مجمع الزوائد ومنبع الفوائد

سیدنا یزید بن اخنس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم آپس میں صرف دو آدمیوں پر رشک کر سکتے ہو ایک وہ شخص جے اللہ تعالیٰ نے قرآن ( کا علم ) عطا کیا ہو ، اور وہ رات دن اس کے ساتھ مصروف رہتا ہو ، اور اس کے احکام کی پیروی کرتا ہو تو کوئی شخص یہ کہے کہ اگر اللہ تعالیٰ مجھے بھی وہ چیز عطا کر دے جو اس کو عطا کی ہے ، تو میں بھی اسی طرح مصروف رہوں گا جس طرح وہ مصروف رہتا ہے ، اور ایک وہ شخص جسے اللہ تعالیٰ نے مال عطا کیا ہو ، اور وہ اس میں سے خرچ کرتا ہو ، اور صدقہ کرتا ہو اگر کوئی شخص یہ کہے کہ اگر اللہ تعالیٰ مجھے اس طرح عطا کر دے جس طرح اس نے فلاں کو عطا کیا ہے ، تو میں بھی اسی طرح صدقہ کروں گا ایک صاحب نے عرض کی : یا رسول اللہ ! خوشحالی ( یا جسمانی صحت ) کے بارے میں آپ کی کیا رائے ہے ، جو کسی شخص میں پائی جاتی ہے “ ۔ ۔ ۔ ۔ ۔ ۔ ۔ ۔ ۔ راوی بیان کرتے ہیں : روایت کا بقیہ حصہ ساقط ہے ۔
یہ روایت امام أحمد نے کتابت کے طور پر نقل کی ہے ۔ امام طبرانی نے معجم کبیر ، معجم اوسط اور معجم صغیر میں نقل کی ہے ۔ اس کی سند میں ایک راوی سلیمان بن موسیٰ ہے اس کے بارے میں کلام کیا گیا ہے ایک جماعت نے اسے ” ثقہ “ قرار دیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” رشک صرف دو طرح کے آدمیوں پر کیا جا سکتا ہے ایک وہ شخص جسے اللہ تعالیٰ نے قرآن عطا کیا ہو ، اور وہ رات دن اس کی تلاوت کرتا رہتا ہو یہ شخص اس کو سنے اور بولے : اے کاش مجھے بھی اس کی مانند عطا کیا جاتا جو اسے عطا کیا گیا ہے ، تو اس کے بارے میں ، میں بھی اسی طرح عمل کرتا جس طرح وہ عمل کرتا ہے ایک وہ شخص جسے اللہ تعالٰی نے مال عطا کیا ہو ، اور وہ اسے حق کے راستے میں خرچ کرتا ہو تو کوئی شخص یہ کہے اے کاش مجھے بھی اسی طرح عطا کیا جاتا جس طرح اسے عطا کیا گیا ہے ، تو میں بھی اس کے بارے میں اسی طرح کا طرز عمل اختیار کرتا جس طرح یہ کرتا ہے “ ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” رشک دو طرح کے آدمیوں پر کیا جا سکتا ہے ایک وہ شخص جسے اللہ تعالیٰ نے قرآن عطا کیا ہو ، اور وہ اس کے ساتھ مصروف رہتا ہو وہ اس کے حلال کو حلال قرار دے اور اس کے حرام کو حرام قرار دے ایک وہ شخص جسے اللہ تعالیٰ نے مال عطا کیا ہو تو وہ اس کے ذریعے صلہ رحمی کرے اور اس کے ذریعے لوگوں پر رحم کرے اور اللہ تعالیٰ کی فرمانبرداری کا عمل کرے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ۔