مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : جماعت ترک کرنے کی رخصت صرف اس شخص کو دی گئی ہے ، جو خوف کا شکار ہو یا جو بیمار ہو ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یوسف بن عطیہ باہلی ہے ، اور وہ ” ضعیف “ ہے ۔

سیدنا سلمہ بن اکوع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب رات کا کھانا آ جائے ، نماز اور کھانا اکھٹے آ جائیں تو پہلے تم کھانا کھا لو “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی ایوب بن عقبہ ہے ، جسے ایک روایت کے مطابق امام أحمد نے اور یحیی بن معین نے ” ثقہ “ قرار دیا ہے ، اسے امام نسائی رحمہ اللہ نے ضعیف قرار دیا ہے ، اور ایک روایت کے مطابق امام أحمد اور یحیی بن معین نے بھی ضعیف قرار دیا ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جب رات کا کھانا آ جائے اور نماز کا وقت بھی ہو گیا ہو تو پہلے کھانا کھا لو “ ۔
یہ روایت امام أحمد امام ابویعلیٰ نے اور امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں انہوں نے ایک دوسرے سے سماع کیا ہے ۔

سیدنا عبداللہ بن عباس رضی اللہ عنہما ” مرفوع “ حدیث کے طور پر یہ بات نقل کرتے ہیں : آپ صلی اللہ علیہ وسلم نے ارشاد فرمایا : ” جب رات کا کھانا آ جائے اور عشاء کی نماز کھڑی ہو چکی ہو تو پہلے کھانا کھا لو “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب رات کا کھانا آ جائے اور رات کی نماز کھڑی ہو چکی ہو ، تو پہلے کھانا کھا لو “ ۔
یہ روایت امام طبرانی نے معجم اوسط اور معجم صغیر میں نقل کی ہے ، اس کی سند میں ایک راوی اسماعیل بن عمرو بجلی ہے ، جسے ابوحاتم نے ضعیف قرار دیا ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب نماز کھڑی ہو چکی ہو اور کسی شخص نے روزہ رکھا ہو تو اسے مغرب کی نماز سے پہلے کھانا کھا لینا چاہیے تم اپنے رات کے کھانے کے حوالے سے تاخیر نہ کرو “ ۔ میں یہ کہتا ہوں : یہ روایت ” صحیح “ میں منقول ہے ، تاہم اس میں یہ الفاظ نہیں ہیں : ” اور تم میں سے کوئی ایک شخص روزہ دار ہو “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے غزوہ خیبر کے موقع پر بارش کے دن یہ ارشاد فرمایا : نماز رہائشی جگہ پر ادا کی جائے گی ۔
یہ روایت امام أحمد نے اور امام طبرانی نے معجم کبیر میں اور امام بزار نے اس کی مانند نقل کی ہے ، تاہم انہوں نے یہ الفاظ زائد نقل کیے ہیں : ” آپ نے اس بات کو ناپسند کیا کہ آپ ہمیں مشقت کا شکار کریں “ ۔ امام أحمد کے رجال ” صحیح “ کے رجال ہیں ۔

سیدنا نعیم بن نحام رضی اللہ عنہ بیان کرتے ہیں : ایک سرد رات میں ، جب میں لحاف میں موجود تھا میں نے نبی اکرم صلی اللہ علیہ وسلم کے مؤذن کو سنا تو میں نے یہ آرزو کی کہ وہ یہ کہے : تم لوگ اپنی رہائشی جگہ پر ہی نماز ادا کر لو جب مؤذن نے حی علی الفلاح کہا: تو اس کے بعد اس نے یہ کہا: تم لوگ اپنی رہائشی جگہ پر نماز ادا کر لو بعد میں ، میں نے اس بارے میں دریافت کیا : تو پتہ چلا کہ نبی اکرم صلی اللہ علیہ وسلم نے مؤذن کو اس بات کا حکم دیا تھا ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا نعیم بن نحام رضی اللہ عنہ بیان کرتے ہیں : سردی کے موسم میں ایک دن صبح کی نماز کے لئے اذان دی گئی میں اس وقت اپنی اہلیہ کے ساتھ لحاف میں موجود تھا میں نے سوچا کاش مؤذن یہ کہے کہ جو شخص بیٹھا رہے ( یعنی با جماعت نماز میں شریک : ہو ) تو کوئی حرج نہیں ہے ، جب نبی اکرم صلی اللہ علیہ وسلم کا منادی اذان کے آخر میں پہنچا تو اس نے یہ کہا: کہ جو شخص بیٹھا ہے ، تو کوئی حرج نہیں ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ، تاہم انہوں نے یہ الفاظ نقل کیے ہیں : جب اس نے الصلاۃ خير من النوم پڑھا تو پھر یہ کہا: جو شخص بیٹھا رہے ، تو کوئی حرج نہیں ہے ۔ یہ روایت اسماعیل بن عیاش نے یحیی بن سعید انصاری مدنی کے حوالے سے نقل کی ہے اہل حجاز سے اس کی نقل کردہ روایات مردود ہیں یہ روایت امام طبرانی نے ایک اور سند کے ساتھ نقل کی ہے ، جس کے رجال ” صحیح “ کے رجال ہیں ۔

سیدنا نعیم بن نحام رضی اللہ عنہ بیان کرتے ہیں : میں اپنی اہلیہ کے ساتھ لحاف میں موجود تھا یہ ایک سردی کی صبح تھی نبی اکرم صلی اللہ علیہ وسلم کے منادی نے فجر کے لئے اذان دینا شروع کی ، جب میں نے اسے سنا تو میں نے سوچا کہ کاش یہ کہے کہ جو شخص بیٹھا ہے ، تو کوئی حرج نہیں ہے ، جب اس نے الصَّلَاةُ خَيْرَ مِنَ النَّوْمِ کہہ دیا تو اس نے یہ کہا: جو شخص بیٹھا رہے ، تو کوئی حرج نہیں ہے ۔
یہ روایت امام طبرانی نے معجم کبیر میں نقل کی ہے ، اس کے رجال کی توثیق کی گئی ہے صرف امام طبرانی کے استاد عبداللہ بن وہیب عزی کا معاملہ مختلف ہے کیونکہ میں اس سے واقف نہیں ہوں ۔

عمرو بن اوس بیان کرتے ہیں : مجھے اس صحابی نے یہ بات بتائی جس نے نبی اکرم صلی اللہ علیہ وسلم کے منادی کو سنا تھا کہ جب اس نے نماز کے لئے اقامت کہی یا جب نماز کا وقت ہوا ( راوی کو شک ہے یا شاید اس کی مانند کوئی اور الفاظ ہیں ) تو اس نے کہا: تم لوگ اپنی رہائشی جگہ پر نماز ادا کر لو اس نے بارش کی وجہ سے ایسا کہا: تھا ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔