مجمع الزوائد ومنبع الفوائد

سیدنا عبدالرحمن بن ابوبکر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” خوشحال شخص کے لئے اور صحیح اعضاء کے مالک ( یعنی جو اپاہج نہ ہو ) قوت والے شخص کے لئے زکوۃ وصول کرنا حلال نہیں ہے “ ۔
یہ روایت امام طبرانی نے معجم کبیر میں نقل کی ہے ، اور امام بزار نے نقل کی ہے ، اور اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

عبیداللہ بن عدی بن خیار بیان کرتے ہیں : دو آدمی ، نبی اکرم صلی اللہ علیہ وسلم کی خدمت میں حجتہ الوداع کے موقع پر حاضر ہوئے ، ان دونوں نے آپ سے صدقہ کے بارے میں دریافت کیا ( یا آپ سے صدقہ مانگا ) ، نبی اکرم صلی اللہ علیہ وسلم نے نگاہ اٹھا کر اُن کا اچھی طرح سے جائزہ لیا ، آپ نے ان دونوں کو ملاحظہ فرمایا کہ وہ مضبوط جسم کے مالک ہیں ، تو نبی اکرم صلی اللہ علیہ وسلم نے ارشاد فرمایا : اگر تم چاہو تو میں تم دونوں کی مدد کر دیتا ہوں ، لیکن زکوٰۃ میں کسی خوشحال شخص ، یا کمانے کی قوت رکھنے والے طاقتور کا کوئی حصہ نہیں ہے ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” صدقہ ( لینا ) کسی خوشحال شخص کے لئے یا اور صحیح اعضاء کے مالک ( یعنی جو اپاہج نہ ہو ) قوت والے شخص کے لئے حلال نہیں ہے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح“ کے رجال ہیں ۔

بنو ہلال سے تعلق رکھنے والے ایک صاحب بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مانگنا کسی خوشحال کے لئے ، اور صحیح اعضاء کے مالک ( یعنی جو اپاہج نہ ہو ) قوت والے شخص کے لئے حلال نہیں ہے “ ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں ، اس نوعیت کی دیگر احادیث آگے والے باب میں آئیں گی ، اگر اللہ نے چاہا ۔

میناء بیان کرتے ہیں : وہ لوگ سیدنا عبداللہ بن مسعود رضی اللہ عنہ کی خدمت میں حاضر ہوئے ، یہ سیدنا عثمان رضی اللہ عنہ کے عہد خلافت کی بات ہے ، ان لوگوں نے کہا: ہماری تنخواہیں ہمیں دے دیں ، سیدنا عبداللہ بن مسعود رضی اللہ عنہ نے فرمایا : تمہاری کوئی تنخواہ میرے پاس نہیں ہے ، تمہاری تنخواہ مال فئے میں سے اور جزیہ میں سے دی جاتی ہے ، زکوۃ اُس کے مستحق افراد کو ہی دی جائے گی ، جب لوگوں نے بار بار اُن کے پاس آنا شروع کیا ، تو وہ چابیاں لے کر سیدنا عثمان رضی اللہ عنہ کے پاس آئے اور ان کے سامنے رکھ دیں اور یہ کہا: میں خزانچی نہیں بنوں گا ۔
یہ روایت امام طبرانی نے معجم کبیر میں نقل کی ہے ، میناء نامی راوی کے بارے میں بہت زیادہ کلام کیا گیا ہے ، ابن حبان نے اسے ” ثقہ “ قرار دیا ہے ۔