مجمع الزوائد ومنبع الفوائد

سیف بن عبداللہ حمیری بیان کرتے ہیں : میں ، کچھ افراد کے ساتھ ، سیدہ عائشہ رضی اللہ عنہا کی خدمت میں حاضر ہوا ، ہم نے اُن سے ایسے شخص کے بارے میں دریافت کیا : جو اپنی شرمگاہ پر ہاتھ لگا دیتا ہے ، تو انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں اس بات کی پرواہ نہیں کرتا کہ میں نے اُسے ( یعنی شرمگاہ کو ) چھو لیا ہے ، یا اپنی ناک کو ( چھو لیا ہے ) “ ۔
یہ روایت امام ابویعلیٰ نے ، اہل یمامہ سے تعلق رکھنے والے ایک شخص کے حوالے سے حسین بن دفاع کے حوالے سے ، اُن کے والد کے حوالے سے ، سیف سے نقل کی ہے ، اور یہ سب لوگ مجہول ہیں ، ان کے بارے میں ، کم از کم یہ بات کہی جا سکتی ہے ۔

سیدنا عصمہ بن مالک خطمی بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اور بولا: میں اپنے جسم کے کسی حصے پر خارش کر رہا ہوتا ہوں ، اور خارش کرتے ہوئے ، میرا ہاتھ میری شرمگاہ پر لگ جاتا ہے ، تو نبی اکرم صلی اللہ علیہ وسلم نے ارشاد فرمایا : میرے ساتھ بھی کبھی ایسا ہو جاتا ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی فضل بن مختار ہے ، وہ منکر الحدیث ہے اور انتہائی ضعیف ہے ۔

ارقم بن شرحبیل بیان کرتے ہیں : میں نماز کے دوران اپنے جسم پر خارش کر رہا تھا ، میرا ہاتھ میری شرمگاہ پر لگ گیا ، میں نے اس بات کا ذکر سیدنا عبداللہ بن مسعود رضی اللہ عنہ سے کیا ، تو انہوں نے ہنستے ہوئے فرمایا : تم اسے کاٹ دو ! تم اُسے الگ کیسے کر سکتے ہو ؟ وہ تمہارے جسم کا ایک حصہ ہے ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

عبدالرحمن بن علقمہ بیان کرتے ہیں : سیدنا عبداللہ بن مسعود رضی اللہ عنہ سے شرمگاہ کو چھونے کے بارے میں دریافت کیا گیا : میں یہ بات سن رہا تھا ، اُنہوں نے فرمایا : وہ تمہاری ناک کے کنارے کی طرح ہے ۔ اس کے رجال کی توثیق کی گئی ہے ۔

سعید بن جبیر بیان کرتے ہیں : سیدنا عبداللہ بن مسعود رضی اللہ عنہ نے فرمایا : میں اس بات کی پرواہ نہیں کرتا ، کہ میں نے اس کو چھو لیا ہے یا ناک کو چھو لیا ہے ۔
یہ روایت امام طبرانی نے معجم کبیر میں نقل کی ہے ، سعید بن جبیر نے سیدنا عبداللہ بن مسعود رضی اللہ عنہ سے سماع نہیں کیا ہے ، قتادہ کا حال بھی اسی طرح ہے ، انہوں نے بھی سیدنا عبداللہ رضی اللہ عنہ کے حوالے سے
یہ روایت نقل کی ہے ۔

حسن بیان کرتے ہیں : نبی اکرم صلی اللہ علیہ وسلم کے اصحاب میں سے پانچ افراد ، یعنی سیدنا علی بن ابوطالب رضی اللہ عنہ ، سیدنا حذیفہ رضی اللہ عنہ ، سیدنا عمران بن حصین رضی اللہ عنہ اور ایک اور صاحب یہ فرماتے ہیں ، ان میں سے کسی نے یہ کہا: ہے : میں اس بات کی پرواہ نہیں کرتا کہ میں نے اپنی شرمگاہ کو چھو لیا ہے ، یا اپنے ناک کو چھوا ہے ، کسی نے یہ کہا: ہے : میں نے اپنے زانوں کو چھوا ہے ، کسی نے یہ کہا: ہے : میں نے اپنے گھٹنے کو چھوا ہے ۔
یہ روایت امام طبرانی نے معجم کبیر میں نقل کی ہے ، اس کے رجال ثقہ ہیں اور ” صحیح “ کے رجال میں سے ہیں ، البتہ حسن نامی راوی تدلیس کرنے والا ہے ، اور اُس نے سماع کی صراحت نہیں کی ہے ۔

سیدنا زید بن خالد جہنی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اپنی شرمگاہ کو چھو لیتا ہے اُسے وضو کرنا چاہیے “ ۔
یہ روایت امام أحمد ، امام بزار اور امام طبرانی نے معجم کبیر میں نقل کی ہے ، اس کے رجال ” صحیح “ کے رجال ہیں ، البتہ ابن اسحاق نامی راوی تدلیس کرنے والا ہے ، تاہم یہاں اس نے یہ کہا: ہے : اُس نے مجھے حدیث بیان کی ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اپنا ہاتھ اپنی شرم گاہ کی طرف لے جائے ، اور شرمگاہ پر کوئی پردہ نہ ہو تو اس شخص پر وضو لازم ہو جاتا ہے “ ۔
یہ روایت امام أحمد نے ، امام طبرانی نے معجم اوسط اور معجم صغیر میں ، اور امام بزار نے نقل کی ہے ، اس کی سند میں ایک راوی یزید بن عبدالملک نوفلی ہے ، جسے زیادہ تر لوگوں نے ” ضعیف“ قرار دیا ہے ، ایک روایت کے مطابق یحییٰ بن معین نے اُسے ” ثقہ “ قرار دیا ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ” جو شخص اپنی شرمگاہ کو چھو لے ، اُسے وضو کرنا چاہیے ، جو عورت اپنی شرمگاہ کو چھو لے ، اُسے وضو کرنا چاہیے “ ۔
یہ روایت امام أحمد نے نقل کی ہے ، اس کی سند میں ایک راوی بقیہ بن ولید ہے ، جس نے ” عنعنہ “ کے ساتھ روایت نقل کی ہے اور وہ تدلیس کرنے والا ہے ۔

سیدنا عبداللہ بن عمرو رضی اللہ عنہ بیان کرتے ہیں : سیدہ بسرہ بنت صفوان رضی اللہ عنہا نے نبی اکرم صلی اللہ علیہ وسلم سے ایسی خاتون کے بارے میں دریافت کیا : جو اپنا ہاتھ اپنی شرمگاہ میں داخل کر لیتی ہے ، تو نبی اکرم صلی اللہ علیہ وسلم نے فرمایا : اس عورت پر وضو لازم ہو گا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سلیمان بن داؤد شاذ کونی ہے ، اکثر حضرات نے اُسے ” ضعیف“ قرار دیا ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اپنی شرمگاہ کو چھو لے ، اُسے وضو کرنا چاہیے “ ۔
یہ روایت امام بزار نے اور امام طبرانی نے معجم کبیر میں نقل کی ہے ، معجم کبیر کی سند میں ایک راوی علاء بن سلیمان ہے اور وہ انتہائی ضعیف ہے ، امام بزار کی سند میں ایک راوی ہاشم بن زید ہے اور وہ انتہائی ضعیف ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جو شخص اپنی شرمگاہ کو چھو لے ، اُسے وضو کرنا چاہیے “ ۔
یہ روایت امام بزار نے نقل کی ہے ، اس کی سند میں ایک راوی عمر بن شریح ہے ، ازدی فرماتے ہیں : اس کی نقل کردہ حدیث مستند نہیں ہوتی ہے ۔

سیدنا طلق بن علی رضی اللہ عنہ ، جو اُس وفد میں شامل تھے ، جو وفد نبی اکرم صلی اللہ علیہ وسلم کی خدمت میں حاضر ہوا تھا ، وہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص اپنی شرمگاہ کو چھو لے اُسے وضو کرنا چاہیے “ ۔
یہ روایت امام طبرانی نے معجم کبیر میں نقل کی ہے ، وہ فرماتے ہیں : ایوب کے حوالے سے عتبہ سے
یہ روایت ، صرف حماد بن محمد نے نقل کی ہے ، حماد بن محمد نے ایک اور حدیث بھی نقل کی ہے ، یہ دونوں احادیث میرے نزدیک صحیح ہیں اور اس بات کا امکان موجود ہے کہ انہوں نے پہلی حدیث نبی اکرم صلی اللہ علیہ وسلم سے اُس سے پہلے سنی ہو گی ، اور پھر بعد میں یہ حدیث سنی ہو گی ۔ یہ حدیث سیدہ بسره رضی اللہ عنہا ، سیدہ ام حبیبہ رضی اللہ عنہا ، سیدنا ابوہریرہ رضی اللہ عنہ ، سیدنا زید بن خالد رضی اللہ عنہ اور دیگر صحابہ کرام رضی اللہ عنہم کی نقل کردہ روایات کے مطابق ہے ، جن میں ان حضرات نے نبی اکرم صلی اللہ علیہ وسلم کے حوالے سے یہ بات نقل کی ہے : کہ آپ صلی اللہ علیہ وسلم نے شرمگاہ کو چھونے پر وضو کرنے کا حکم دیا ہے تو ان صحابی نے ” ناسخ “ اور ” منسوخ“ ( یعنی دونوں قسم کی احادیث سنی ہیں ) ۔

سیدنا عبداللہ بن عمرو رضی اللہ عنہ بیان کرتے ہیں : سیدہ بسرہ بنت صفوان بن نوفل رضی اللہ عنہا نے ، نبی اکرم صلی اللہ علیہ وسلم سے ایسی عورت کے بارے میں دریافت کیا ، جو ہاتھ لگاتی ہے ، تو اس کا ہاتھ شرمگاہ کو لگ جاتا ہے ، تو نبی اکرم صلی اللہ علیہ وسلم نے ارشاد فرمایا : وہ وضو کرے گی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبداللہ بن مؤمل ہے ، جسے امام أحمد نے ، اور ایک روایت کے مطابق یحیی بن معین نے ” ضعیف“ قرار دیا ہے ، دوسری روایت کے مطابق یحیی نے اسے ” ثقہ “ قرار دیا ہے ، ابن حبان نے اس کا تذکرہ کتاب ” الثقات “ میں کیا ہے ۔

سیدہ بسرہ بنت صفوان رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اپنی شرمگاہ ، یا خصیوں ، یا شرمگاہ کے آس پاس کے حصے کو چھو لے ، تو اُسے نماز کے وضو کی طرح وضو کرنا چاہیے “ ۔
یہ روایت امام طبرانی نے معجم اوسط اور معجم کبیر میں نقل کی ہے ، یہ ” سنن“ میں منقول ہے ، تاہم اس میں خصیوں ، اور شرمگاہ کے آس پاس کے حصے کا ذکر نہیں ہے اور اس کے رجال ” صحیح “ کے رجال ہیں ۔