مجمع الزوائد ومنبع الفوائد

سیدنا معاذ بن انس رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” نماز کے دوران ہنسنے والا ادھر ادھر دیکھنے والا انگلیاں چٹخانے والا ایک ہی شخص کے حکم میں ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے یہ روایت زبان بن فائد سے منقول ہے ، اور وہ ” ضعیف “ ہے ۔

سیدنا ابوہریرہ رضی اللہ عنہ بیان کرتے ہیں : میرے خلیل صلی اللہ علیہ وسلم نے مجھے تین باتوں کا حکم دیا تھا اور مجھے تین باتوں سے منع کیا تھا آپ نے مجھے مرغ کے ٹھونگا مارنے کی طرح ٹھونگا مارنے سے ، کتے کے اقعاء کے طور پر بیٹھنے کی طرح اقصاء کے طور پر بیٹھنے سے اور لومڑی کے ادھر ادھر دیکھنے کی طرح ادھر اُدھر دیکھنے سے منع کیا تھا
یہ روایت امام أحمد نے اور امام ابویعلیٰ نے اور امام طبرانی نے معجم اوسط میں نقل کی ہے امام أحمد کی سند حسن ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص نماز کے لئے کھڑا ہو تو اللہ تعالیٰ اس کی طرف متوجہ ہوتا ہے ، جب وہ شخص اِدھر اُدھر دیکھتا ہے ، تو اللہ تعالی فرماتا ہے : اے ابن آدم ! تم کس کی طرف دیکھ رہے ہو ؟ کیا وہ کوئی ایسا ہے ، جو تمہارے لئے مجھ سے زیادہ بہتر ہے ؟ تم میری طرف متوجہ رہو جب وہ شخص دوسری مرتبہ ادھر اُدھر دیکھتا ہے ، تو اللہ تعالیٰ پھر اس کی مانند ارشاد فرماتا ہے ، جب وہ شخص تیسری مرتبہ ادھر ادھر دیکھتا ہے ، تو اللہ تعالٰی اس سے اپنا چہرہ پھیر لیتا ہے “ ۔
یہ روایت امام بزار نے نقل کی ہے ، اس کی سند میں ایک راوی فضل بن عیسیٰ رقاشی ہے ، جس کے ضعیف ہونے پر محدثین کا اتفاق ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بندہ جب نماز کے لئے کھڑا ہوتا ہے ( راوی کہتے ہیں : میرا خیال ہے روایت میں یہ الفاظ ہیں : ) رحمان کے سامنے ہوتا ہے ، جب وہ ادھر ادھر دیکھتا ہے ، تو اللہ تعالیٰ فرماتا ہے : تم کس کی طرف دیکھ رہے ہو ؟ کیا مجھ سے بہتر کی طرف دیکھ رہے ہو ؟ اے ابن آدم ! میری طرف متوجہ رہو ! کیونکہ میں ہر اس چیز سے زیادہ بہتر ہوں جس کی طرف تم دیکھتے ہو “ ۔
یہ روایت امام بزار نے نقل کی ہے ، اس کی سند میں ایک راوی ابراہیم بن یزید خوزی ہے ، اور وہ ” ضعیف“ ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی شخص نماز ادا کرنے کے لئے کھڑا ہو تو نماز سے فارغ ہونے تک وہ نماز کی طرف متوجہ رہے تم لوگ نماز کے دوران ادھر ادھر دیکھنے سے اجتناب کرو کیونکہ آدمی جب تک نماز کی حالت میں ہوتا ہے وہ اپنے پروردگار کی بارگاہ میں مناجات کر رہا ہوتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی واقدی ہے ، اور وہ ” ضعیف“ ہے ۔

سیدنا عبداللہ بن سلام رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” نماز کے دوران ادھر اُدھر نہ دیکھو کیونکہ ادھر اُدھر دیکھنے والے کی نماز نہیں ہوتی ہے “ ۔
یہ روایت امام طبرانی نے تینوں کتابوں میں ذکر کی ہے ، اس کی سند میں ایک راوی صلت بن یحیی ہے ، جو امام طبرانی کی معجم کی روایت میں ہے ازدی نے اسے ضعیف قرار دیا ہے معجم صغیر اور معجم اوسط کی روایت میں ایک راوی صلت بن ثابت ہے ، اور یہ وہم ہے یہ شخص اصل میں صلت بن طریف ہے ۔ امام ذہبی نے اس کا ذکر ” میزان الاعتدال “ میں کیا ہے انہوں نے اس کے حوالے سے پہ حدیث ذکر کی ہے امام دارقطنی رحمہ اللہ کہتے ہیں : اس کی نقل کردہ حدیث میں اضطراب پایا جاتا ہے ، باقی اللہ بہتر جانتا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم پہلے نماز کے دوران دائیں بائیں توجہ کر لیتے تھے پھر اللہ تعالیٰ نے یہ آیت نازل کر دی : ” مؤمنین کامیاب ہو گئے وہ لوگ جو اپنی نماز میں خشوع اختیار کرتے ہیں “ ۔ تو اس کے بعد نبی اکرم صلی اللہ علیہ وسلم خشوع کے ساتھ رہتے تھے ، اور دائیں بائیں توجہ نہیں دیتے تھے ۔
یہ روایت امام طبرانی نے معجم اوسط میں نقل کی ہے وہ بیان کرتے ہیں : حبرہ بن نجم اسکندرانی نامی رادی اسے نقل کرنے میں منفرد ہے ۔ ( علامہ ہیثمی فرماتے ہیں : ) میں یہ کہتا ہوں : میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔

سیدنا ابودرداء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص وضو کرتے ہوئے اچھی طرح وضو کرے اور پھر دو رکعات ادا کرے اور اپنے پروردگار سے دعا کرے تو اس کی دعا مستجاب ہوتی ہے خواہ جلدی ہو جائے یا ذرا تاخیر سے ہو اور تم لوگ نماز کے دوران ادھر ادھر توجہ کرنے سے بچ کے رہو کیونکہ ادھر اُدھر توجہ کرنے والے کی نماز نہیں ہوتی ہے اگر مجبور ہو جاؤ تو نفل میں ایسا کر لو لیکن فرض میں ایسا نہ کرنا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عطاء بن عجلان ہے ، اور وہ ” ضعیف “ ہے ۔

سیدنا ابودرداء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص نماز ادا کرنے کے لئے کھڑا ہوتا ہے ، اور ادھر ادھر دیکھتا ہے اللہ تعالی اس کی نماز مسترد کر دیتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یوسف بن عطیہ ہے ، اور وہ ” ضعیف“ ہے ۔

سیدنا عبداللہ بن مسعود رضی اللہ عنہ فرماتے ہیں : اللہ تعالیٰ بندے کی طرف متوجہ رہتا ہے ، جب تک بندہ ادھر ادھر نہیں دیکھتا ، یا اسے حدث لاحق نہیں ہوتا ۔
یہ روایت امام طبرانی نے معجم کبیر میں نقل کی ہے ابوقلابہ نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے ۔

سیدنا خوات بن جبیر رضی اللہ عنہ بیان کرتے ہیں : میں نماز ادا کر رہا تھا میرے پیچھے سے کسی صاحب نے کہا: مختصر نماز ادا کرنا ، کیونکہ ہمیں تم سے ایک کام ہے میں نے مڑ کر دیکھا تو وہ نبی اکرم صلی اللہ علیہ وسلم تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبداللہ زید بن اسلم ہے ، جسے یحیی بن معین اور دیگر حضرات نے ضعیف قرار دیا ہے ، اور ابوحاتم اور معن بن عیسیٰ نے اسے ” ثقہ “ قرار دیا ہے ابوداؤد کہتے ہیں : یہ اپنے بھائی کی مانند ہے ۔