مجمع الزوائد ومنبع الفوائد

سیدنا ابوہریرہ رضی اللہ عنہ اور سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اگر مجھے یہ اندیشہ نہ ہوتا کہ میں اپنی امت کو مشقت کا شکار کر دوں گا ، تو میں انہیں ہر نماز کے وقت مسواک کرنے کا حکم دیتا “ ۔ ( علامہ ہیثمی فرماتے ہیں : ) میں یہ کہتا ہوں : سیدنا ابوہریرہ رضی اللہ عنہ کے حوالے سے منقول حدیث ” صحیح “ میں مذکور ہے ، اس روایت کو عبداللہ نے مسند أحمد کی زیادات میں نقل کیا ہے امام بزار نے صرف سیدنا علی رضی اللہ عنہ کے حوالے سے منقول حدیث روایت کی ہے ، اور انہوں نے اس روایت میں ” ہر نماز کے وقت “ کے الفاظ کے ہمراہ یہ الفاظ زائد نقل کیے ہیں : ” اور میں عشاء کی نماز کو ایک تہائی رات تک مؤخر کر دیتا جب رات کا پہلا ایک تہائی حصہ گزر جاتا ہے ، تو اللہ تعالی آسمان دنیا کی طرف اترتا ہے اور صبح صادق ہونے تک مسلسل وہاں رہتا ہے وہ یہ فرماتا ہے : کیا کوئی مانگنے والا ہے کہ اسے دیا جائے کیا کوئی دعا کرنے والا ہے کہ اس کی دعا قبول ہو کیا کوئی سفارش کرنے والا ہے کہ اس کی سفارش قبول ہو کیا کوئی توبہ کرنے والا ہے ، اور مغفرت طلب کرنے والا ہے کہ اس کی مغفرت ہو جائے “ ۔
اس روایت کے رجال ” ثقہ “ ہیں تاہم مسند میں ابواسحاق کے حوالے سے سیدنا عبیداللہ بن ابورافع کے حوالے سے معنعن روایت کے طور پر منقول ہے امام بزار نے اسے ابن اسحاق کے حوالے سے نقل کیا ہے ۔ وہ بیان کرتے ہیں : عبدالرحن بن یسار نے عبیداللہ بن ابورافع کے حوالے سے مجھے یہ حدیث بیان کی ہے عبدالرحمن نامی کو یحیی بن معین ” ثقہ “ قرار دیا ہے ۔

سیدہ ام حبیبہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اگر اس بات کا اندیشہ نہ ہوتا کہ میں اپنی امت کو مشقت کا شکار کر دوں گا ، تو میں انہیں ہر نماز کے وقت مسواک کرنے کا حکم دیتا “ ۔
یہ روایت امام أحمد اور امام ابویعلیٰ نے نقل کی ہے ، اور اس کے رجال ” ثقہ “ ہیں ۔

سیدہ زینب بنت جحش رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” اگر اس بات کا اندیشہ نہ ہوتا کہ میں اپنی امت کو مشقت کا شکار کر دوں گا ، تو میں انہیں ہر نماز کے وقت مسواک کرنے کا حکم دیتا جس طرح وہ ( ہر نماز کے وقت ) وضو کرتے ہیں “ ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

نبی اکرم صلی اللہ علیہ وسلم کے اصحاب میں سے ایک صاحب کے حوالے سے نبی اکرم صلی اللہ علیہ وسلم کا یہ فرمان منقول ہے : ” اگر اس بات کا اندیشہ نہ ہوتا کہ میں اپنی امت کو مشقت کا شکار کر دوں گا ، تو میں انہیں ہر نماز کے ساتھ مسواک کرنے کا حکم دیتا “ ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن زبیر رضی اللہ عنہما بیان کرتے ہیں : نبی اکرم صلی اللہ علیہ وسلم مسواک کرنے کا حکم دیتے تھے ۔
یہ روایت امام بزار نے اور امام طبرانی نے معجم کبیر میں نقل کی ہے ، اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” اگر اس بات کا اندیشہ نہ ہوتا کہ میں اپنی امت کو مشقت کا شکار کر دوں گا ، تو میں انہیں ہر نماز کے وقت مسواک کرنے کا حکم دیتا “ ۔
یہ روایت امام بزار نے نقل کی ہے ، اس کی سند میں ایک راوی معاویہ بن یحیی صدفی ہے ، اور وہ ” ضعیف“ ہے ۔

سیدنا عبداللہ بن عباس رضی اللہ عنہا روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اگر اس بات کا اندیشہ نہ ہوتا کہ تم ایسا نہیں کر پاؤ گے ، تو میں تمہیں ہر نماز کے ساتھ مسواک کرنے کا حکم دیتا“ ۔
یہ روایت امام بزار نے نقل کی ہے امام طبرانی نے معجم کبیر میں اسے مسلم بن کیسان ملائی کے حوالے سے روایت کیا ہے ، اور وہ ” ضعیف “ ہے امام بزار فرماتے ہیں : اس میں کوئی حرج نہیں ہے ۔

سیدنا عباس بن عبدالمطلب رضی اللہ عنہ بیان کرتے ہیں : لوگ نبی اکرم صلی اللہ علیہ وسلم کی خدمت میں حاضر ہوئے انہوں نے مسواک نہیں کی ہوئی تھی نبی اکرم صلی اللہ علیہ وسلم نے ارشاد فرمایا تم لوگ مسواک کیے بغیر میرے پاس آ گئے ہو تم لوگ مسواک کرو اگر اس بات کا اندیشہ نہ ہوتا کہ میں اپنی امت کو مشقت کا شکار کر دوں گا ، تو میں ان پر ہر نماز کے ساتھ مسواک کرنا لازم قرار دیتا جس طرح میں نے ان پر وضو کو لازم قرار دیا ہے ۔
یہ روایت امام بزار نے اور امام طبرانی نے معجم کبیر میں نقل کی ہے امام ابویعلیٰ نے اس کی مانند روایت نقل کی ہے ، اور اس کے آخر میں یہ الفاظ زائد نقل کیے ہیں : ” سیدہ عائشہ رضی اللہ عنہا فرماتی ہیں : نبی اکرم صلی اللہ علیہ وسلم مسلسل مسواک کا ذکر کرتے رہے ، یہاں تک کہ ہمیں یہ اندیشہ ہوا کہ اس کے بارے میں قرآن نازل ہو جائے گا“ ۔ اس روایت کی سند میں ایک راوی ابوعلی صیقل ہے ۔ ابن سکن اور دیگر حضرات نے یہ کہا: ہے : یہ مجہول ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اگر اس بات کا اندیشہ نہ ہوتا کہ میں اپنی امت کو مشقت کا شکار کر دوں گا ، تو میں انہیں ہر نماز کے وقت مسواک کرنے کا حکم دیتا“ ۔
یہ روایت امام طبرانی نے معجم کبیر میں اور معجم اوسط میں نقل کی ہے ، اس کی سند میں ایک راوی سعید بن راشد ہے ، اور وہ ” ضعیف “ ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اگر اس بات کا اندیشہ نہ ہوتا کہ یہ سنت ہو جائے گی تو میں ہر نماز کے وقت مسواک کرنے کا حکم دیتا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ارطاۃ ابوحاتم ہے میں نے کسی کو اس کا ذکر کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔

سیدہ عائشہ صدیقہ رضی اللہ عنہا بیان کرتی ہیں : ہم نبی اکرم صلی اللہ علیہ وسلم کے ، طہارت کے پانی کے ہمراہ مسواک بھی رکھ دیتے تھے سیدہ عائشہ رضی اللہ عنہا بیان کرتی ہیں : میں نے عرض کی : یا رسول اللہ ! آپ مسواک کو ترک نہیں کرتے ہیں ۔ نبی اکرم صلی اللہ علیہ وسلم نے ارشاد فرمایا : جی ہاں ! اگر میرے لئے یہ ممکن ہوتا کہ میں ہر دو رکعات کے بعد مسواک کر سکتا تو میں ایسا بھی کرتا ۔
یہ روایت امام ابویعلیٰ نے نقل کی ہے ، اس کی سند میں ایک راوی سری بن اسماعیل ہے ، اور وہ متروک ہے ۔

نبی اکرم صلی اللہ علیہ وسلم کی زوجہ محترمہ سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” مسواک کے ساتھ نماز ادا کرنے کو مسواک کے بغیر نماز ادا کرنے پر ستر درجہ فضیلت حاصل ہے “ ۔
یہ روایت امام أحمد نے اور امام بزار اور امام ابویعلیٰ نے نقل کی ہے امام حاکم رحمہ اللہ نے اس روایت کو صحیح قرار دیا ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” مسواک کے ساتھ دو رکعات ادا کرنا مسواک کے بغیر ستر رکعات سے زیادہ فضیلت رکھتا ہے “ ۔
یہ روایت امام بزار نے نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” مجھے مسواک کا حکم دیا گیا یہاں تک کہ میں نے یہ گمان کیا کہ اس کے بارے میں مجھ پر قرآن نازل ہو جائے گا ( راوی کو شک ہے شاید یہ الفاظ ہیں : ) وحی نازل ہو جائے گی “ ۔
یہ روایت امام ابویعلیٰ نے نقل کی ہے ۔

سیدنا عبداللہ بن عباس رضی اللہ عنہما کے حوالے سے امام أحمد نے یہ روایت نقل کی ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے مسواک کا حکم دیا گیا یہاں تک کہ مجھے یہ اندیشہ ہوا کہ اس کے بارے میں میری طرف وحی کی جائے گی “ ۔
اس روایت کے رجال ” ثقہ “ ہیں ۔

یہ روایت امام طبرانی نے معجم اوسط میں ان الفاظ میں نقل کی ہے : ” مجھے مسواک کا حکم دیا گیا یہاں تک کہ مجھے اپنے دانتوں کے بارے میں اندیشہ ہوا “ ۔ اس روایت کی سند میں ایک راوی عطاء بن سائب ہے
یہ روایت امام طبرانی نے معجم کبیر میں نقل کی ہے ، اور اس کی سند میں بھی عطاء بن سائب ہے ۔

سیدنا واثلہ بن اسقع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے مسواک کرنے کا حکم دیا گیا یہاں تک کہ مجھے یہ اندیشہ ہوا کہ یہ مجھ پر لازم قرار دے دی جائے گی “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی لیث بن ابوسلیم ہے وہ ” ثقہ “ اور تدلیس کرنے والا ہے ، اس نے عنعنہ کے ساتھ یہ روایت نقل کی ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم جب بھی سوتے تھے تو مسواک آپ کے پاس ہوتی تھی اور جب آپ بیدار ہوتے تھے تو سب سے پہلے مسواک کرتے تھے ۔
یہ روایت امام أحمد اور امام ابویعلیٰ نے نقل کی ہے ، اس کے بعض طرق میں یہ الفاظ ہیں : ” نبی اکرم صلی اللہ علیہ وسلم رات کے جس بھی حصے میں بیدار ہوتے تھے تو آپ مسواک کیا کرتے تھے “ ۔ امام طبرانی نے معجم کبیر میں یہ روایت اسی طرح نقل کی ہے ، اس کی سند ضعیف ہے ، اس کے بعض طرق میں ایسا راوی ہے ، جس کا نام بیان نہیں کیا گیا بعض طرق میں حسام بن مصک نامی راوی ہے ، اور دیگر راوی بھی ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے مسواک کرنے کا حکم دیا گیا یہاں تک کہ مجھے یہ اندیشہ ہوا کہ مجھے درد ہو گا ( راوی کو شک ہے شاید یہ الفاظ ہیں : ) یہاں تک کہ مجھے اپنے مسوڑھوں اور دانتوں کے بارے میں اندیشہ ہوا “ ۔
یہ روایت امام بزار نے نقل کی ہے ، اس کی سند میں ایک راوی عمران بن خالد ہے ، اور وہ ضعیف “ ہے ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جبرائیل نے مجھے مسواک کرنے کی ہدایت کی یہاں تک کہ میں نے یہ گمان کیا کہ مجھے درد ہو گا “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عبیداللہ بن واقد ہے ، اور وہ ” ضعیف “ ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جبرائیل مجھے مسلسل مسواک کی تلقین کرتے رہے ، یہاں تک کہ مجھے اپنی داڑھوں کے بارے میں اندیشہ ہوا “ ۔
یہ روایت امام طبرانی نے معجم کبیر میں نقل کی ہے ، اس کے رجال کی توثیق کی گئی ہے ، اس کے بعض راویوں کے بارے میں اختلاف پایا جاتا ہے ۔

سیدنا علی رضی اللہ عنہ کے بارے میں یہ بات منقول ہے : انہوں نے مسواک کرنے کا حکم دیا یہ بات بیان کی کہ نبی اکرم صلی اللہ علیہ وسلم نے یہ ارشاد فرمایا ہے : ” بندہ جب مسواک کر کے نماز ادا کرنے کے لئے کھڑا ہوتا ہے ایک فرشتہ اس کے پیچھے کھڑا ہو جاتا ہے ، اور اس کی قرأت کو غور سے سنتا ہے وہ اس شخص کے قریب ہو جاتا ہے ( یا اس کی مانند کوئی اور کلمہ راوی نے نقل کیا ) یہاں تک کہ وہ فرشتہ اپنا منہ اس شخص کے منہ پر رکھ دیتا ہے ، تو اس شخص کے منہ سے قرآن کا جو بھی حصہ نکلتا ہے وہ فرشتے کے اندر چلا جاتا ہے ، تو تم قرآن کے لئے اپنے مونہوں کو پاک و صاف رکھو “ ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس کا کچھ حصہ نقل کیا ہے ، تاہم وہ روایت ” موقوف “ ہے ، اور یہ ” مرفوع “ ہے ۔

سیدنا عمرو بن حریث رضی اللہ عنہ بیان کرتے ہیں : نبی اکرم صلی اللہ علیہ وسلم بعض اوقات نماز میں اپنی داڑھی کو چھو لیتے تھے ۔
یہ روایت امام ابویعلیٰ نے نقل کی ہے ، اس کی سند میں ایک راوی محمد بن خطاب ہے ، اور وہ ” ضعیف “ ہے امام ابن حبان رحمہ اللہ نے اس کا ذکر کتاب ” الثقات “ میں کیا ہے ۔

ملیح بن عبداللہ خطمی نے اپنے والد کے حوالے سے اپنے دادا کا یہ بیان نقل کی ہے : نبی اکرم صلی اللہ علیہ وسلم نے ارشاد فرمایا ہے : ” پانچ چیزیں رسولوں کی سنت ہیں حیاء بردباری پچھنے لگوانا مسواک کرنا اور عطر لگانا “ ۔
یہ روایت امام بزار نے نقل کی ہے ملیح ، اس کے والد اور اس کے دادا کے حالات کا ذکر کرتے ہوئے میں نے کسی کو نہیں پایا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” میں نے مسواک کو لازم پکڑا یہاں تک کہ یہ اندیشہ ہوا کہ میرے دانت ختم ہو جائیں گے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم رات کو جب سونے لگتے تھے یا جب بھی رات کو بیدار ہوتے تھے تو مسواک کرتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ایسا ہے ، جس کا ذکر کرتے ہوئے میں نے کسی کو نہیں پایا ہے یہ روایت امام أحمد نے سیدنا ابوہریرہ رضی اللہ عنہ کے فعل کے طور پر نقل کی ہے ، اس کی سند میں ایک راوی محمد بن عمرو ہے ، اور وہ ضعیف ہے ، اس کے بارے میں اختلاف کیا گیا ہے ۔

سیدنا زید بن خالد جہنی رضی اللہ عنہ بیان کرتے ہیں : نبی اکرم صلی اللہ علیہ وسلم نماز وغیرہ کی ادائیگی کے لئے گھر سے نکلنے سے پہلے مسواک کیا کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا ابوایوب رضی اللہ عنہ بیان کرتے ہیں : نبی اکرم صلی اللہ علیہ وسلم رات میں کئی مرتبہ مسواک کر لیتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی واصل بن سائب ہے ، اور وہ ” ضعیف “ ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم بعض اوقات رات میں چار مرتبہ مسواک کر لیتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی موسیٰ بن مطیر ہے ، اور وہ انتہائی ” ضعیف “ ہے ۔

یزید بن اصم نے سیدہ میمونہ رضی اللہ عنہا کے حوالے سے یہ بات نقل کی ہے : یزید اُن کے ہاں یتیم کے طور پر زیر پرورش رہے تھے انہوں نے یہ بات ذکر کی ہے کہ ایک مسواک ہر وقت برتن میں موجود رہتی تھی اگر وہ کسی کام میں مصروف ہونے لگتی تھیں ، یا نماز ادا کرنے لگتی تھیں ، تو وہ مسواک لے کر مسواک کر لیتی تھیں ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔ ( علامہ ہیثمی فرماتے ہیں : ) میں یہ کہتا ہوں : مسواک کے بارے میں بہت سی احادیث طہارت سے متعلق باب میں گزر چکی ہیں دیگر احادیث زینت سے متعلق باب میں آگے آئیں گی اگر اللہ نے چاہا ۔