مجمع الزوائد ومنبع الفوائد

سیدنا علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے مسلمانوں کے خوش حال افراد پر ، اُن کے اموال میں ، اس حساب سے زکوۃ فرض قرار دی ہے ، جو ان کے غریبوں کے لئے گنجائش کر دے ، اور جب غریب بھوکے ہوں ، اور انہیں لباس کی ضرورت ہو ، تو انہیں مشکل نہ ہو ، البتہ اس چیز کا معاملہ مختلف ہے ، جو چیز ان کے خوشحال لوگ ضائع کر دیتے ہیں ، خبردار ! اللہ تعالیٰ ان سے زبردست حساب لے گا ، اور انہیں دردناک عذاب دے گا“ ۔
یہ روایت امام طبرانی نے معجم صغیر اور معجم اوسط میں نقل کی ہے ، وہ فرماتے ہیں : ثابت بن محمد نامی زاہد ، اس روایت کو نقل کرنے میں منفرد ہے ۔
( علامہ ہیثمی فرماتے ہیں : ) میں یہ کہتا ہوں : ثابت نامی شخص ” صحیح “ کے رجال میں سے ہے ۔ اس روایت کے بقیہ رجال کی توثیق کی گئی ہے ، اور اس کے بارے میں کلام کیا گیا ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن خوشحال لوگوں کے لئے بربادی ہو گی ، غریب کہیں گے : اے ہمارے پروردگار ! انہوں نے ہمارے حقوق کے حوالے سے ہم پر ظلم کیا ، وہ حق جو تو نے ہمارے لئے ان پر لازم قرار دیا تھا ، تو اللہ تعالیٰ فرمائے گا : مجھے اپنی عزت اور جلال کی قسم ہے ! میں تمہیں ضرور قریب کروں گا ، اور انہیں ضرور دور کر دوں گا ، پھر نبی اکرم صلی اللہ علیہ وسلم نے یہ آیت تلاوت کی : ” وہ لوگ کہ ان کے اموال میں مانگنے والے اور محروم شخص کے لئے متعین حق ہوتا ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی حارث بن نعمان ہے ، اور وہ ضعیف ہے ۔

سیدنا علقمہ رضی اللہ عنہ بیان کرتے ہیں : وہ لوگ نبی اکرم صلی اللہ علیہ وسلم کی خدمت میں حاضر ہوئے ، وہ بیان کرتے ہیں : نبی اکرم صلی اللہ علیہ وسلم نے ہم سے فرمایا : تمہارے اسلام کی تکمیل میں یہ بات شامل ہے کہ تم اپنے اموال کی زکوۃ ادا کرو ۔
یہ روایت امام بزار نے اور امام طبرانی نے معجم کبیر میں نقل کی ہے ۔ معجم کبیر کے الفاظ یہ ہیں : ” تکمیل میں سے “ اس روایت کی سند میں ایک راوی ایسا ہے ، جو معروف نہیں ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” زکوۃ ، اسلام کا پل ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ، البتہ بقیہ نامی راوی تدلیس کرنے والا ہے ، اور وہ ثقہ ہے ۔

سیدنا حذیفہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اسلام کے آٹھ حصے ہیں ، اسلام ( یعنی کلمہ شہادت پڑھنا ) ایک حصہ ہے ، نماز ایک حصہ ہے روزہ ایک حصہ ہے زکوۃ ایک حصہ ہے ، بیت اللہ کا حج کرنا ایک حصہ ہے نیکی کا حکم دینا ایک حصہ ہے برائی سے منع کرنا ایک حصہ اللہ کی راہ میں جہاد کرنا ایک حصہ ہے ، اور وہ شخص رسوا ہو گیا ، جس کا کوئی حصہ نہ ہو“ ۔
یہ روایت امام بزار نے نقل کی ہے ، اس کی سند میں ایک راوی یزید بن عطاء ہے ، جسے امام أحمد نے ثقہ قرار دیا ہے ، اور ایک جماعت نے اسے ” ضعیف“ قرار دیا ہے۔
( علامہ ہیثمی فرماتے ہیں : ) میں یہ کہتا ہوں ، اس سے پہلے ایمان سے متعلق باب میں اس نوعیت کی احادیث گزر چکی ہیں ۔

سیدنا عبداللہ بن مسعود رضی اللہ عنہ فرماتے ہیں : ہمیں نماز قائم کرنے اور زکوۃ ادا کرنے کا حکم دیا گیا ، جو شخص زکوۃ ادا نہیں کرتا ، اس کی نماز بھی نہیں ہوتی ۔
یہ روایت امام طبرانی نے معجم کبیر میں نقل کی ہے ، اور اس کی سند حسن صحیح ہے ۔

سیدنا ابوذر غفاری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اونٹوں میں ان کی زکوۃ لازم ہو گی ، بکریوں میں ان کی زکوۃ ہو گی ، گائے میں ان کی زکوۃ لازم ہو گی ، گندم میں ان کی زکوۃ لازم ہو گی“ ۔
یہ روایت امام أحمد نے نقل کی ہے ، اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یہ حکم دیا کہ میں آپ کے پاس کوئی ایسی چیز لے کے آؤں جس پر آپ ایسی تحریر لکھ دیں کہ اس کے بعد آپ کی امت گمراہ نہیں ہو گی ، لیکن مجھے اس بات کا اندیشہ ہوا کہ کہیں ( میرے جانے کے بعد ) آپ انتقال نہ کر جائیں ، سیدنا علی رضی اللہ عنہ کہتے ہیں : میں نے عرض کی : میں اس بات کو یاد بھی رکھوں گا ، اور محفوظ بھی رکھوں گا ، نبی اکرم صلی اللہ علیہ وسلم نے ارشاد فرمایا : میں نماز اور زکوۃ کی تلقین کرتا ہوں ، اور جو تمہارے زیر ملکیت ہیں ( یعنی تمہارے غلاموں اور کنیزوں کے بارے میں بھی تلقین کرتا ہوں ) “ ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد نے نقل کی ہے ، اس کی سند میں ایک راوی نعیم بن یزید ہے ، عمر بن فضل کے علاوہ اور کسی نے اس سے روایت نقل نہیں کی ہے ۔

سیدنا انس بن مالک رضی اللہ عنہ بیان کرتے ہیں : بنو تمیم سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! میرے پاس بہت سا مال ہے ، اہل خانہ بھی ہیں ، مال بھی ہے ، ساز و سامان بھی ہے ، آپ مجھے بتائیے کہ میں کیا کروں اور مجھے کیسے خرچ کرنا چاہیے ؟ نبی اکرم صلی اللہ علیہ وسلم نے ارشاد فرمایا : تم اپنے مال کی زکوۃ نکالو ، یہ ایک ایسی پاکیزگی ہو گی ، جو تمہیں پاک کر دے گی ، تم اپنے رشتہ داروں کے ساتھ صلہ رحمی کرو ، تم مسکین ، پڑوسی اور مانگنے والے کے حق کو پہچانو ، اس شخص نے عرض کی : یا رسول اللہ ! آپ مجھے مختصر ارشاد فرمایئے ! نبی اکرم صلی اللہ علیہ وسلم نے فرمایا : تم رشتے داروں کو ان کا حق دو ، مسکین کو مسافر کو ( ان کا حق دو ) اور فضول خرچی نہ کرو ، اس نے عرض کی : یا رسول اللہ ! میرے لئے یہ کافی ہے ، جب میں آپ صلی اللہ علیہ وسلم کے نمائندے کو زکوۃ ادا کر دوں تو کیا میں اس کے حوالے سے اللہ اور اس کے رسول کی بارگاہ میں بری الذمہ ہو جاؤں گا ؟ نبی اکرم صلی اللہ علیہ وسلم نے ارشاد فرمایا : جب تم وہ ( زکوۃ ) میرے نمائندے کو ادا کر دو گے تو تم بری الذمہ ہو جاؤ گے ، تمہیں اس کا اجر ملے گا ؟ اور جو شخص اس میں تبدیلی کرے گا ، اس کا گناہ اس شخص کے ذمہ ہو گا“ ۔
یہ روایت امام أحمد نے اور امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشا فرمایا : ” وہ لوگ اپنی زمینوں ، اپنے غلاموں اور اپنے جانوروں کے حوالے سے جس چیز پر اسلام قبول کرتے ہیں ، وہ اُن کا رہے گا ، اور ان چیزوں کے حوالے سے ، اُن پر صرف زکوۃ دینا لازم ہو گا “ ۔
یہ روایت امام أحمد نے ، امام بزار نے اور امام طبرانی نے معجم اوسط میں نقل کی ہے ، تاہم ان دونوں نے یہ الفاظ نقل کیے ہیں : نبی اکرم صلی اللہ علیہ وسلم نے ذمیوں کے بارے میں یہ ارشاد فرمایا : ” وہ لوگ جس چیز پر اسلام قبول کرتے ہیں ، وہ اُن کی ملکیت رہے گی“ ۔ اس روایت کی سند میں ایک راوی لیث بن ابوسلیم ہے اس کی توثیق کی گئی ہے ، تا ہم وہ تدلیس کرنے والا ہے ۔

سیدنا جابر رضی اللہ عنہ بیان کرتے ہیں : حاضرین میں سے ایک صاحب نے عرض کی : یا رسول اللہ ! اس بارے میں آپ کی کیا رائے ہے کہ اگر کوئی شخص اپنے مال کی زکوۃ ادا کر دیتا ہے ؟ نبی اکرم صلی اللہ علیہ وسلم نے ارشاد فرمایا : جو شخص اپنے مال کی زکوۃ ادا کر دیتا ہے ، تو اس کے مال کا شر اس شخص سے چلا جاتا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند حسن ہے ، اگرچہ اس کے بعض رجال کے بارے میں کلام کیا گیا ہے ۔

سیدنا ابوہریرہ رضی اللہ عنہ بیان کرتے ہیں : میں نے سیدنا عمر بن خطاب رضی اللہ عنہ کی زبانی ایک حدیث سنی ، جو نبی اکرم صلی اللہ علیہ وسلم کے حوالے سے منقول تھی ، میں نے وہ حدیث نبی اکرم صلی اللہ علیہ وسلم کی زبانی نہیں سنی ، حالانکہ میں اکثر نبی اکرم صلی اللہ علیہ وسلم کے ساتھ رہا کرتا تھا ، سیدنا عمر رضی اللہ عنہ نے یہ بات بیان کی : نبی اکرم صلی اللہ علیہ وسلم نے ارشاد فرمایا ہے : ” خشکی اور سمندر میں ، جو بھی مال ضائع ہوتا ہے ، وہ زکوۃ ادا نہ کرنے کی وجہ سے ہوتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمر بن ہارون ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اپنے اموال کو زکوۃ کے ذریعے محفوظ کر دو ! اپنے بیماروں کا صدقہ کے ذریعے علاج کرو ، اور دعا کے ذریعے آزمائش کے لئے تیاری کرو ! “ ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی موسیٰ بن عمیر کوفی ہے ، اور وہ متروک ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن زکوۃ ادا نہ کرنے والا شخص جہنم میں جائے گا “ ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی سنان بن سعد ہے ، اور اس کے بارے میں بہت زیادہ کلام کیا گیا ہے ، اور اس کی توثیق بھی کی گئی ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر وہ مال ، خواہ وہ سات زمینوں کے نیچے ہو ، اگر اس کی زکوۃ ادا کر دی جائے ، تو وہ ” کنز “ شمار نہیں ہو گا ، اور ہر وہ مال ، جس کی زکوۃ ادا نہ کی گئی ہو ، وہ اگرچہ ظاہر ہو پھر بھی وہ ” کنز “ شمار ہو گا “ ۔
( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اس کی مانند منقول ہے ، تاہم یہ سیدنا عبداللہ بن عمر رضی اللہ عنہما پر ” موقوف “ ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سوید بن عبدالعزیز ہے ، اور وہ ضعیف ہے ۔

سیدنا ابوشداد رضی اللہ عنہ بیان کرتے ہیں : جن کا تعلق اہل عمان سے ہے ، وہ بیان کرتے ہیں : ہمارے پاس نبی اکرم صلی اللہ علیہ وسلم کا مکتوب آیا ( جس میں یہ تحریر تھا : ) ” اما بعد ! تم لوگ اس بات کی گواہی کا اقرار کرو ، کہ اللہ تعالیٰ کے علاوہ اور کوئی معبود نہیں ہے ، اور بے شک میں اللہ کا رسول ہوں ، تم زکوۃ ادا کرو ، تم مساجد کے نشان اِس اِس طرح بناؤ ، ورنہ پھر میں تمہارے ساتھ جنگ کروں گا“ ۔ سیدنا ابوشداد رضی اللہ عنہ بیان کرتے ہیں : ہمیں کوئی ایسا شخص نہیں ملا ، جو ہمارے سامنے وہ مکتوب پڑھ کر سناتا ، یہاں تک کہ ہمیں ایک لڑکا ملا جو پڑھ سکتا تھا ، تو اس نے ہمیں وہ پڑھ کر سنایا ۔ عبدالعزیز نامی راوی بیان کرتے ہیں : میں نے سیدنا ابوشداد رضی اللہ عنہ سے دریافت کیا : اُن دنوں عمان کا حکمران کون تھا ؟ انہوں نے جواب دیا : کسری کی طرف سے مقرر کردہ ایک اہل کار تھا ۔
یہ روایت امام بزار نے نقل کی ہے ، یہ روایت ” مرسل “ ہے اور اس کی سند میں ایسا راوی ہے ، جو معروف نہیں ہے ۔

سیدنا ثوبان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اپنے بعد خزانہ چھوڑ کر جاتا ہے ، قیامت کے دن اُس خزانے کو گنجے سانپ کی شکل میں بنا دیا جائے گا ، جس کی دو زبانیں ہوں گی ، وہ اس شخص کے پیچھے جائے گا وہ شخص کہے گا : تمہارا ستیاناس ہو ، تم کون ہو ؟ وہ کہے گا : میں تمہارا وہ خزانہ ہوں ، جسے تم نے اکھٹا کیا تھا ، پھر وہ خزانہ مسلسل اس شخص کے پیچھے رہے گا ، یہاں تک کہ وہ اس کے ہاتھ کو اپنے منہ میں ڈال لے گا ، اور پھر اس کے پورے جسم کو نگل لے گا“ ۔
یہ روایت امام بزار نے نقل کی ہے ، وہ فرماتے ہیں : اس کی سند حسن ہے ۔ میں کہتا ہوں : اس کے رجال ثقہ ہیں ، یہ روایت امام طبرانی نے معجم کبیر میں بھی نقل کی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” صدقہ ( یعنی وہ صدقہ جو ادا نہ کیا گیا ہو ، راوی کو شک ہے ، شاید یہ الفاظ ہیں : ) زکوۃ جس بھی مال کے ساتھ مل جاتی ہے ، اُسے خراب کر دیتی ہے “ ۔
یہ روایت امام بزار نے نقل کی ہے ، اس کی سند میں ایک راوی عثمان بن عبدالرحمن جمحی ہے ، ابوحاتم کہتے ہیں : اس کی حدیث کو نوٹ کیا جائے گا ، لیکن اس سے استدلال نہیں کیا جائے گا ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ان لوگوں کے سامنے نماز کا حکم ظاہر تھا ، تو انہوں نے نماز ادا کی ، اور زکوۃ کا حکم اُن لوگوں سے پوشیدہ رہا ، تو وہ اسے کھا گئے ، یہ لوگ منافق ہیں“ ۔
یہ روایت امام بزار نے نقل کی ہے ، اس کی سند میں ایک راوی عبداللہ بن ابراہیم غفاری ہے ، اور وہ ضعیف ہے ۔

سیدنا عبداللہ بن زبیر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو بھی اونٹوں کا مالک شخص ، اونٹوں کے بارے میں اُن کے تنگی اور آسانی ( یعنی وہ موٹے تازے ہوں یا کمزور ہوں ، ہر حال میں ) حق ( یعنی زکوۃ ) کو ادا نہیں کرے گا ، تو جب وہ قیامت کے دن آئے گا ، تو اسے ان اونٹوں کے سامنے ایک چٹیل میدان میں جائے گا ، وہ ( اونٹ ) اپنے پاؤں کے ذریعے اُسے روندیں گے جب ان میں سے پہلا ختم ہو جائے گا ، تو آخری دوبارہ سے شروع ہو جائے گا ، ایسا اس وقت تک ہوتا رہے گا ، جب تک لوگوں کے درمیان فیصلہ نہیں ہو جاتا ہے ، اس کے بعد وہ شخص اپنا راستہ دیکھے گا“ ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا عبداللہ بن زبیر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اونٹوں کا جو بھی مالک ہو گا ، اسے قیامت کے دن لایا جائے گا جبکہ اس نے اونٹوں کے حق ( یعنی زکوۃ ) کو ادا نہیں کیا ہو گا ، وہ اونٹ کھلے میدان میں اس کے پاس چلتے ہوئے آئیں گے اور اپنے پاؤں کے ذریعے اسے روندیں گے ، گائیوں کے مالک کو لایا جائے گا ، جب اس نے ( دنیا میں ) ان کے حق ( یعنی زکوۃ ) کو ادا نہیں کیا ہو گا ، وہ چلتی ہوئی اس شخص کے پاس آئیں گی ، اور اسے اپنے پاؤں کے ذریعے روندیں گی ، ان میں سے کوئی ایسی نہیں ہو گی ، جو بغیر سینگ کے ہو ، یا کوئی سینگ ٹوٹا ہوا ہو ، بکریوں کے مالک کو لایا جائے گا ، جس نے ان کے حق کو ادا نہیں کیا ہو گا ، تو ایک چٹیل میدان میں وہ بکریاں چلتی ہوئی اس کے پاس آئیں گی ، اپنے سینگوں کے ذریعے اسے ماریں گی ، اور اپنے پاؤں کے ذریعے اسے روندیں گی ، ان میں کوئی ایسی بکری نہیں ہو گی ، جس کا سینگ نہ ہو ، یا جس کا سینگ ٹوٹا ہوا ہو ، خزانے کے مالک شخص کو لایا جائے گا ، اور اس خزانے کو ایک گنجے سانپ کی شکل دے دی جائے گی ، اسے کوئی چیز نہیں ملے گی ، تو وہ اس شخص کا ہاتھ اپنے منہ میں ڈال لے گا “ ۔
یہ روایت امام طبرانی نے طویل روایت کے طور پر نقل کی ہے ، جبکہ امام بزار نے اس روایت کا ایک حصہ نقل کیا ہے ، اس روایت کی توثیق کی گئی ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ تعالیٰ اور اس کے رسول پر ایمان رکھتا ہو ، اسے اپنے مال کی زکوۃ ادا کرنی چاہیئے ، اور جو شخص اللہ تعالی اور آخرت کے دن پر ایمان رکھتا ہو ، اسے حق بات کہنی چاہیے ، یا پھر خاموش رہنا چاہیے ، اور جو شخص اللہ تعالیٰ اور اس کے رسول پر ایمان رکھتا ہو ، اسے مہمان کی عزت افزائی کرنی چاہیے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحیی بن عبداللہ بابلتی ہے ، اور وہ ضعیف ہے ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” پانچ چیزیں ، پانچ چیزوں کے ساتھ مشروط ہیں ، عرض کی گئی : یا رسول اللہ ! پانچ چیزیں ، پانچ چیزوں کے ساتھ مشروط ہونے سے مراد کیا ہے ؟ نبی اکرم صلی اللہ علیہ وسلم نے فرمایا : جب بھی کوئی قوم عہد شکنی کرتی ہے ، تو ان کے دشمن کو ان پر مسلط کر دیا جاتا ہے ، اور جب بھی لوگ اس چیز کے علاوہ فیصلہ دیتے ہیں ، جو اللہ تعالیٰ نے نازل کیا ہے ، تو ان کے درمیان غربت پھیل جاتی ہے ، اور جس قوم کے درمیان فحاشی ظاہر ہو جاتی ہے ، ان کے درمیان موت پھیل جاتی ہے ، اور جو لوگ زکوۃ نہیں دیتے ہیں ، اُن سے بارش کو روک لیا جاتا ہے ، اور جو لوگ ماپنے میں ہیرا پھیری کرتے ہیں ، اُن سے پیدوار کو روک دیا جاتا ہے ، اور انہیں قحط سالی لپیٹ میں لے لیتی ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبداللہ بن کیسان مروزی ہے ۔ امام حاکم رحمہ اللہ نے اسے کمزور قرار دیا ہے ، اس کے بقیہ رجال کی توثیق کی گئی ہے ، اور ان کے بارے میں کلام بھی کیا گیا ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عنقریب لوگوں پر ایسا زمانہ آئے گا کہ اُن کے دل عجمیوں کے دلوں کی مانند ہوں گے ، میں نے دریافت کیا : عجمیوں کے دل سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : دنیا کی محبت ، آپ نے ارشاد فرمایا : اُن لوگوں کا طور طریقہ دیہاتیوں کا طور طریقہ ہو گا ، اُن کے پاس جو بھی رزق آئے گا ، وہ اسے جانوروں پر خرچ کریں گے ، وہ لوگ جہاد کو نقصان دہ چیز سمجھیں گے اور زکوۃ کو تاوان سمجھیں گے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی بقیہ بن ولید ہے وہ ثقہ ہے ، لیکن وہ تدلیس کرنے والا ہے ، اس کے بقیہ رجال کی توثیق کی گئی ہے ۔

سیدنا عبداللہ بن مسعود رضی اللہ عنہ فرماتے ہیں : جو شخص پاکیزہ ( یعنی حلال مال ) کماتا ہے ، تو زکوۃ ادا نہ کرنا اُسے خبیث کر دیتا ہے ، اور جو شخص خبیث ( یعنی حرام مال ) کماتا ہے ، تو زکوۃ کی ادائیگی اسے پاک نہیں کرتی ہے ۔
یہ روایت امام طبرانی نے معجم کبیر میں نقل کی ہے ، اور اس کی سند منقطع ہے ۔

ان کے حوالے سے یہ بات منقول ہے : وہ بیان کرتے ہیں : جو شخص خزانہ اکھٹا کرے گا ، اور درہم کو درہم کے ساتھ اور دینار کو دینار کے ساتھ ملائے گا اس کی جلد کو بڑا کر دیا جائے گا ، یہاں تک کہ ہر دینار اور ہر درہم کو الگ سے اس پر رکھا جائے گا ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو لوگ زکوۃ ادا نہیں کرتے ہیں ، اللہ تعالیٰ انہیں قحط سالی میں مبتلاء کر دیتا ہے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : میں نبی اکرم صلی اللہ علیہ وسلم کے ہمراہ مدینہ منورہ سے نکلا ، نبی اکرم صلی اللہ علیہ وسلم کا گزر ایک کنویں کے پاس سے ہوا ، جس سے پانی لیا جاتا تھا ، آپ نے فرمایا : کنویں کا مالک شخص قیامت کے دن اسے اٹھا کے آئے گا ، اگر اس نے اس کے حق کو ادا نہیں کیا ہو گا ، پھر آپ کا گزر بکریوں کے پاس سے ہوا ، آپ نے ارشاد فرمایا : ان بکریوں کے مالک کے ساتھ ایسا ایسا کیا جائے گا ، اگر اس نے ان کے حق کو ادا نہیں کیا ہو گا ، پھر آپ کا گزر اونٹوں کے پاس سے ہوا ، تو آپ نے اس کی مانند بات ارشاد فرمائی ، میں نے عرض کی : یا رسول اللہ ! کون سا مال زیادہ بہتر ہے ؟ آپ نے ارشاد فرمایا : مال میں کوئی بہتری نہیں ہے ، میں نے عرض کی : ہماری ضروریات کی چیزیں کیا ہونی چاہییں ؟ نبی اکرم صلی اللہ علیہ وسلم نے ارشاد فرمایا : ایک خادم ، جو تمہاری خدمت کرے ، جب وہ نماز پڑھتا ہو ، تو پھر وہ تمہارا بھائی شمار ہو گا ، یا تمہارا گھوڑا جس پر تم جہاد کے لئے جا سکو “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عدی بن فضل ہے ، اور وہ متروک ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے صدقہ جمع کروانے کا حکم دیا ، تو کوئی شخص اپنے مال کے حساب سے اپنی زکوۃ لے آتا تھا ، میں رونے لگا نبی اکرم صلی اللہ علیہ وسلم نے دریافت کیا : اے ابوذر ! تم کیوں رو رہے ہو ؟ میں نے عرض کی : یا رسول اللہ ! مال دار لوگ اجر لے گئے ، نبی اکرم صلی اللہ علیہ وسلم نے دریافت کیا : وہ کیسے ؟ میں نے عرض کی : وہ اسی طرح نماز پڑھتے ہیں ، جس طرح ہم پڑھتے ہیں ، وہ اسی طرح روزے رکھتے ہیں ، جس طرح ہم رکھتے ہیں ، لیکن ان کے پاس ایسا مال ہے ، جسے وہ صدقہ کر دیتے ہیں اور ہمارے پاس ایسا نہیں ہے ، نبی اکرم صلی اللہ علیہ وسلم نے ارشاد فرمایا : ( بلکہ مال و دولت کے حوالے سے ) کثرت والے لوگ ، نچلے درجے کے ہوں گے ، البتہ اس شخص کا معاملہ مختلف ہے ، جو مال کے بارے میں اس طرح اور اس طرح کہتا ہے ( یعنی اسے اللہ کی راہ میں خرچ کرتا ہے ) اور ایسے لوگ تھوڑے ہیں ، میں نے عرض کی : یا رسول اللہ ! یہ کیسے ہو گا ؟ نبی اکرم صلی اللہ علیہ وسلم نے ارشاد فرمایا : جو بھی اونٹوں کا مالک ، ان کی تنگی اور خوشحالی میں ( یعنی خواہ وہ موٹے تازے ہوں یا دبلے پتلے کمزور ہوں ، ہر حال میں ) ان کی زکوۃ ادا نہیں کرے گا ، قیامت کے دن وہ اونٹ ایک کھلے میدان میں آئیں گے ، اور اسے اپنے پاؤں کے ذریعے روندیں گے ، جب ان میں سے پہلے والا گزر جائے گا ، تو دوسرے والا دوبارہ آ جائے گا ، ایسا اس وقت تک ہوتا رہے گا جب تک لوگوں کے درمیان فیصلہ نہیں ہو جاتا ، میں نے عرض کی : یا رسول اللہ ! گھوڑوں کا کیا حکم ہے ؟ نبی اکرم صلی اللہ علیہ وسلم نے ارشاد فرمایا : گھوڑے تین قسم کے افراد کے ہوتے ہیں ، ایک وہ شخص ہے ، جو اسے اللہ کی راہ میں استعمال کرنے کے لئے رکھتا ہے ، تو اس شخص کو تنگی ، اور خوشحالی ہر حال میں اس کا اجر ملے گا ، یہاں تک کہ اللہ کی قسم اگر وہ گھوڑا اپنی رسی کو تڑوا کر ایک یا دو ٹیلوں پر چڑھ جاتا ہے ، یا کسی سرسبز باغ میں داخل ہوتا ہے ( تو بھی اس شخص کو اس کا اجر ملے گا ) اور جو شخص اسے سرکشی کے لیے اختیار کرتا ہے ، تو قیامت کے دن یہ گھوڑا اس کے لئے وبال ہو گا ، لوگوں نے عرض کی : اے اللہ کے نبی ! خچروں کا کیا حکم ہے ؟ نبی اکرم صلی اللہ علیہ وسلم نے ارشاد فرمایا : اس کے بارے میں اللہ تعالیٰ نے صرف ایک آیت نازل کی ہے ، جو جامع ہے : ” جو شخص ذرے کے وزن جتنی بھلائی کرے گا ، وہ اُسے ( یعنی اس کے بدلے کو ) دیکھ لے گا ، اور جو شخص ذرے کے وزن جتنی برائی کرے گا ، وہ اُسے دیکھ لے گا“ ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابن ماجہ نے اختصار کے ساتھ نقل کی ہے ۔
یہ روایت امام طبرانی نے معجم اوسط میں نقل کی ہے ، اور اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔

میمون بن مہران بیان کرتے ہیں : سیدنا عبداللہ بن عمر رضی اللہ عنہما سے کہا: گیا : زید بن حارثہ کا انتقال ہو گیا ہے ؟ انہوں نے فرمایا : اللہ تعالیٰ اُن پر رحم کرے ، اُن سے کہا: گیا : اے ابوعبدالرحمن ! اُس نے ایک لاکھ ( درہم یا دینار ) چھوڑے ہیں ، تو سیدنا عبداللہ بن عمر رضی اللہ عنہما نے فرمایا : لیکن تم نے اُسے نہیں چھوڑا ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔