مجمع الزوائد ومنبع الفوائد

سیدنا عمرو بن حزم رضی اللہ عنہ بیان کرتے ہیں : نبی اکرم صلی اللہ علیہ وسلم نے اہل یمن کی طرف ایک مکتوب لکھا تھا ، جس میں فرائض ، سنن اور دیت سے متعلق احکام تھے ، آپ نے سیدنا عمرو بن حزم رضی اللہ عنہ کے ہمراہ وہ خط بھیجا تھا ، وہ خط اہل یمن کے سامنے پڑھا گیا ، اُس کے الفاظ یہ ہیں : ” اللہ تعالی کے نام سے برکت حاصل کرتے ہوئے ، جو بڑا مہربان نہایت رحم کرنے والا ہے ، یہ سیدنا محمد نبی صلی اللہ علیہ وسلم کی طرف سے شرحبیل بن عبد کلال ، حارث بن عبد کلال ، نعیم بن عبد کلال اور ذی معافر اور ہمدان قبیلے کے اکابرین کی طرف ہے : امابعد ! تمہارا قاصد واپس آیا ، اور تمہیں جو مال غنیمت عطا کیا گیا ، اس میں سے پانچواں حصہ ، اللہ تعالی کے لئے ہے ، اور وہ چیز ہے ، جو اللہ تعالیٰ نے اہل ایمان پر عشر لازم کیا ہے ، جو زمین کی پیدوار کے حوالے سے ہے ، وہ زمین جو بارش کے ذریعے سیراب ہو ، یا جو چشمے والی ہو ، یا جو بارانی ہو ، ( یعنی ہر وہ زمین جو قدرتی طریقے سے سیراب ہوتی ہو ) اس میں عشر لازم ہو گا ، جبکہ اس کی پیداوار پانچ وسق تک پہنچ جائے ، اور ہر پانچ سائمہ اونٹوں میں ایک بکری کی ادائیگی لازم ہو گی ، یہاں تک کہ وہ چوبیس تک پہنچ جائیں ، اگر چوبیس سے ایک بھی زیادہ ہو جائے ، تو بنت مخاض کی ادائیگی لازم ہو گی ، اگر بنت مخاض نہیں ملتی ہے ، تو ابن لبون مذکر کی ادائیگی لازم ہو گی ، یہ حکم پینتیس تک ہے ، اگر وہ پینتیس سے ایک بھی زیادہ ہو جائے ، تو اس میں بنت لبون کی ادائیگی لازم ہو گی ، یہ حکم پینتالیس تک ہے ، اگر وہ پینتالیس سے ایک بھی زیادہ ہو جائیں ، تو اس میں ایک حقہ کی ادائیگی لازم ہو گی ، جس کو جفتی کے لئے دیا جا سکے ، یہ حکم ساٹھ تک ہے ، اگر وہ ساٹھ سے ایک بھی زیادہ ہو جائیں ، تو ان میں جزعہ کی ادائیگی لازم ہو گی ، یہاں تک کہ وہ پچھتر تک پہنچ جائیں ، اگر وہ پچھتر سے ایک بھی زیادہ ہو جائیں ، تو اُن میں دو بنت لبون کی ادائیگی لازم ہو گی ، یہاں تک کہ وہ نوے تک پہنچ جائیں ، اگر وہ ایک بھی زیادہ ہو جائیں ، تو ان میں دو حقہ کی ادائیگی لازم ہو گی ، جو جفتی کے لئے دیے جا سکیں ، یہ حکم ایک سو بیس تک کے لئے ہو گا ۔ اگر ایک سو بیس سے زیادہ ہو جائیں ، تو ہر چالیس میں ایک بنت لبون کی ، اور ہر پچاس میں ایک حقہ کی ، جسے جفتی کے لئے دیا جا سکے ، ادائیگی لازم ہو گی ، اور ہر تیس گائیوں میں ایک گائے کی ادائیگی لازم ہو گی ، جو جزع یا جزعہ ہو ، اور ہر چالیس گائیوں میں ایک گائے کی ادائیگی لازم ہو گی ، اور ہر چالیس بکریوں میں ایک بکری کی ادائیگی لازم ہو گی ، یہاں تک کہ وہ ایک سو بیس تک پہنچ جائیں ، اگر وہ ایک سو بیس سے ایک بھی زیادہ ہو جائیں ، تو ان میں دو بکریوں کی ادائیگی لازم ہو گی ، یہاں تک کہ وہ دو سو تک پہنچ جائیں اگر ایک بھی زیادہ ہو جائے ، تو ان میں تین بکریوں کی ادائیگی لازم ہو گی ، یہاں تک کہ وہ تین سو تک پہنچ جائیں ، اگر وہ زیادہ ہو جائیں تو ہر ایک سو بکریوں میں ، ایک بکری کی ادائیگی لازم ہو گی ۔ زکوۃ میں کوئی ایسا جانور وصول نہیں کیا جائے گا ، جو محفلہ ( وہ مادہ جانور ، جس کا دودھ کچھ دن تک نہ دوہا گیا ہو ، تاکہ یہ ظاہر ہو کہ وہ زیادہ دودھ دینے والا جانور ہے ) ہو ، بوڑھا ہو ، لنگڑا ہو ، کانا ہو ، یا نر بکرا ہو ، اور ( زکوۃ کی وصولی کے لئے ) متفرق مال کو اکٹھا نہیں کیا جائے گا ، اور اکٹھے مال کو متفرق نہیں کیا جائے گا ، اچھے طریقے سے زکوۃ وصول کی جائے گی جو چیز دو حصے داروں سے لی جائے گی ، تو وہ اُن دونوں کے درمیان برابری کی بنیاد پر تقسیم ہو گی ۔ چاندی کے پانچ اوقیہ میں ، پانچ درہم کی ادائیگی لازم ہو گی ، جو اُس سے زیادہ ہو ، تو ہر چالیس درہموں میں ایک درہم کی ادائیگی لازم ہو گی ، اور جو چاندی پانچ اوقیہ سے کم ہو ، اس میں کوئی ادائیگی لازم نہیں ہو گی ، ہر چالیس دینار میں ایک دینار کی ادائیگی لازم ہو گی ، اور صدقہ ( یعنی زکوۃ ) محمد ( صلی اللہ علیہ وسلم ) اور اس کے اہل بیت کے لئے حلال نہیں ہے ، یہ زکوۃ ہے ، جس کے ذریعے اُن لوگوں کے وجود پاک کیے جاتے ہیں اور یہ غریب مومنین کے لئے ہو گی ، اللہ کی راہ میں خرچ ہو گی ، غلاموں کو ( آزاد کرنے ) کے لئے خرچ نہیں ہو گی ، یہ کھیتی باڑی میں خرچ نہیں ہو گی ، اور نہ ہی اس کی وصولی کے اہلکاروں کو کچھ دیا جائے گا ، جبکہ ” عشر “ میں سے اس کی زکوۃ ادا کر دی گئی ہو ، اور مسلمان کے غلام ، یا اس کے گھوڑے میں کوئی ادائیگی لازم نہیں ہو گی “ ۔ اس مکتوب میں یہ بات بھی تحریر تھی : ” قیامت کے دن اللہ تعالیٰ کی بارگاہ میں سب سے بڑا کبیرہ گناہ ، کسی کو اللہ کا شریک قرار دینا ، کسی مؤمن جان کو ناحق طور پر قتل کرنا ، اللہ کی راہ میں میدان جنگ سے راہ فرار اختیار کرنا ، والدین کی نافرمانی کرنا ، پاک دامن عورت پر الزام لگانا ، جادو سیکھنا ، سود کھانا ، یتیم کا مال کھانا ہے ، اور عمرہ ، حج اصغر ہے ، اور قرآن کو باوضو شخص ہاتھ لگائے گا ، اور ملکیت حاصل ہونے سے پہلے طلاق نہیں دی جا سکتی ، اور غلام آزاد نہیں کیا جا سکتا ، جب تک تم اُسے خرید نہیں لیتے ، اور کوئی بھی شخص ایسی حالت میں ایک کپڑے میں نماز ادا نہ کرے کہ اُس کا ایک پہلو ظاہر ہو رہا ہے ، اور کوئی بھی شخص ایسی حالت میں نماز ادا نہ کرے ، کہ اُس نے بالوں کا جوڑا بنایا ہوا ہو “ ۔
( علامہ ہیثمی فرماتے ہیں : ) میں یہ کہتا ہوں ، اس کے بعد انہوں نے پوری حدیث ذکر کی ہے ، اور اس روایت کا کچھ حصہ امام نسائی رحمہ اللہ نے بھی نقل کیا ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سلیمان بن داؤد حرسی ہے ، جسے امام أحمد نے ” ثقہ “ قرار دیا ہے ، یحیی بن معین نے اس کے بارے میں کلام کیا ہے ، امام أحمد کہتے ہیں : یہ حدیث مستند ہے ۔ میں یہ کہتا ہوں : اس کے بقیہ رجال ثقہ ہیں ۔

سیدنا مالک بن عوف رضی اللہ عنہ بیان کرتے ہیں : میں مسجد میں موجود تھا ، سیدنا ابوذر غفاری رضی اللہ عنہ مسجد میں داخل ہوئے ، انہوں نے ایک ستون کے پاس دو رکعات ادا کیں ، سیدنا عثمان رضی اللہ عنہ ان سے دریافت کیا : آپ کیا حال ہے ؟ پھر وہ مڑ گئے اور انہوں نے سورت الهاکم التکاثر پڑھنی شروع کی ، وہ ایک ایسے شخص تھے جن کی آواز بھاری تھی ، وہ بلند آواز میں پڑھنے لگے ، تو مسجد میں گونج پیدا ہوئی ، پھر وہ لوگوں کی طرف متوجہ ہوئے ، تو میں نے کہا: اے سیدنا ابوذر غفاری ! ( راوی کو شک ہے ، شاید یہ الفاظ ہیں : ) لوگوں نے اُن سے کہا: آپ ہمیں کوئی ایسی حدیث بیان کیجئے ، جو آپ نے نبی اکرم صلی اللہ علیہ وسلم کی زبانی سنی ہو ، تو انہوں نے یہ بات بتائی : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اونٹوں میں اُن کی زکوۃ لازم ہو گی ، اور بکریوں میں ان کی زکوۃ لازم ہو گی ۔ ابوعاصم نامی راوی کہتے ہیں : میرا خیال ہے ، انہوں نے یہ بھی فرمایا تھا : گائیوں میں ان کی زکوۃ لازم ہو گی ، گندم میں اس کی زکوۃ لازم ہو گی ، سونے اور چاندی اور خالص سونے میں اس کی زکوۃ لازم ہو گی ، جو شخص مال جمع کرے گا ، اور اسے اللہ کی راہ میں ، مقروضوں ، اور مسافروں ( کی مدد میں ) خرچ نہیں کرے گا ، تو یہ چیز قیامت کے دن اُس کے لئے داغ لگنے کا باعث ہو گی“ ۔ میں نے کہا: اے سیدنا ابوذر غفاری ! آپ اللہ تعالیٰ سے ڈریں اور آپ یہ جائزہ لیں کہ آپ کیا کہہ رہے ہیں ؟ کیونکہ لوگوں کے پاس تو اموال بہت زیادہ ہو گئے ہیں ، تو انہوں نے فرمایا : اے میرے بھتیجے ! تم میرے سامنے اپنا نسب بیان کرو ، میں نے ان کے سامنے اپنا نسب بیان کیا ، تو انہوں نے فرمایا : میں نے تمہارے نسب کو پہچان لیا ہے ، کیا تم نے قرآن پڑھا ہے ؟ میں نے جواب دیا : جی ہاں ! انہوں نے فرمایا : پھر تم یہ آیت پڑھو : ” وہ لوگ جو سونے اور چاندی کا خزانہ اکھٹے کرتے ہیں ، اور انہیں اللہ کی راہ میں خرچ نہیں کرتے ہیں ۔ ۔ ۔ ۔ ۔ ۔ ۔ ۔ ۔ “ ۔ انہوں نے اسے آیت کے آخر تک پڑھا ، پھر انہوں نے فرمایا : تم سمجھ جاؤ ۔
یہ روایت امام بزار نے طویل روایت کے طور پر نقل کی ہے ، امام أحمد نے اس کا ایک حصہ نقل کیا ہے ، اس کی سند میں ایک راوی موسیٰ بن عبیدہ ربذی ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے یہ سنت مقرر کی ہے کہ جس زمین کو آسمان ( یعنی بارش ) ، یا چشموں کے ذریعے سیراب کیا جائے ، اُس میں عشر کی ادائیگی لازم ہو گی ، اور جسے اونٹنی پر پانی لا کر سیراب کیا جائے ، اس میں نصف عشر کی ادائیگی لازم ہو گی ۔
یہ روایت امام بزار نے نقل کی ہے ، اور اس کے رجال ثقہ ہیں ۔

قزعہ بیان کرتے ہیں : میں سیدنا ابوسعید خدری رضی اللہ عنہ کی خدمت میں حاضر ہوا ، اُن کے پاس بہت سے لوگ موجود تھے ، جب لوگ ان کے پاس سے چلے گئے ، تو میں نے ان سے کہا: میں آپ سے اُس چیز کے بارے میں دریافت نہیں کروں گا ، جس کے بارے میں یہ ( لوگ ) آپ سے دریافت کر رہے تھے ، راوی بیان کرتے ہیں : میں نے اُن سے زکوٰۃ کے بارے میں دریافت کیا ، تو انہوں نے جواب دیا : راوی کہتے ہیں : مجھے نہیں معلوم کہ کیا انہوں نے یہ بات نبی اکرم صلی اللہ علیہ وسلم کی طرف نسبت کر کے بیان کی تھی ؟ یا نہیں ؟ ( انہوں نے بتایا : ) ” ایک سو درہموں میں پانچ درہم کی ادائیگی لازم ہو گی ، چالیس بکریوں میں ایک بکری کی ادائیگی لازم ہو گی ، یہ حکم ایک سو بیس تک کے لئے ہے ، اگر ایک بھی زیادہ ہو جائے ، تو ان میں دو سو تک دو بکریوں کی ادائیگی لازم ہو گی ، اگر زیادہ ہو جائیں ، تو تین سو تک میں تین بکریوں کی ادائیگی لازم ہو گی ، اگر زیادہ ہو جائیں ، تو ہر ایک سو میں ، ایک بکری کی ادائیگی لازم ہو گی ، اونٹوں میں پانچ میں ، ایک بکری کی ادائیگی لازم ہو گی ، دس میں دو بکریوں کی ادائیگی لازم ہو گی ، پندرہ میں تین بکریوں کی ادائیگی لازم ہو گی ، بیس میں چار بکریوں کی ادائیگی لازم ہو گی ، پچیس میں ایک بنت مخاض کی ادائیگی لازم ہو گی ، یہ حکم پینتیس تک کے لئے ہے ، اگر ایک بھی زیادہ ہو جائے تو پینتالیس تک میں ایک بنت لبون کی ادائیگی لازم ہو گی ، اگر ایک بھی زیادہ ہو جائے ، تو ساٹھ تک میں ایک حقہ کی ادائیگی لازم ہو گی ، اگر ایک بھی زیادہ ہو جائے ، تو پچھتر تک میں ایک جذعہ کی ادائیگی لازم ہو گی ، اگر ایک بھی زیادہ ہوئے ، تو نوے تک میں دو بنت لبون کی ادائیگی لازم ہو گی ، اگر ایک بھی زیادہ ہو جائے ، تو ایک سو بیس تک میں دو حقہ کی ادائیگی لازم ہو گی ، اگر ایک بھی زیادہ ہو جائے تو ہر پچاس میں ایک حقہ کی ، اور ہر چالیس میں ایک بنت لبون کی ادائیگی لازم ہو گی “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے صدقات کے احکام میں اپنے عاملین کی طرف یہ تحریر کیا تھا : ” چالیس بکریوں سے لے کے ایک سو بیس تک میں ( ایک بکری کی ادائیگی لازم ہو گی ) اگر ایک بھی زیادہ ہو جائے ، تو دو سو تک میں دو بکریوں کی ادائیگی لازم ہو گی ، اگر ایک بھی زیادہ ہو جائے ، تو تین سو تک میں تین ( یعنی بکریوں کی ادائیگی لازم ہو گی ) اگر بکریاں زیادہ ہو جائیں ، تو ہر ایک سو بکریوں میں ، ایک بکری کی ادائیگی لازم ہو گی “ ۔ نبی اکرم صلی اللہ علیہ وسلم نے گائیوں کی زکوۃ میں یہ تحریر کیا تھا : ہر تیس گائیوں میں ، ایک جذعہ اور ہر چالیس گائیوں میں ایک ممنہ کی ادائیگی لازم ہو گی ۔ نبی اکرم صلی اللہ علیہ وسلم نے اونٹوں کی زکوۃ میں یہ تحریر کیا تھا : پانچ اونٹوں میں ایک بکری کی ، دس اونٹوں میں دو بکریوں کی ، پندرہ اونٹوں میں تین بکریوں کی ، بیس اونٹوں میں چار بکریوں کی ، اور پچیس اونٹوں میں ایک بنت مخاض کی ادائیگی لازم ہو گی ، یہ حکم پینتیس تک کے لئے ہے ، اگر ایک بھی زیادہ ہو جائے ، تو پنتالیس تک ایک بنت لبون کی ادائیگی لازم ہو گی ، اگر ایک بھی زیادہ ہو جائے ، تو ایک حقہ کی ادائیگی لازم ہو گی ، جسے جفتی کے لئے دیا جا سکے ، یہ حکم ساتھ تک کے لئے ہے ، اگر ایک بھی زیادہ ہو جائے ، تو پچھتر تک میں ایک جذعہ کی ادائیگی لازم ہو گی ، اگر ایک بھی زیادہ ہو جائے ، تو نوے تک میں دو بنت لبون کی ادائیگی لازم ہو گی ، اگر ایک بھی زیادہ ہو جائے تو ایک سو بیس تک میں دو حقوں کی ادائیگی لازم ہو گی ، اگر اونٹ زیادہ ہو جائیں ، تو ہر پچاس میں ایک حقہ کی اور ہر چالیس میں ایک بنت لبون کی ادائیگی لازم ہو گی ۔
یہ دونوں روایات امام طبرانی نے معجم اوسط میں ، محمد بن اسماعیل بن عبداللہ کے حوالے سے ، اُن کے والد سے نقل کی ہیں اور میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے گائیوں میں ” اوقاص “ کے بارے میں کوئی حکم نہیں دیا تھا ( اس کی وضاحت اگلی روایت میں آئے گی ) ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : تاہم یہ روایت ” مرسل “ ہے ، کیونکہ اسے طاؤس نے سیدنا معاذ رضی اللہ عنہ سے نقل کیا ہے ، اور طاؤس نے ان سے سماع نہیں کیا ہے ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم نے سیدنا معاذ رضی اللہ عنہ کو یمن بھیجا ، تو آپ نے انہیں حکم دیا کہ وہ ہر تیس گائیوں میں ایک تبیع یا تبیعہ ، یا ایک جذع یا جذعہ وصول کریں ، اور ہم چالیس گائیوں میں ایک مسنہ وصول کریں ، لوگوں نے عرض کی : ” اوقاص “ کیا حکم ہو گا ؟ تو سیدنا معاذ رضی اللہ عنہ نے بتایا : مجھے اس کے بارے میں نبی اکرم صلی اللہ علیہ وسلم نے کوئی حکم نہیں دیا ، جب میں نبی اکرم صلی اللہ علیہ وسلم کی خدمت میں جاؤں گا ، تو آپ سے دریافت کر لوں گا ، جب وہ نبی اکرم صلی اللہ علیہ وسلم کی خدمت میں حاضر ہوئے اور انہوں نے اس بارے میں دریافت کیا ، تو نبی اکرم صلی اللہ علیہ وسلم نے ارشاد فرمایا : اُن میں کسی چیز کی ادائیگی لازم نہیں ہو گی ۔ راوی بیان کرتے ہیں : مسعودی فرماتے ہیں : ” اوقاص “ سے مراد تیس سے لے کے چالیس تک ، یا چالیس سے لے کر ساتھ تک کی تعداد ہے ۔
یہ روایت امام بزار نے نقل کی ہے ، وہ فرماتے ہیں : اس روایت کے ” مرفوع “ ہونے میں ، کسی نے بھی بقیہ کی متابعت نہیں کی ہے ، صرف حسن بن عمارہ نے متابعت کی ہے ، اور حسن نامی راوی ضعیف ہے ، یہ روایت طاؤس کے حوالے سے ” مرسل “ روایت کے طور پر بھی نقل کی گئی ہے ۔

نافع بیان کرتے ہیں : انہوں نے سیدنا عمر بن خطاب رضی اللہ عنہ کا مکتوب پڑھا ( جس میں یہ تحریر تھا : ) ” پانچ سے کم اونٹوں میں کوئی ادائیگی لازم نہیں ہو گی ، جب وہ پانچ ہو جائیں ، تو نو تک میں ایک بکری کی ادائیگی لازم ہو گی ، جب وہ دس ہو جائیں ، تو چودہ تک میں دو بکریوں کی ادائیگی لازم ہو گی ، جب وہ پندرہ ہو جائیں تو ان میں تین بکریوں کی ادائیگی لازم ہو گی ، یہ حکم اُنیس تک کے لئے ہے ، جب وہ بیس تک پہنچ جائیں ، تو چوبیس تک میں چار بکریوں کی ادائیگی لازم ہو گی ، جب وہ پچیس تک پہنچ جائیں ، تو پینتیس تک میں ایک بنت مخاض کی ادائیگی لازم ہو گی ، جب وہ زیادہ ہو جائیں تو پینتالیس تک میں ایک بنت لبون کی ادائیگی لازم ہو گی ، اور جب وہ زیادہ ہو جائیں ، تو ساٹھ تک میں ایک حقہ کی ادائیگی لازم ہو گی ، جب وہ زیادہ ہو جائیں ، تو نوے تک میں دو بنت لبون کی ادائیگی لازم ہو گی ، جب وہ زیادہ ہو جائیں ، تو ایک سو بیس تک میں دو حقوں کی ادائیگی لازم ہو گی ، جب وہ زیادہ ہو جائیں ، تو ہر پچاس میں ایک حقہ کی اور ہر چالیس میں ایک بنت لبون کی ادائیگی لازم ہو گی ، چالیس سے کم بکریوں میں کوئی ادائیگی لازم نہیں ہو گی ، جب وہ چالیس ہو جائیں ، تو ایک سو بیس تک میں ایک بکری کی ادائیگی لازم ہو گی ، جب وہ زیادہ ہو جائیں ، تو دو سو تک میں دو بکریوں کی ادائیگی لازم ہو گی ، جب وہ دو سو سے زیادہ ہو جائیں ، تو تین سو تک میں تین بکریوں کی ادائیگی لازم ہو گی ، اگر وہ تین سو سے بھی زیادہ ہوں ، تو ہر ایک سو میں ، ایک بکری کی ادائیگی لازم ہو گی “ ۔
یہ روایت امام ابویعلیٰ نے ” وجادہ “ کے طور پر نقل کی ہے ۔ جیسا کہ آپ اسے ملاحظہ کر رہے ہیں اور اس کے رجال ثقہ ہیں ۔

سیدنا مغیرہ بن شعبہ رضی اللہ عنہ بیان کرتے ہیں : سیدنا عثمان بن ابوالعاص رضی اللہ عنہ نے یہ بات بیان کی ہے ، جب وہ نوجوان تھے ، تو اس وقت ہم نبی اکرم صلی اللہ علیہ وسلم کی خدمت کی وفد کی شکل میں حاضر ہوئے ، نبی اکرم صلی اللہ علیہ وسلم نے مجھے پایا کہ مجھے اُن سب میں زیادہ قرآن آتا ہے ، یہاں تک کہ اُن سب میں سے صرف مجھے سورۃ بقرہ آتی ہے ، نبی اکرم صلی اللہ علیہ وسلم نے فرمایا : میں تمہیں تمہارے ساتھیوں کا امیر مقرر کرتا ہوں حالانکہ تم ان سے عمر میں سب سے کم ہو ، جب تم لوگوں کی امامت کرو ، تو تم ان کے سب سے کمزور فرد کے حساب سے اُن کی امامت کرنا ، کیونکہ تمہارے پیچھے بڑی عمر کے ، چھوٹے ، کمزور ، کام کاج والے لوگ ہوں گے ، اور جب تم زکوۃ وصول کرو ، تو حاملہ ، یا جس جانور کو اپنے استعمال کا دودھ حاصل کرنے کے لیے پالا گیا ہو ، یا بکرے ، ان کو وصول نہ کرنا ، اور آدمی نے جس کو اپنے کھانے کے لیے پالا ہو ، اس کا وہ تم سے زیادہ حق دار ہو گا ، تم قرآن کو صرف باوضو حالت میں چھونا ، اور یہ بات جان لینا ، عمرہ ، حج اصغر ہے ، اور عمرہ ، دنیا اور اس میں موجود سب چیزوں سے زیادہ بہتر ہے ، اور حج کرنا ، عمرہ سے بھی بہتر ہے “ ۔
( علامہ ہیثمی فرماتے ہیں : ) میں یہ کہتا ہوں : ” صحیح “ میں اس میں سے امامت والا واقعہ منقول ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ہشام بن سلیمان ہے ، جسے ائمہ کی ایک جماعت نے ” ضعیف “ قرار دیا ہے ، اور امام بخاری رحمہ اللہ نے اسے ” ثقہ “ قرار دیا ہے ۔

سیدنا سلمہ بن اکوع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تیس اونٹ اچھے ہوتے ہیں ، اُن کی زکوۃ میں ایک نکل جاتا ہے ، اور ان میں سے ایک پر اللہ تعالیٰ کی راہ میں سامان لادا جاتا ہے ، ان میں سے ایک کو عطیہ کے طور پر دیا جاتا ہے ، یہ چالیس اور پچاس اور ساٹھ اور اسی اور نوے اور سو سے بہتر ہیں اور ایک سو اونٹوں کے مالک کے لئے اونٹوں کے حوالے سے بربادی ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

یعلی بن اشدق بیان کرتے ہیں : میں نے نبی اکرم صلی اللہ علیہ وسلم کے متعدد صحابہ کا زمانہ پایا ہے ، جن میں سے ایک سیدنا رقاد بن ربیعہ رضی اللہ عنہ ہیں ، وہ بیان کرتے ہیں : نبی اکرم صلی اللہ علیہ وسلم نے ہم سے بکریوں میں ، ایک سو بکریوں سے ایک بکری اور اگر زیادہ ہوں ، تو دو بکریاں وصول کی تھیں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی أحمد بن کثیر بجلی ہے ، میں نے کسی کو اُس کا ذکر کرتے ہوئے نہیں پایا ہے ، یعلی نامی راوی متروک ہے ۔

سفیان بن عبداللہ بیان کرتے ہیں : سیدنا عمر بن خطاب رضی اللہ عنہ نے زکوۃ وصول کرنے والا شخص بھیجا ، تو انہوں نے فرمایا : تم نے جانوروں میں بالکل چھوٹے بچے کو بھی شمار کرنا ہے ، لوگوں نے کہا: اس نے ہمارے حوالے سے بالکل چھوٹے بچے کو بھی شمار کیا ہے ، لیکن زکوۃ میں اُسے وصول نہیں کیا ، جب وہ شخص سیدنا عمر رضی اللہ عنہ کے پاس آیا اور سیدنا عمر رضی اللہ عنہ کے سامنے یہ بات ذکر کی ، تو سیدنا عمر رضی اللہ عنہ نے اس سے فرمایا : جی ہاں ! ان لوگوں کے خلاف چھوٹے بچے کو شمار کیا جائے گا ، جسے چرواہا اٹھا کے چلتا ہے ، لیکن زکوۃ وصول کرنے والا اسے زکوۃ میں وصول نہیں کرے گا ، اور نہ ہی وہ ایسے جانور کو وصول کرے گا جس کو اپنے کھانے کے لیے یا اپنے لیے دودھ حاصل کرنے کے لیے پالا گیا ہو ، نہ حاملہ کو اور نہ ہی بکرے کو وصول کرے گا ، وہ جذعہ اور ثنبہ کو وصول کرے گا ، اور ( عمدہ یا بالکل ہی ردی مال کی بجائے ) درمیانے درجہ کا مال وصول کرے گا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ، اور اس کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کھیت میں ہل چلانے میں استعمال ہونے والی گائیوں میں زکوۃ نہیں ہو گی ، ویسے ہر تیس میں ایک تبیع ، اور ہر پچاس میں ایک مسن یا مسنہ کی ادائیگی لازم ہو گی“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی لیث بن ابوسلیم ہے ، لیکن وہ تدلیس کرنے والا ہے ۔

سیدنا عبداللہ بن مسعود رضی اللہ عنہ فرماتے ہیں : پچیس اونٹوں میں بنت مخاض کی ادائیگی لازم ہو گی ، اگر وہ نہ ہو ، تو ابن لبون مذکر کی ادائیگی لازم ہو گی ۔
یہ روایت امام طبرانی نے معجم کبیر میں نقل کی ہے ، ابوعبیدہ نامی راوی نے اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔

ضحاک بن نعمان بن سعد بیان کرتے ہیں : سیدنا مسروق بن وائل رضی اللہ عنہ مدینہ منورہ میں ، نبی اکرم صلی اللہ علیہ وسلم کی خدمت میں ” عقیق “ کے مقام پر حاضر ہوئے ، انہوں نے اسلام قبول کر لیا اور ان کا اسلام عمدہ ہوا ، انہوں نے عرض کی : یا رسول اللہ ! میں یہ چاہتا ہوں کہ آپ میری قوم کی طرف کسی کو بھیجیں ، اور انہیں اسلام کی دعوت دیں ، آپ میرے لئے ایک تحریر لکھ دیں ، جو میری قوم کے نام ہو ، ہو سکتا ہے کہ اللہ تعالیٰ انہیں ہدایت نصیب کرے ، تو نبی اکرم صلی اللہ علیہ وسلم نے سیدنا معاویہ رضی اللہ عنہ کو حکم دیا کہ تم اسے تحریر لکھ دو ! تو انہوں نے اسے تحریر لکھ کے دی : ” اللہ تعالیٰ کے نام سے برکت حاصل کرتے ہوئے ، جو بڑا مہربان نہایت رحم کرنے والا ہے ، یہ ” حضر موت “ کے اکابرین کے نام ہے کہ نماز قائم کی جائے ، زکوۃ ادا کی جائے ، تیعہ ( یعنی چالیس بکریوں ) اور تیمہ ( ایک قول کے مطابق اس سے مراد وہ بکریاں ہیں جو چالیس سے زائد ہوں ، یہاں تک کہ ان کی تعداد اگلے فریضہ تک پہنچ جائے اور ایک قول کے مطابق اس سے مراد وہ بکری ہے جو گھر میں ذاتی استعمال کا دودھ حاصل کرنے کے لیے ہو ) ، میں صدقہ ( یعنی زکوۃ ) لازم ہو گی ، جبکہ سیوب ( وہ مال جو زمانہ جاہلیت میں دفن کیا گیا تھا اگر وہ کسی کو مل جاتا ہے ، تو اس ) میں خمس کی ادائیگی لازم ہو گی ، بارانی زمین ( کی پیداوار میں ) عشر کی ادائیگی لازم ہو گی ، نہ ” خلاط “ ہو گا ، اور نہ ” وراط “ ہو گا ، نہ ” شغار “ ہو گا ، نہ ” شناق “ ہو گا ، نہ ” جنب “ ہو گا ، نہ اُسے لایا جائے گا ، نہ ایک رسی میں دو اونٹوں کو اکھٹا کیا جائے گا ، جو شخص اجباء کرے گا ( یعنی کھیت کی پیداوار یا پھل وغیرہ کے پک کر تیار ہونے سے پہلے اس کو فروخت کرے گا ) ، وہ سود کا کام کرے گا ، اور ہر نشہ آور چیز حرام ہے “ ۔ پھر نبی اکرم صلی اللہ علیہ وسلم نے سیدنا زیاد بن لبید انصاری رضی اللہ عنہ کو ان کی طرف بھیجا تھا ۔
( مصنف فرماتے ہیں : ) جہاں تک لفظ ” خلاط “ کا تعلق ہے ، تو اس سے مراد یہ ہے کہ جانوروں کو اکٹھا نہیں کیا جائے گا ۔ جہاں لفظ ” وراط “ کا تعلق ہے ، تو اس سے مراد یہ ہے کہ اُن کی قیمت کا تعین نہیں کیا جائے گا ۔ جہاں تک لفظ ” شغار “ کا تعلق ہے ، تو اس سے مراد یہ ہے کہ آدمی اپنی بیٹی کی شادی کر دے ، اس شرط پر کہ دوسرا شخص بھی اپنی بیٹی کی شادی اُس کے ساتھ کر دے گا ، اور درمیان میں کوئی مہر نہ ہو ۔ لفظ ” شناق “ کا مطلب یہ ہے کہ آدمی اُن کو ان کے بیٹھنے کی جگہ پر باندھ دے ۔ لفظ ” اجباء “ سے مراد یہ ہے کہ پھل کو فروخت کر دیا جائے ، اس سے پہلے کہ وہ آفت سے محفوظ ہو جائے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی بقیہ ہے ، لیکن وہ تدلیس کرنے والا ہے ، اور وہ ثقہ ہے ۔