مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب تم میں سے کوئی ایک شخص مسجد میں جوں کو پائے تو اسے دفن کر دے “ ۔
یہ روایت امام بزار نے اور امام طبرانی نے معجم اوسط میں نقل کی ہے ، اور انہوں نے یہ الفاظ زائد نقل کیے ہیں : ” تو وہ اپنے آپ سے اس کو دور کر دے “ ۔ اس روایت کی سند میں ایک راوی یوسف بن خالد سمتی ہے ، اور وہ ” ضعیف “ ہے ۔

مالک بن یخامر بیان کرتے ہیں : میں نے سیدنا معاذ بن جبل رضی اللہ عنہ کو دیکھا کہ انہوں نے مسجد میں جوں کو اور پسو کو مار دیا تھا ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

انصار سے تعلق رکھنے والے ایک صاحب نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی شخص اپنے کپڑے میں جوں کو پائے تو اسے ( کپڑے میں ہی ) مار دے ، اُسے مسجد میں نہ پھینکے “ ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔

قریش سے تعلق رکھنے والے اہل مکہ کے ایک بزرگ بیان کرتے ہیں : ایک شخص نے اپنے کپڑے میں جوں پائی تو اسے پکڑا تاکہ اسے مسجد میں پھینک دے ، تو نبی اکرم صلی اللہ علیہ وسلم نے اس سے فرمایا : تم ایسا نہ کرو تم اسے دوبارہ اپنے کپڑے پر لگاؤ اور مسجد سے باہر جا کر ( پھر اس کو پھینکنا ) ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں البتہ محمد بن اسحاق نامی راوی نے اسے عنعنہ کے ساتھ نقل کیا ہے ، اور وہ شخص تدلیس کرنے والا ہے ۔