مجمع الزوائد ومنبع الفوائد

سیدنا عبداللہ بن زبیر رضی اللہ عنہما بیان کرتے ہیں : ایک مرتبہ ہم نے نبی اکرم صلی اللہ علیہ وسلم کے ہمراہ بھونا ہوا کھانا کھایا تھا ہم لوگ اس وقت مسجد میں موجود تھے پھر نماز کھڑی ہو گئی “ تو ہم نے صرف یہ کیا کہ اپنے ہاتھ کنکریوں سے پونچھ لئے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا بلال رضی اللہ عنہ کے بارے میں یہ بات منقول ہے : وہ نبی اکرم صلی اللہ علیہ وسلم کی خدمت میں آپ کو نماز کے لئے بلانے کے لئے حاضر ہوئے تو انہوں نے نبی اکرم صلی اللہ علیہ وسلم کو پایا کہ آپ اپنے گھر میں موجود اپنی نماز کی مخصوص جگہ پر سحری کر رہے تھے ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں البتہ ابوداؤد نے یہ بات بیان کی ہے شداد نے سیدنا بلال رضی اللہ عنہ سے سماع نہیں کیا ہے باقی اللہ بہتر جانتا ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کی خدمت میں ” مسجد فضیخ “ میں فضیخ لائی گئی تھی آپ نے اسے پی لیا تو اسے ( یعنی مسجد کو ) یہی نام دے دیا گیا ۔
یہ روایت امام أحمد اور امام ابویعلیٰ نے نقل کی ہے ، اور اس کے الفاظ یہ ہیں : نبی اکرم صلی اللہ علیہ وسلم کے پاس ایک مٹکا فضیخ کا لایا گیا اس میں جوش آیا ہوا تھا نبی اکرم صلی اللہ علیہ وسلم اس وقت مسجد فضیخ میں موجود تھے آپ نے اسے پی لیا تو اسی وجہ سے اس مسجد کو ” مسجد فضیخ “ نام دیا گیا اس روایت کی سند میں ایک راوی عبداللہ بن نافع ہے ، جسے امام بخاری رحمہ اللہ امام ابوحاتم اور امام نسائی رحمہ اللہ نے ضعیف قرار دیا ہے یحیی بن معین کہتے ہیں : اس کی حدیث کو نوٹ کیا جائے گا ۔