مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم کے پیچھے نماز ادا کی وہ نبی کرم صلی اللہ علیہ وسلم کے رکوع میں جانے سے پہلے رکوع میں چلا جاتا تھا اور آپ کے اٹھنے سے پہلے اٹھ جاتا تھا جب نبی اکرم صلی اللہ علیہ وسلم نے نماز مکمل کی تو آپ نے دریافت کیا : ایسا کس شخص نے کیا ہے ، اس نے عرض کی : یا رسول اللہ ! میں نے ، میں یہ چاہتا تھا کہ مجھے یہ پتہ چل جائے کہ آپ کو اس بات کا پتہ چلتا ہے کہ نہیں چلتا ہے ؟ نبی اکرم صلی اللہ علیہ وسلم نے ارشاد فرمایا : تم نماز کے نقص سے بچ کے رہو جب امام رکوع میں جائے تو تم رکوع میں جاؤ جب وہ رکوع سے اٹھے تو تم لوگ اٹھو !
یہ روایت امام أحمد نے اور امام طبرانی نے معجم اوسط میں نقل کی ہے ، اس کی سند میں ایک راوی ایوب بن جابر ہے امام أحمد کہتے ہیں : اس کی نقل کردہ حدیث اہل صدق کی نقل کردہ حدیث سے مشابہت رکھتی ہے ۔ ابن عدی کہتے ہیں : یہ حدیث کا ایک حصہ دوسرے کے ساتھ ملا دیتا ہے یحیی بن معین اور ایک جماعت نے اسے ضعیف قرار دیا ہے ۔

سیدنا ابن مسعدہ صاحب الجیش رضی اللہ عنہ بیان کرتے ہیں : میں نے اللہ کے رسول صلی اللہ علیہ وسلم کو یہ ارشاد فرماتے ہوئے سنا : ” میرا جسم بھاری ہو گیا ہے ، تو جس شخص سے میرا رکوع رہ جائے تو وہ میرے کھڑے ہونے تک اس کو پا لے ( یہاں ایک لفظ کے بارے میں ) راوی کو شک ہے ، تاہم اس کا مفہوم یہی ہے “ ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں تاہم سیدنا ابن مسعدہ رضی اللہ عنہ سے اس کو نقل کرنے والا راوی عثمان بن ابوسلیمان ہے ، اس نے زیادہ تر روایات تابعین سے نقل کی ہیں باقی اللہ بہتر جانتا ہے ۔

سیدنا انس بن مالک رضی اللہ عنہ فرماتے ہیں : ہم میں سے کوئی ایک شخص نبی اکرم صلی اللہ علیہ وسلم کے پیچھے نماز ادا کرتے ہوئے اپنی پشت سیدھی کرتا تھا تو اتنی دیر میں نبی اکرم صلی اللہ علیہ وسلم سجدے میں مکمل طور پر جا چکے ہوتے تھے ، راوی کو شک ہے شاید یہ الفاظ ہیں : اس وقت نبی اکرم صلی اللہ علیہ وسلم سجدے میں زمین تک پہنچ چکے ہوتے تھے ۔
یہ روایت امام ابویعلیٰ نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم جب سجدہ کرتے تھے تو ہم میں سے کوئی ایک اس وقت تک سجدہ نہیں کرتا تھا جب تک وہ آپ کو دیکھ نہیں لیتا تھا کہ آپ سجدے میں جا چکے ہیں ۔
یہ روایت امام بزار نے نقل کی ہے امام ابویعلیٰ نے اس کی مانند نقل کی ہے امام بزار کی روایت میں ایک راوی سعید بن مفضل ہے ، جسے ابوحاتم نے ضعیف قرار دیا ہے ، اور دیگر حضرات نے اسے ” ثقہ “ قرار دیا ہے امام ابویعلیٰ کی نقل کردہ روایت اعمش اور سیدنا انس رضی اللہ عنہ کے درمیان منقطع ہے ۔

سیدنا نعمان بن بشیر رضی اللہ عنہ فرماتے ہیں : جب ہم نبی اکرم صلی اللہ علیہ وسلم کی اقتداء میں نماز ادا کرتے تھے ، اور آپ سمعع اللہ لمن حمدہ پڑھ کر ( رکوع سے کھڑے ہو جاتے تھے ) تو ہم میں سے کوئی ایک شخص اپنی پشت کو اس وقت تک نہیں جھکاتا تھا جب تک وہ نبی اکرم صلی اللہ علیہ وسلم کو دیکھ نہیں لیتا تھا کہ آپ سجدے میں جا چکے ہیں ۔
یہ روایت امام بزار نے نقل کی ہے ، اس کی سند میں ایک راوی مفضل بن صدقہ ہے ، اور وہ ” ضعیف “ ہے ۔

سیدنا جبیر بن مطعم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میرا جسم بھاری ہو چکا ہے ، تو تم نماز میں قیام رکوع اور سجدے میں مجھ سے آگے نہ نکلو “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم رکوع میں اپنے امام سے سبقت نہ لے جاؤ کیونکہ تم لوگ اس کے پاس اس وقت پہنچ جاؤ گے جب وہ تم سے آگے جائے گا “ ۔
یہ روایت امام بزار نے نقل کی ہے امام طبرانی نے معجم کبیر میں نقل کی ہے ، اس کی سند میں ایک راوی اسماعیل بن مسلم مکی ہے ، اور وہ ” ضعیف “ ہے ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم نماز میں کھڑے ہو ، تو رکوع سجدے اور قیام میں اپنے قاری ( یعنی امام ) سے آگے نہ نکلو بلکہ تمہارے قاری ( یعنی امام ) کو تم سے پہلے کام کرنا چاہیے وہ تم سے پہلے جس میں معاملے میں چلا جائے گا تم اس تک پہنچ جاؤ گے جب وہ رکوع یا سجود سے سر اٹھا رہا ہو گا یا قیام کر رہا ہو گا ، تو وہ جو بھی تم سے پہلے کرے گا تم اس وقت اپنے قاری کے پاس پہنچ جاؤ گے “ ۔
یہ روایت امام طبرانی نے معجم کبیر میں طویل روایت کے طور پر نقل کی ہے امام بزار نے اس کا کچھ حصہ نقل کیا ہے اور یہ روایت ” ضعیف “ ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب امام تکبیر کہے ، تو تم بھی تکبیر کہو جب وہ رکوع کرے تو تم بھی رکوع کرو جب وہ سجدہ کرے تو تم بھی سجدہ کرو جب وہ رکوع سے سر اٹھائے تو تم بھی اٹھاؤ جب وہ بیٹھ کر نماز ادا کرے تو تم لوگ بھی بیٹھ کر نماز ادا کرو “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عفیر بن معدان ہے ، اور وہ ” ضعیف “ ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص امام سے پہلے جھکتا ہے یا اٹھتا ہے ، اس کی پیشانی شیطان کے ہاتھ میں ہوتی ہے “ ۔
یہ روایت امام بزار نے اور امام طبرانی نے معجم اوسط میں نقل کی ہے ، اس کی سند حسن ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص امام سے پہلے اپنا سر اٹھا لیتا ہے کیا وہ اس بات سے محفوظ سمجھتا ہے کہ اللہ تعالی اس کے سر کو ، کتے کے سر سے تبدیل کر دے ؟ “ میں یہ کہتا ہوں : یہ حدیث ” صحیح “ میں مذکور ہے تاہم اس میں یہ الفاظ نہیں ہیں ” کتے کا سر “ ۔
یہ روایت امام طبرانی نے معجم اوسط میں نقل کی ہے ۔

انہوں نے سیدنا ابوہریرہ رضی اللہ عنہ کے حوالے سے یہ بات نقل کی ہے : ” وہ شخص جو امام سے پہلے سر اٹھاتا ہے ، یا رکھتا ہے “ ۔ پہلی روایت کے رجال ” ثقہ “ ہیں صرف امام طبرانی کے استاد عباس بن ربیع بن تغلب کا معاملہ مختلف ہے کیونکہ میں نے کسی کو اس کے حالات بیان کرتے ہوئے نہیں پایا ہے ۔

سیدنا عبداللہ بن مسعود رضی اللہ عنہ فرماتے ہیں : امام کو اس لئے مقرر کیا گیا ہے تاکہ اس کی پیروی کی جائے جب وہ رکوع میں جائے تو تم بھی رکوع میں جاؤ جب وہ سر اٹھائے تو تم بھی اٹھاؤ تم اس سے سبقت نہ لے جاؤ جب وہ رکوع میں جائے یا سر کو اٹھائے یا سجدے میں جائے کیونکہ اگر تم اس حالت میں ہو گے ، تو تم اس تک اس وقت پہنچ جاؤ گے جس میں وہ تم سے سبقت لے جا چکا ہو گا وہ تم سے پہلے سجدہ کرے اور تم سے پہلے سر کو اٹھائے گا ، تو تم اس تک پہنچ جاؤ گے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

ابواحوص بیان کرتے ہیں : سیدنا عبداللہ بن مسعود رضی اللہ عنہ فرماتے ہیں : جب تم امام کے پیچھے ہو ، تو تم اس وقت تک رکوع نہ کرو جب تک وہ رکوع نہیں کر لیتا اور اس وقت تک سجدہ نہ کرو جب تک وہ سجدہ نہیں کر لیتا اور تم اس سے پہلے اپنے سر کو نہ اٹھاؤ جب امام ( نماز ادا کر کے ) فارغ ہو چکا ہو اور نہ ہی وہ اٹھا ہو اور نہ ہی وہ اپنی جگہ سے مڑا ہو اور تمہیں کوئی کام ہو ، تو تم چلے جاؤ اور اسے چھوڑ دو کیونکہ تمہاری نماز مکمل ہو چکی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا عبدالله رضی اللہ عنہ فرماتے ہیں : جو شخص امام سے پہلے اپنا سر اٹھا لیتا ہے کیا وہ اس بات سے ( خود کو ) محفوظ سمجھتا ہے کہ اس کے سر کو کتے کے سر میں تبدیل کر دیا جائے لوگ اپنی نگاہیں آسمان کی طرف اٹھانے سے یا تو باز آ جائیں گے یا ان کی بینائی اچک لی جائے گی ۔
یہ روایت امام طبرانی نے معجم کبیر میں ایسی اسانید کے ساتھ نقل کی ہے جن میں سے کچھ اسناد کے رجال ” ثقہ “ ہیں ۔

سیدنا عبداللہ بن یزید رضی اللہ عنہ کے بارے میں یہ بات منقول ہے : وہ یہاں لوگوں کو نماز پڑھا رہے تھے لوگ ان کے سر رکھنے سے پہلے اپنے سر رکھ رہے تھے ، اور ان کے سر کو اٹھانے سے پہلے اپنے سر اٹھا رہے تھے جب انہوں نے نماز مکمل کی تو لوگوں کی طرف متوجہ ہو کر بولے : اے لوگو ! تم لوگوں نے امام کیوں مقرر کیا ہے ، اور تم کیوں مقتدی بنے ہو میں تم لوگوں کو نبی اکرم صلی اللہ علیہ وسلم کے طریقے کے مطابق نماز پڑھا رہا ہوں ، اور میں اس کے حوالے سے کوئی کوتاہی نہیں کر رہا ہوں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن موسیٰ انصاری ہے ، جو ابونعیم کا استاد ہے میں نے کسی کو اس کا ذکر کرتے ہوئے نہیں پایا ہے ، اس کے بقیہ رجال ” صحیح “ کے رجال ہیں ۔