مجمع الزوائد ومنبع الفوائد

سیدنا حذیفہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ ایک جنازے میں شریک ہوئے جب ہم قبر کے پاس پہنچے تو نبی اکرم صلی اللہ علیہ وسلم اس کے کنارے پر بیٹھ گئے آپ اس میں نگاہ ڈالنے لگے پھر آپ نے ارشاد فرمایا : ” اس میں مومن کو یوں بھینچا جاتا ہے کہ اس کی وجہ سے اس کی حمائل ( گردن اور سینہ ) زائل ہو جاتے ہیں ، اور یہ کافر کے لئے آگ سے بھر جاتی ہے “ ۔ اس کے بعد راوی نے پوری حدیث ذکر کی ہے یہ حدیث آگے چل کر زہد سے متعلق باب میں مکمل روایت کے طور پر آئے گی ، اگر اللہ نے چاہا ۔
یہ روایت امام أحمد نے نقل کی ہے ۔ اس کی سند میں ایک رادی محمد بن جابر ہے ، اور وہ ضعیف ہے ۔

سیدنا جابر بن عبدالله رضی اللہ عنہما بیان کرتے ہیں : جب سیدنا سعد بن معاذ رضی اللہ عنہ کو دفن کیا گیا اس وقت ہم نبی اکرم صلی اللہ علیہ وسلم کے ساتھ تھے ۔ نبی اکرم صلی اللہ علیہ وسلم نے سبحان اللہ کہا: لوگوں نے بھی آپ کے ساتھ خاصی دیر تک سبحان اللہ پڑھا پھر آپ نے تکبیر کہی تو لوگوں نے بھی تکبیر کہی پھر لوگوں نے دریافت کیا : آپ نے سبحان اللہ کیوں کہا: تھا ؟ نبی اکرم صلی اللہ علیہ وسلم نے فرمایا : اس نیک شخص کے لئے قبر تنگ ہو گئی تھی یہاں تک کہ اللہ تعالیٰ نے اسے کشادہ کر دیا ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی محمود بن محمد بن عبدالرحمن بن عمرو بن جموح ہے حسینی فرماتے ہیں اس میں غور و فکر کی گنجائش ہے ۔ ( علامہ ہیثمی فرماتے ہیں : ) میں یہ کہتا ہوں : میں نے ان کے علاوہ کسی کو اس کا ذکر کرتے ہوئے نہیں پایا ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” قبر بھینچتی ہے اگر کسی شخص کو اس سے نجات ملنی ہوتی ہے ، تو سعد بن معاذ کو اس سے نجات مل جاتی“ ۔
یہ روایت امام أحمد نے نافع کے حوالے سے سیدہ عائشہ رضی اللہ عنہا سے نقل کی ہے ، اور نافع کے حوالے سے ایک شخص کے حوالے سے سیدہ عائشہ رضی اللہ عنہا سے نقل کی ہے ۔ ان دونوں اسناد کے رجال ” صحیح“ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : ایک یہودی عورت میرے ہاں آئی اور میرے ساتھ قبر کے عذاب کے بارے میں بات چیت کرنے لگی سیدہ عائشہ رضی اللہ عنہا بیان کرتی ہیں : جب نبی اکرم صلی اللہ علیہ وسلم میرے ہاں تشریف لائے تو میں نے آپ کو اس عورت کے بیان کے بارے میں بتایا نبی اکرم صلی اللہ علیہ وسلم نے مجھے کوئی جواب نہیں دیا اس کے بعد آپ نے ارشاد فرمایا : اے عائشہ قبر کے عذاب سے اللہ کی پناہ مانگو کیونکہ اگر کسی کو اس سے نجات ملنی ہوتی تو سعد بن معاذ کو اس سے نجات مل جاتی ، لیکن اس نے بھینچنے سے زیادہ اور کچھ نہیں کیا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ایک طویل حدیث میں ذکر کی گئی ہے ، جو قبر کے عذاب سے متعلق ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا عبداللہ بن عباس رضی اللہ عنہما بیان کرتے ہیں : جس دن سیدنا سعد بن معاذ رضی اللہ عنہ کو دفن کیا گیا اس دن نبی اکرم صلی اللہ علیہ وسلم ان کی قبر کے پاس بیٹھے ہوئے تھے ۔ آپ نے ارشاد فرمایا : ” اگر کسی شخص کو قبر کی آزمائش سے ( راوی کو شک ہے شاید یہ الفاظ ہیں : ) قبر کے سوالات سے نجات ملنا ہوتی تو سعد بن معاذ کو مل جاتی اسے پہلے بھینچا گیا اور پھر اسے چھوڑ دیا گیا “
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کی صاحبزادی سیدہ زینب رضی اللہ عنہا کا انتقال ہو گیا ہم نبی اکرم صلی اللہ علیہ وسلم کے ساتھ نکلے ہم نے نبی اکرم صلی اللہ علیہ وسلم کو دیکھا کہ آپ انتہائی غمگین تھے ہم نے آپ کے ساتھ کوئی بات نہیں کی یہاں تک کہ آپ قبر کے پاس تشریف لے آئے ، تو ابھی وہاں لحد تیار نہیں ہوئی تھی ۔ نبی اکرم صلی اللہ علیہ وسلم تشریف فرما ہوئے ، ہم بھی آپ کے اردگرد بیٹھ گئے نبی اکرم صلی اللہ علیہ وسلم کچھ دیر اپنی سوچ میں رہے پھر آپ آسمان کی طرف دیکھنے لگے جب قبر تیار ہو گئی تو نبی اکرم صلی اللہ علیہ وسلم قبر میں اترے میں نے آپ کو دیکھا کہ آپ کے غم میں اضافہ ہو گیا تھا پھر جب آپ فارغ ہوئے اور اس سے باہر آئے تو میں نے آپ کو دیکھا کہ آپ کی پریشانی ختم ہو گئی اور آپ مسکرا رہے تھے ہم نے عرض کی : یا رسول اللہ ! پہلے ہم نے آپ کو دیکھا کہ آپ پریشان اور غمگین تھے ہم آپ کے ساتھ بات نہیں کر سکے پھر ہم نے آپ کو دیکھا کہ آپ کی یہ کیفیت ختم ہو گئی اس کی وجہ کیا ہے ؟ نبی اکرم صلی اللہ علیہ وسلم نے ارشاد فرمایا : میں قبر کی تنگی ، اور اس کے غم کو اور زینب کی کمزوری کے بارے میں سوچ رہا تھا ، تو یہ چیز مجھ پر گراں گزر رہی تھی پھر میں نے اللہ تعالیٰ سے دعا کی کہ وہ زینب کو تخفیف عطا کرے تو اللہ تعالی نے ایسا کیا البتہ قبر نے اسے ایک مرتبہ بھینچا اور اس کی آواز کو زمین و آسمان کے درمیان ہر چیز نے سنا صرف جنات اور انسانوں نے نہیں سنا ۔
یہ روایت امام طبرانی نے معجم اوسط اور معجم صغیر میں نقل کی ہے ، اور اس کی سند ضعیف ہے ۔

سیدنا ابوایوب انصاری رضی اللہ عنہ بیان کرتے ہیں : ایک بچے کو دفن کر دیا گیا ۔ نبی اکرم صلی اللہ علیہ وسلم نے ارشاد فرمایا : ” قبر کے بھینچنے سے اگر کسی کو نجات ملنی ہوتی تو اس بچے کو مل جاتی “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک بچے یا شاید ایک بچی کی نماز جنازہ ادا کی آپ نے ارشاد فرمایا : ” اگر کسی کو قبر کے بھینچنے سے نجات ملنی ہوتی تو اس بچے کو نجات مل جاتی“ ۔
یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ۔

نافع بیان کرتے ہیں : ہم سیدہ صفیہ بنت ابوعبید رضی اللہ عنہما کے پاس آئے ، تو انہوں نے ہمیں حدیث بیان کی کہ نبی اکرم صلی اللہ علیہ وسلم نے ارشاد فرمایا ہے : ” میں یہ سمجھتا ہوں کہ اگر کسی شخص کو قبر کے بھینچنے سے معافی ملنی ہوتی تو سعد بن معاذ اس سے بچ جاتا ، لیکن اسے بھی بھینچا گیا “ ۔
یہ روایت امام طبرانی نے معجم اوسط میں نقل کی ہے ، اور
یہ روایت ” مرسل “ ہے ۔ اس کی سند میں ایک راوی ایسا ہے ، جس سے میں واقف نہیں ہوں ۔