مجمع الزوائد ومنبع الفوائد

عبداللہ بن مغیرہ بیان کرتے ہیں : بنومدلج سے تعلق رکھنے والے ایک صاحب نے انہیں بتایا ، وہ لوگ شکار کرنے کے لیے سمندر کے سفر پر نکلے ، انہوں نے پینے کے لیے اپنے ساتھ پانی رکھ لیا ، سمندر میں ہی انہیں نماز کا وقت ہو گیا ، انہوں نے اس بات کا تذکرہ نبی اکرم صلی اللہ علیہ وسلم سے کیا اور بولے : اگر ہم اپنے پانی کے ذریعے وضو کر لیتے ، تو ہم نے پیاسے رہ جانا تھا ، اور اگر ہم سمندر کے پانی کے ذریعے وضو کرتے ، تو ہمیں اُس حوالے سے الجھن رہنی تھی ، تو نبی اکرم صلی اللہ علیہ وسلم نے ارشاد فرمایا : اس ( یعنی سمندر ) کا پانی پاک ہے ( یا اس کا پانی طہارت کے حصول کا ذریعہ ہے ) اور اس کا مردار حلال ہے ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا عبداللہ مدلجی رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے اور عرض کی : یا رسول اللہ ! ہم کشتیوں پر سوار ہو کر جاتے ہیں ، ہم اپنے پینے کے لیے کچھ پانی لے جاتے ہیں ، تو نبی اکرم صلی اللہ علیہ وسلم نے ارشاد فرمایا : اُس ( سمندر ) کا پانی پاک ہے اور اس کا مردار حلال ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالجبار بن عمر ہے ، جسے امام بخاری رحمہ اللہ اور امام نسائی رحمہ اللہ نے ضعیف قرار دیا ہے ، جبکہ محمد بن سعد نے اُسے ثقہ کہا: ہے ۔

سیدنا عرکی رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم سے سمندر کے پانی کے بارے میں دریافت کیا ، تو آپ صلی اللہ علیہ وسلم نے ارشاد فرمایا : اُس کا پانی پاک ہے اور اس کا مردار حلال ہے ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔

موسی بن سلمہ بیان کرتے ہیں : میں اور سنان بن سلمہ حج کرنے کے لئے گئے ، جب ہم مکہ آئے تو میں نے کہا: تم ہمارے ساتھ سیدنا عبداللہ بن عباس رضی اللہ عنہما کے پاس چلو ! ہم اُن کی خدمت میں حاضر ہوئے ، راوی بیان کرتے ہیں : میں نے اُن سے سمندر کے پانی کے بارے میں دریافت کیا ، تو انہوں نے ارشاد فرمایا : سمندر کا پانی طہارت کے حصول کا ذریعہ ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

موسیٰ بن سلمہ بیان کرتے ہیں : سنان بن سلمہ نے مجھے یہ ہدایت کی : کہ میں سیدنا عبداللہ بن عباس رضی اللہ عنہما سے سمندر کے پانی کے بارے میں دریافت کروں ، اور اس بارے میں دریافت کروں کہ مجھے مہینے کے کون سے حصے میں روزے رکھنے چاہیں ؟ میں ، سیدنا عبداللہ بن عباس رضی اللہ عنہما کی خدمت میں حاضر ہوا ، اور میں نے کہا: میرے بھائی نے مجھے یہ ہدایت کی ہے کہ میں آپ سے سمندر کے پانی کے ذریعے وضو کرنے کے بارے میں دریافت کروں ، سیدنا عبداللہ بن عباس رضی اللہ عنہما نے فرمایا : دو سمندر ہیں ، تم اُن دونوں میں سے جس کے ذریعے بھی وضو کر لو گے ، تمہیں کوئی نقصان نہیں ہو گا ( راوی نے دریافت کیا : ) اور میں ، مہینے کے کون سے حصے میں روزے رکھوں ؟ انہوں نے فرمایا : ایام بیض میں ، میں نے دریافت کیا : ہم جنگ میں حصہ لیتے ہیں ، قیدی ہمارے ہاتھ لگ جاتے ہیں ، تو کیا میں اپنی والدہ کی طرف سے کسی کو آزاد کر سکتا ہوں ؟ جبکہ انہوں نے مجھے اس کی ہدایت بھی نہ کی ہو ، تو سیدنا عبداللہ بن عباس رضی اللہ عنہما نے فرمایا : تم اپنی والدہ کی طرف سے غلام آزاد کر دو ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔