مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : انہوں نے خواب دیکھا کہ وہ سورت ” ص“ لکھ رہے ہیں جب وہ سجدے کے مقام پر پہنچے تو انہوں نے دیکھا کہ دوات قلم اور وہاں موجود ہر چیز سجدے میں چلی گئی ہے وہ بیان کرتے ہیں : میں نے یہ خواب نبی اکرم صلی اللہ علیہ وسلم کو سنایا تو اس کے بعد نبی اکرم صلی اللہ علیہ وسلم اس سورت میں ہمیشہ سجدہ تلاوت کیا کرتے تھے ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا ابوسعید خدری رضی اللہ عنہ بیان کرتے ہیں : میں نے خواب میں دیکھا کہ جیسے میں ایک درخت کے نیچے موجود ہوں اور وہ درخت سورت ” ص “ کی تلاوت کر رہا ہے ، جب وہ سجدے کے مقام پر پہنچا تو وہ سجدے میں چلا گیا اور اس نے سجدے میں یہ پڑھا : ” اے اللہ ! تو اس کی وجہ سے میری مغفرت کر دے اے اللہ ! تو اس کی وجہ سے میرے گناہوں کو ختم کر دے اور اس کی وجہ سے مجھے شکر نصیب فرما اور اسے میری طرف سے قبول فرما لے ، جس طرح تو نے اپنے بندے سیدنا داؤد سے ان کے سجدے کو قبول کیا تھا “ ۔ راوی کہتے ہیں : اگلے دن میں نبی اکرم صلی اللہ علیہ وسلم کی خدمت میں حاضر ہوا اور آپ کو اس بارے میں بتایا تو نبی اکرم صلی اللہ علیہ وسلم نے فرمایا : اے ابوسعید ! کیا تم نے سجدہ کیا تھا ؟ میں نے عرض کی : جی نہیں نبی اکرم صلی اللہ علیہ وسلم نے فرمایا : تو درخت کے مقابلے میں تم سجدہ کرنے کے زیادہ حق دار تھے پھر نبی اکرم صلی اللہ علیہ وسلم نے سورت ” ص “ تلاوت کی ، جب آپ سجدے کے مقام پر پہنچے تو آپ نے سجدے کے دوران وہی کلمات کہے ، جو درخت نے سجدے میں کہے تھے ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کیے ہیں : اس درخت نے یہ کہا: ” اے اللہ ! اس سجدے کی وجہ سے میرے لئے اجر کو نوٹ کر لے “ ۔ اس کے علاوہ باقی الفاظ حسب سابق ہیں اس کی سند میں ایک راوی یمان بن نصر ہے ۔ امام ذہبی کہتے ہیں : یہ مجہول ہے ۔

مسروق بیان کرتے ہیں : سیدنا عبداللہ بن مسعود رضی اللہ عنہ فرماتے ہیں یہ ایک نبی کی ، توبہ کا واقعہ ذکر ہوا ہے راوی کہتے ہیں : سیدنا عبداللہ بن مسعود رضی اللہ عنہ اس میں یعنی سورت ” ص “ میں سجدہ تلاوت نہیں کیا کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں اور صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سورت ” ص “ میں سجدہ تلاوت کیا ہے ۔
یہ روایت امام طبرانی نے معجم اوسط میں اور امام ابویعلیٰ نے نقل کی ہے ۔ اس کی سند میں ایک راوی محمد بن عمرو ہے ، جس کے بارے میں کلام کیا گیا ہے اس کی نقل کردہ حدیث حسن ہوتی ہے ۔

سیدنا عثمان غنی رضی اللہ عنہ کے بارے میں یہ بات مشہور ہے کہ انہوں نے سورت ” ص “ میں سجدہ تلاوت کیا تھا ۔
یہ روایت عبداللہ بن أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا علی رضی اللہ عنہ فرماتے ہیں : لازمی طور پر کیے جانے والے سجدے چار ہیں : وہ جو سورت الم تنزیل السجدہ میں ہے ، جو سورت «حم السجده» میں ہے ، جو سورت «نجم» میں ہے ، اور جو سورت« اقرا باسم ربك» میں ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حارث ہے ، اور وہ ضعیف ہے ۔

عبدالرحمن بن یزید اور عبدالرحمن بن اسود بیان کرتے ہیں : سیدنا عبداللہ بن مسعود رضی اللہ عنہ «حم * تَنْزِيلٌ من الرحمن الرحيم» کی پہلی آیت میں سجدہ تلاوت کیا کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم اپنے پاس سورت نجم تحریر کروا رہے تھے ، جب آپ سجدے کے مقام پر پہنچے تو آپ نے سجدہ کیا آپ کے ساتھ ہم نے بھی سجدہ کیا دوات اور قلم نے بھی سجدہ کیا ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا عبداللہ بن عمر رضی اللہ عنہ بیان کرتے ہیں : میں نے تین مرتبہ نبی اکرم صلی اللہ علیہ وسلم کے پیچھے اس طرح نماز ادا کی ہے کہ آپ نے فرض نماز میں آیت سجدہ تلاوت کی تھی ۔
یہ روایت امام أحمد نے نقل کی ہے ۔ اس کی سند میں ایک راوی جابر جعفی ہے ، جس کے بارے میں کلام کیا گیا ہے شعبہ اور ثوری نے اسے ” ثقہ “ قرار دیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم اور مسلمانوں نے سورت نجم میں سجدہ تلاوت کیا قریش سے تعلق رکھنے والے دو افراد نے ایسا نہیں کیا ان دونوں نے اس کے ذریعے مشہور ہونے کا ارادہ کیا تھا ۔
یہ روایت امام طبرانی نے معجم کبیر میں نقل کی ہے ، اور امام أحمد نے نقل کی ہے ، اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے سورت نجم کی تلاوت کی جب آپ سجدے کے مقام پر پہنچے تو آپ نے سجدہ کیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالرحمن بن بشر ہے ، اور وہ منکر الحدیث ہے ۔

سیدنا عمرو جنی رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس موجود تھا آپ نے سورت نجم کی تلاوت کی ، تو آپ نے سجدہ کیا میں نے بھی آپ کے ساتھ سجدہ کیا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ایسا ہے ، جو معروف نہیں ہے عثمان بن صالح نامی راوی کے بارے میں میرا یہ خیال نہیں ہے کہ اس نے صحابہ کرام میں سے کسی کا زمانہ پایا ہو باقی اللہ بہتر جانتا ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے مکہ مکرمہ میں سورت نجم کی تلاوت کی ، تو آپ نے سجدہ کیا آپ کے ساتھ لوگوں نے بھی سجدہ کیا یہاں تک کہ ایک شخص نے زمین سے کوئی چیز اٹھا کر اپنی پیشانی تک بلند کی اور اس پر سجدہ کر لیا اور ایک شخص نے دوسرے شخص پر سجدہ کیا ۔
( علامہ ہیثمی فرماتے ہیں : ) میں یہ کہتا ہوں : ان کے حوالے سے ” صحیح “ میں ایک حدیث منقول ہے ، جو اس سیاق کے بغیر ہے
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی مصعب بن ثابت ہے ، جسے ابن حبان اور دیگر حضرات نے ” ثقہ “ قرار دیا ہے ، جبکہ امام أحمد اور دیگر حضرات نے اسے ” ضعیف“ قرار دیا ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : جب انہوں نے لوگوں کے سامنے سورت نجم کی تلاوت کی ، تو انہوں نے اس میں سجدہ کیا ، اور جب انہوں نے اس کو نماز میں پڑھا تو انہوں نے اس میں رکوع کیا ، اور ( پھر ) سجدہ کیا ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں صرف محمد بن سیرین کا معاملہ مختلف ہے میرا نہیں خیال کہ انہوں نے سیدنا عبداللہ بن مسعود رضی اللہ عنہ سے سماع کیا ہو گا ۔

سیدنا عبدالرحمن بن عوف رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : میں نے آپ صلی اللہ علیہ وسلم کو سورت انشقاق میں سجدہ تلاوت کرتے ہوئے دس مرتبہ دیکھا ہے ۔
یہ روایت امام ابویعلیٰ نے اور امام بزار نے نقل کی ہے ۔ اس کی سند میں ایک راوی محمد بن ابولیلی ہے ، جس کے بارے میں کلام کیا گیا ہے ابوسلمہ نامی راوی نے اپنے والد سے سماع نہیں کیا ہے ۔

سیدنا صفوان بن عسال رضی اللہ عنہ بیان کرتے ہیں : نبی اکرم صلی اللہ علیہ وسلم نے سورت انشقاق میں سجدہ تلاوت کیا تھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یحیی بن عقبہ بن ابوعیزار ہے ، اور وہ انتہائی ضعیف ہے ۔

سیدنا عمر بن خطاب رضی اللہ عنہ کے بارے میں یہ بات منقول ہے : انہوں نے صبح کی نماز ادا کرتے ہوئے اس میں سورت انشقاق کی تلاوت کی اور اس میں سجدہ تلاوت کیا ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

اسود بن یزید بیان کرتے ہیں : میں نے سیدنا عبداللہ رضی اللہ عنہ اور سیدنا عمر رضی اللہ عنہ کو دیکھا ہے ( راوی کو شک ہے شاید یہ الفاظ ہیں : ) ان دونوں میں سے کسی ایک کو دیکھا ہے کہ وہ سورت انشقاق میں سجدہ تلاوت کر رہے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ، انہوں نے
یہ روایت سیدنا عبداللہ بن مسعود رضی اللہ عنہ کے حوالے سے کسی شک کے بغیر بھی نقل کی ہے ۔ اس کی سند میں ایک راوی لیث بن ابوسلیم ہے ، اور اس کے بارے میں کلام کیا گیا ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : وہ سورت «نجم» میں اور سورت «اقرا باسم ربك الذى خلق» میں سجدہ تلاوت کیا کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : جو شخص سورت اعراف سورت «نجم» اور سورت «اقرا باسم ربك الذى خلق» پڑھتا ہے ، تو اگر وہ چاہے ، تو اس کی ( آیت سجدہ تلاوت کرنے کے بعد ) رکوع میں چلا جائے تو یہ اس کی طرف سے کفایت کر جائے گا ، اور اگر وہ چاہے ، تو سجدہ کر لے پھر وہ کھڑا ہو کر کوئی اور سورت پڑھے پھر رکوع کرے اور سجدے میں جائے ۔

ان کے حوالے سے یہ روایت بھی منقول ہے : وہ فرماتے ہیں ، جو شخص سورت اعراف یا سورت «نجم» یا سورت «اقرا باسم ربك الذى خلق» یا سورت «انشقاق» یا سورت «بني اسرائيل» پڑھتا ہے ، تو اگر وہ چاہے ، تو اس کے آخر میں رکوع میں چلا جائے تو یہ اس کے لئے کفایت کر جائے گا کہ وہ سجدے کی جگہ رکوع میں چلا جائے اور اگر وہ سجدہ کر لے تو پھر وہ اس کے ساتھ دوسری سورت ملا لے یہ دونوں روایات امام طبرانی نے معجم کبیر میں نقل کی ہیں اور ان دونوں کے رجال ثقہ ہیں تاہم ابراہیم نامی راوی اور سیدنا عبداللہ بن مسعود رضی اللہ عنہ کے درمیان ان کی سند منقطع ہے ۔

سیدنا عبداللہ بن مسعود رضی اللہ عنہ فرماتے ہیں : جب سجدہ سورت کے آخر میں ہو ، تو اگر تم چاہو تو رکوع میں چلے جاؤ اور اگر چاہو تو سجدے میں چلے جاؤ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

ان کے حوالے سے یہ بات بھی منقول ہے : وہ فرماتے ہیں : جب سجدہ سورت کے آخر میں ہو ، تو اگر تم چاہو تو رکوع میں چلے جاؤ یا پھر سجدے میں چلے جاؤ سجدہ رکوع کے ساتھ ہی ہوتا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔