مجمع الزوائد ومنبع الفوائد

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” حیض کی کم از کم مدت تین دن اور زیادہ سے زیادہ دس دن ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں یہ مذکور ہے : اسے عبدالملک کوفی نے ، علاء بن کثیر سے نقل کیا ہے ، ہمیں نہیں معلوم یہ کون ہے ؟

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” حیض والی عورت دس دن تک دیکھے گی ، اگر وہ طہر دیکھ لیتی ہے ، تو وہ پاک ہو جائے گی ، اور اگر دس دن سے زیادہ ہو جاتے ہیں ، تو پھر وہ استحاضہ والی عورت شمار ہو گی ، وہ غسل کر کے نماز ادا کرے گی ، اگر زیادہ خون نکلتا ہے ، تو وہ روئی رکھ کر کپڑا باندھ لے گی اور ہر نماز کے لیے وضو کرے گی ، نفاس والی عورت چالیس دن تک رہے گی ، پھر اگر وہ اس سے پہلے طہر دیکھ لیتی ہے ، تو وہ پاک شمار ہو گی اور اگر چالیس دن سے زیادہ ہو جاتے ہیں ، تو وہ مستحاضہ کے حکم میں ہو گی ، وہ غسل کر کے نماز ادا کر لے گی ، اگر زیادہ خون نکل رہا ہو ، تو وہ روئی رکھ کر کپڑا باندھ لے گی ، اور ہر نماز کے لیے وضو کرے گی “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمر بن حصین ہے اور وہ ضعیف ہے ۔

سیدنا انس بن مالک رضی اللہ عنہ فرماتے ہیں : حیض والی عورت پانچ ، سات ، آٹھ ، نو ، دس دن تک انتظار کرے گی ، جب دس دن گزر جائیں تو وہ مستحاضہ شمار ہو گی ۔
یہ روایت امام ابویعلیٰ نے نقل کی ہے ، اس کی سند میں ایک راوی جلد بن ایوب ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” حیض والی عورت کا خون ریلوں کی صورت میں آتا ہے ، اور حیض کے خون کی ایک بو ہوتی ہے جس سے وہ پہچانا جاتا ہے ، جب حیض کی مدت ختم ہو جائے تو تم میں سے ( ہر ) عورت غسل کر لے ، پھر اپنے جسم سے خون دھو لے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حسین بن عبداللہ بن عبیداللہ بن عباس ہے اور وہ ضعیف ہے ، ابن عدی فرماتے ہیں : یہ ان راویوں میں سے ہے جن کی حدیث لکھی جاتی ہے ۔

سیدہ عائشہ رضی اللہ عنہا بیان کرتی ہیں : فاطمہ بنت ابوحبیش نے نبی اکرم صلی اللہ علیہ وسلم سے سوال کیا : اُس نے کہا: میں استحاضہ کا شکار ہوں ، نبی اکرم صلی اللہ علیہ وسلم نے فرمایا : تم اپنے حیض کے مخصوص ایام میں نماز ترک کر دو ، پھر غسل کر لو اور ہر نماز کے وقت وضو کر لو ، خواہ خون کے قطرے چٹائی پر گر رہے ہوں ۔ علامہ ہیثمی فرماتے ہیں : میں یہ کہتا ہوں :
یہ روایت ” صحیح “ میں منقول ہے ، تاہم اس میں یہ الفاظ نہیں ہیں : ” خواہ خون کے قطرے چٹائی پر گر رہے ہوں “ ۔
یہ روایت امام أحمد نے عروہ کے حوالے سے نقل کی ہے اور ان کا اسم منسوب بیان نہیں کیا ہے ، ایک قول کے مطابق اس سے مراد عروہ مزنی ہے اور وہ مجہول ہے ، ایک قول کے مطابق اس سے مراد عروہ بن زبیر ہیں ، لیکن حبیب نامی راوی نے اُن سے سماع نہیں کیا ہے ، حبیب نامی راوی تدلیس کرنے والا ہے ، اس نے
یہ روایت ” عنعنہ“ کے طور پر نقل کی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم سے مستحاضہ کے بارے میں سوال کیا گیا : تو آپ نے ارشاد فرمایا : یہ شیطان کا چھبونا ہے ، جو وہ عورت کے رحم میں چھبوتا ہے ۔
یہ روایت امام بزار نے نقل کی ہے ، امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا جابر رضی اللہ عنہ بیان کرتے ہیں : سیدہ فاطمہ بنت قیس رضی اللہ عنہا نے نبی اکرم صلی اللہ علیہ وسلم سے مستحاضہ کے بارے میں دریافت کیا : تو آپ نے ارشاد فرمایا : وہ اپنے حیض کے مخصوص ایام میں بیٹھی رہے گی ، اور پھر طہر کے وقت غسل کر کے کپڑا باندھ لے گی ، اور نماز ادا کرے گی ۔
یہ روایت امام طبرانی نے معجم صغیر میں نقل کی ہے ۔

معجم اوسط میں سیدنا جابر رضی اللہ عنہ کے حوالے سے یہ بات منقول ہے : نبی اکرم صلی اللہ علیہ وسلم نے مستحاضہ عورت کو ہر نماز کے لیے وضو کرنے کا حکم دیا تھا ۔ پہلی روایت کے رجال ” صحیح “ کے رجال ہیں ، اور اوسط کے رجال میں ایک شخص عبداللہ بن محمد بن عقیل ہے ، جس سے استدلال کرنے کے بارے میں اختلاف کیا گیا ہے ۔

سیدہ سودہ بنت زمعہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” مستحاضہ ، حیض کے مخصوص ایام میں نماز ترک کیے رکھے گی ، جن ایام میں وہ پہلے بیٹھی رہتی تھی ، پھر وہ ایک مرتبہ غسل کر لے گی اور پھر ہر نماز کے وقت وضو کر لے گی “ ۔
یہ روایت امام طبرانی نے معجم اوسط میں نقل کی ہے اس کی سند میں یہ مذکور ہے : اسے جعفر نے ، سیدہ سودہ رضی اللہ عنہا جن سے نقل کیا ہے اور میں اس شخص سے واقف نہیں ہوں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” استحاضہ والی عورت ، ایک حیض سے دوسرے حیض تک کے لیے غسل کرے گی “ ۔
یہ روایت امام طبرانی نے معجم اوسط اور معجم صغیر میں نقل کی ہے ، اس کی سند میں ایک راوی بقیہ بن ولید ہے اور وہ تدلیس کرنے والا ہے ۔