مجمع الزوائد ومنبع الفوائد

سیدنا معیقیب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ( بعض ) ایڑیوں کے لئے جہنم کی بربادی ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی ایوب بن عتبہ ہے ، اکثر حضرات نے اُسے ” ضعیف“ قرار دیا ہے ۔

عقبہ بن مسلم بیان کرتے ہیں : میں نے ، سیدنا عبداللہ بن حارث بن جزء زبیدی رضی اللہ عنہ کو ، جو نبی اکرم صلی اللہ علیہ وسلم کے اصحاب میں سے ہیں ، انہیں یہ فرماتے ہوئے سنا : ” ( بعض ) ایڑیوں اور پاؤں کے تلووں کے لیے ، جہنم کی بربادی ہے “ ۔
یہ روایت امام أحمد نے اسی طرح نقل کی ہے ، امام طبرانی نے معجم کبیر میں اس کو یوں نقل کیا ہے : سیدنا عبداللہ بن حارث بن جزء زبیدی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ( بعض ) ایڑیوں اور پاؤں کے تلووں کے لیے جہنم کی بربادی ہے “ ۔ امام أحمد اور امام طبرانی کے رجال ثقہ ہیں ۔

سیدنا ابوامامہ رضی اللہ عنہ اور اُن کے بھائی بیان کرتے ہیں : نبی اکرم صلی اللہ علیہ وسلم نے کچھ لوگوں کو وضو کرتے ہوئے دیکھا ، تو ارشاد فرمایا : ( بعض ) ایڑیوں کے لیے جہنم کی بربادی ہے ۔
یہ روایت امام طبرانی نے معجم کبیر میں مختلف طرق کے ساتھ نقل کی ہے ، جن میں سے بعض میں یہ مذکور ہے : یہ سیدنا ابوامامہ رضی اللہ عنہ اور ان کے بھائی سے منقول ہے ، بعض میں یہ مذکور ہے : یہ صرف سیدنا ابوامامہ رضی اللہ عنہ سے منقول ہے ، بعض میں یہ مذکور ہے : یہ صرف سیدنا ابوامامہ رضی اللہ عنہ کے بھائی سے منقول ہے اور بعض میں یہ مذکور ہے : وہ بیان کرتے ہیں : ” نبی اکرم صلی اللہ علیہ وسلم نے کچھ لوگوں کو وضو کرتے ہوئے دیکھا ، جن کے پاؤں پر ایک درہم جتنی جگہ باقی رہ گئی تھی ، تو آپ صلی اللہ علیہ وسلم نے ارشاد فرمایا : ( بعض ) ایڑیوں کے لیے جہنم کی بربادی ہے “ ۔ ان تمام طرق کا مدار لیث بن ابوسلیم نامی راوی پر ہے ، اور وہ اختلاط کا شکار ہو گیا تھا ۔

بکر بن سوادہ بیان کرتے ہیں : میں نے سیدنا ابوالہیثم رضی اللہ عنہ کو یہ بیان کرتے ہوئے سنا : وہ فرماتے ہیں : نبی اکرم صلی اللہ علیہ وسلم نے مجھے وضو کرتے ہوئے دیکھا تو ارشاد فرمایا : اے ابوالہیثم ! پاؤں کے تلوے کا دھیان رکھنا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ، بکر بن سوادہ کے بارے میں میرا یہ گمان ہے کہ انہوں نے سیدنا ابوالہیثم رضی اللہ عنہ سے سماع کیا ہے ، باقی اللہ بہتر جانتا ۔

سیدنا ابوبکر صدیق رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس بیٹھا ہوا تھا ، ایک شخص آیا ، جس نے وضو کیا تھا اور اُس کے پاؤں میں ایک جگہ پر پانی نہیں پہنچا تھا ، تو نبی اکرم صلی اللہ علیہ وسلم نے ارشاد فرمایا : تم جاؤ اور اپنا وضو مکمل کرو ! تو اُس شخص نے ایسا ہی کیا ۔
یہ روایت امام طبرانی نے معجم اوسط اور معجم صغیر میں نقل کی ہے ، اس کی سند میں ایک راوی وازع بن نافع ہے اور اس کے ضعیف ہونے پر اتفاق ہے ۔

سیدنا ابوروح کلاعی بیان کرتے ہیں : اللہ کے نبی صلی اللہ علیہ وسلم نے ہمیں ایک نماز پڑھاتے ہوئے ، اُس میں سورہ روم کی تلاوت کی ، اس میں کسی جگہ آپ کو مشابہ لگ گیا ( تو نماز سے فارغ ہونے کے بعد ) آپ صلی اللہ علیہ وسلم نے ارشاد فرمایا : شیطان ہمارے لیے قرأت میں الجھن کر دیتا ہے ، اس کی وجہ کچھ لوگ ہیں ، جو ( صحیح طرح سے مکمل ) وضو کے بغیر نماز کے لئے آ جاتے ہیں ، جب تم نماز کے لیے آؤ ، تو اچھی طرح وضو کرو ۔
یہ روایت امام أحمد نے سیدنا ابوروح رضی اللہ عنہ سے نقل کی ہے اور امام نسائی رحمہ اللہ نے اسے ابوروح کے حوالے سے ، ایک شخص سے نقل کیا ہے ، امام أحمد کے رجال ” صحیح “ کے رجال ہیں ۔

عبدالملک بن عمیر بیان کرتے ہیں : میں نے سیدنا شبیب ابوروح رضی اللہ عنہ جن کا تعلق ذی کلاع سے ہے ، انہیں یہ بیان کرتے ہوئے سنا : وہ نبی اکرم صلی اللہ علیہ وسلم کی اقتداء میں نماز ادا کر رہے تھے ، نبی اکرم صلی اللہ علیہ وسلم نے سورہ روم کی تلاوت شروع کی ، آپ کو ایک آیت میں تردد ہوا ، جب آپ نماز پڑھ کر فارغ ہوئے ، تو آپ نے فرمایا : ہمیں قرآن میں مشابہ لگ جاتا ہے ، کیونکہ ہمارے ساتھ تم میں سے کچھ ایسے لوگ نماز ادا کرتے ہیں ، جو اچھی طرح وضو نہیں کرتے ہیں ، جو شخص ہمارے ساتھ نماز میں شریک ہو اسے اچھی طرح وضو کرنا چاہیے ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔