مجمع الزوائد ومنبع الفوائد

سیدہ میمونہ رضی اللہ عنہا بیان کرتی ہیں : نبی اکرم صلی اللہ علیہ وسلم اُن کے غسل جنابت سے بچائے ہوئے پانی سے وضو نہیں کرتے تھے ۔
یہ روایت امام أحمد نے نقل کی ہے اور اس کے رجال ” صحیح“ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جنبی شخص اس وقت تک ہرگز نہ سوئے ، جب تک وہ وضو نہیں کر لیتا “ ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

معجم اوسط میں ، امام طبرانی نے سیدنا ابوہریرہ رضی اللہ عنہ کے حوالے سے یہ الفاظ نقل کیے ہیں : نبی اکرم صلی اللہ علیہ وسلم جب جنبی ہوتے اور کچھ کھانے ، یا سونے کا ارادہ کرتے ، ایک تو آپ وضو کر لیتے تھے ۔ اس کی سند میں ایک راوی اسحاق بن ابراہیم قرقسانی ہے ، اور اس روایت کی سند حسن ہے ۔

سیدہ ام سلمہ ہی رضی اللہ عنہا بیان کرتی ہیں : نبی اکرم صلی اللہ علیہ وسلم جب جنابت کی حالت میں ہوتے تھے ، تو اُس وقت تک کچھ نہیں کھاتے تھے ، جب تک وضو نہیں کرتے تھے ۔
یہ روایت امام طبرانی نے معجم اوسط اور معجم صغیر میں نقل کی ہے ۔

سیدہ ام سلمہ رضی اللہ عنہا کے حوالے سے معجم کبیر میں یہ روایت منقول ہے : نبی اکرم صلی اللہ علیہ وسلم جب جنابت کی حالت میں سونے کا ارادہ کرتے تھے ، تو آپ نماز کے وضو کی طرح وضو کر لیتے تھے ، اور جب کچھ کھانے کا ارادہ کرتے تھے ، تو ہاتھ دھو لیتے تھے ۔
معجم کبیر کے رجال ثقہ ہیں ، معجم اوسط اور معجم صغیر کے رجال میں ایک راوی جابر جعفی ہے ، جس سے استدلال کرنے کے بارے میں اختلاف کیا گیا ہے ۔

سیدہ عائشہ رضی اللہ عنہا بیان کرتی ہیں : نبی اکرم صلی اللہ علیہ وسلم جب اپنی اہلیہ کے ساتھ وظیفہ زوجیت ادا کرتے ، اور پھر آپ کا اُٹھنے کا ارادہ نہ ہوتا ، تو آپ اپنا ہاتھ دیوار پر مار کر تیمم کر لیتے تھے ۔ اس روایت کے بارے میں کلام ، تیمم سے متعلق باب میں گزر چکا ہے
یہ روایت امام طبرانی نے معجم اوسط میں نقل کی ہے ۔

سیدنا مالک بن عبداللہ غافقی رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم نے کھانا کھایا ، پھر آپ نے فرمایا : میرے لئے پردہ کر دو تاکہ میں غسل کر لوں ، میں نے عرض کی : یا رسول اللہ ! کیا آپ جنابت کی حالت میں تھے ؟ نبی اکرم صلی اللہ علیہ وسلم نے ارشاد فرمایا : جی ہاں ! راوی بیان کرتے ہیں : میں نے سیدنا عمر رضی اللہ عنہ کو اس بارے میں بتایا ، وہ نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم سے گزارش کی : اس کا یہ کہنا ہے کہ آپ نے جنابت کی حالت میں کھا لیا تھا ، نبی اکرم صلی اللہ علیہ وسلم نے فرمایا : جی ہاں ! جب میں وضو کر لوں ، تو میں کھا لیتا ہوں ، اور پی لیتا ہوں ، لیکن میں قرأت اُس وقت تک نہیں کرتا ، اور نماز اُس وقت تک نہیں پڑھتا ، جب تک میں غسل نہ کر لوں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس میں ضعف پایا جاتا ہے اور اس میں ایک راوی ایسا ہے ، جو معروف نہیں ہے ۔

سیدنا عبداللہ بن مالک غافقی رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم نے کھانا کھایا ، پھر آپ صلی اللہ علیہ وسلم نے ارشاد فرمایا : میرے لئے پردہ کر دو ، تاکہ میں غسل کر لوں ، میں نے آپ کی خدمت میں عرض کی : یا رسول اللہ ! کیا آپ جنبی تھے ؟ آپ نے فرمایا : جی ہاں ! میں نے سیدنا عمر رضی اللہ عنہ کو اس بارے میں بتایا ، تو وہ نبی اکرم صلی اللہ علیہ وسلم کی خدمت میں حاضر ہوئے اور بولے : اس کا یہ کہنا ہے کہ آپ نے جنابت کی حالت میں کھا لیا تھا ، تو نبی اکرم صلی اللہ علیہ وسلم نے ارشاد فرمایا : جی ہاں ! جب میں وضو کر لوں ، تو میں کھا لیتا ہوں اور پی لیتا ہوں ۔
یہ روایت امام طبرانی نے معجم کبیر میں نقل کی ہے اور اس کی سند میں بھی ابن لہیعہ ہے ۔

سیدنا عبداللہ بن مالک غافقی رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم نے کھانا کھایا ، پھر آپ صلی اللہ علیہ وسلم نے ارشاد فرمایا : میرے لئے پردہ کر دو ، تاکہ میں غسل کر لوں ، میں نے آپ کی خدمت میں عرض کی : یا رسول اللہ ! کیا آپ جنبی تھے ؟ آپ نے فرمایا : جی ہاں ! میں نے سیدنا عمر رضی اللہ عنہ کو اس بارے میں بتایا ، تو وہ نبی اکرم صلی اللہ علیہ وسلم کی خدمت میں حاضر ہوئے اور بولے : اس کا یہ کہنا ہے کہ آپ نے جنابت کی حالت میں کھا لیا تھا ، تو نبی اکرم صلی اللہ علیہ وسلم نے ارشاد فرمایا : جی ہاں ! جب میں وضو کر لوں ، تو میں کھا لیتا ہوں اور پی لیتا ہوں ۔

یہ روایت امام طبرانی نے معجم کبیر میں نقل کی ہے اور اس کی سند میں بھی ابن لہیعہ ہے ۔

سیدنا عدی بن حاتم رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے جنبی شخص کے بارے میں دریافت کیا : کہ کیا وہ ( غسل کیے بغیر ) سو سکتا ہے ؟ نبی اکرم صلی اللہ علیہ وسلم نے ارشاد فرمایا : وہ نماز کے وضو کی طرح وضو کر لے گا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی قیس بن ربیع ہے ، جسے شعبہ اور سفیان نے ” ثقہ “ قرار دیا ہے ، اور دیگر لوگوں نے اُسے ”ضعیف“ قرار دیا ہے ، تاہم اُس کی طرف جھوٹ کی نسبت نہیں کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے جنبی شخص کو یہ رخصت دی ہے ، کہ جب کچھ کھانے لگے ، یا سونے لگے ، تو وضو کر لے ۔
یہ روایت امام طبرانی نے نقل کی ہے اس کی سند میں ایک راوی یوسف بن خالد سمتی ہے ، جس کے بارے میں یحیی بن معین نے یہ کہا: ہے : یہ کذاب ، خبیث اور اللہ کا دشمن ہے ۔

اسی سند کے ساتھ ، سیدنا عبداللہ بن عباس رضی اللہ عنہما ہی کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” بے شک فرشتے جنبی شخص ، اور ( ممنوع ) خوشبو لگانے والے کے پاس نہیں آتے ، جب تک وہ دونوں غسل نہیں کر لیتے “ ۔
یہ روایت امام طبرانی نے نقل کی ہے ، اور اس کے بارے میں بھی وہی کلام کیا جائے گا ، جو اس سے پہلی روایت کے بارے میں ہے ۔

سیدہ میمونہ بنت سعد رضی اللہ عنہا بیان کرتی ہیں : میں نے عرض کی : یا رسول اللہ ! کیا ہم میں سے کوئی ایک جنابت کی حالت میں کچھ کھا سکتا ہے ؟ نبی اکرم صلی اللہ علیہ وسلم نے ارشاد فرمایا : وہ اُس وقت تک کچھ نہ کھائے ، جب تک وضو نہیں کر لیتا ، میں نے عرض کی : یا رسول اللہ ! کیا جنبی شخص سو سکتا ہے ؟ آپ نے فرمایا : مجھے یہ بات پسند نہیں ہے کہ وہ جنابت کی حالت میں سو جائے ، جب تک وہ وضو نہیں کر لیتا ، کیونکہ مجھے یہ اندیشہ ہے کہ اگر وہ ایسی حالت میں انتقال کر گیا ، تو سیدنا جبرائیل علیہ السلام اس کے پاس نہیں آئیں گے ۔
یہ روایت امام طبرانی نے معجم کبیر میں نقل کی ہے ، اس کی سند میں یہ مذکور ہے : اسے عثمان بن عبدالرحمن نے عبدالحمید بن یزید سے روایت کیا ہے ، اور عثمان بن عبدالرحمن نامی راوی ، حرانی ، طرائقی ہے ، جسے یحیی بن معین نے ” ثقہ “ قرار دیا ہے ، ابوحاتم کہتے ہیں : یہ صدوق ہے ، ابوعروبہ حرانی اور ابن عدی کہتے ہیں : اس میں کوئی حرج نہیں ہے ، اس نے مجبول لوگوں سے روایت نقل کی ہے ، امام بخاری رحمہ اللہ اور ابو أحمد حاکم کہتے ہیں : اس نے ضعیف لوگوں سے روایات نقل کی ہیں ، ابوحاتم بیان کرتے ہیں : ضعیف لوگوں سے روایت نقل کرنے میں یہ بقیہ کے ساتھ مشابہت رکھتا ہے ۔