دو یا اسے لباس فراہم کر دو یا اس کی کوئی اور ضرورت پوری کر دو “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن بشیر کندی ہے ، اور وہ ضعیف ہے ۔

سیدنا معاذ بن جبل رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کسی مؤمن کو کھلاتا ہے یہاں تک کہ اسے بھوک کے عالم میں سیر کر دیتا ہے ، تو اللہ تعالٰی اسے جنت کے دروازوں میں سے ایک دروازے میں داخل کرے گا اس دروازے میں سے صرف وہ شخص داخل ہو سکے گا جس نے اس کی مانند کام کیا ہو گا“ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عمرو بن واقد ہے ، اور اس کے بارے میں کلام کیا گیا ہے محمد بن مبارک صوری بیان کرتے ہیں : یہ حاکم وقت کے پاس آیا جایا کرتا تھا ویسے یہ صدوق ہے ۔