مجمع الزوائد ومنبع الفوائد

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دنیا میں مومنین تین قسم کے ہوتے ہیں ( پہلی قسم ) وہ لوگ ، جو اللہ اور اس کے رسول پر ایمان رکھتے ہیں اور پھر کسی شک کا شکار نہیں ہوتے ہیں ، وہ اپنے اموال اور جانوں کے ہمراہ اللہ تعالی کی راہ میں جہاد کرتے ہیں ( دوسری قسم ) وہ لوگ کہ (دوسرے ) لوگ اپنے اموال اور جانوں کے حوالے سے اُن سے محفوظ ہوں اور پھر ( تیسری قسم ) وہ لوگ کہ جب اُن کے سامنے لالچ کی کوئی چیز آ جائے ، تو وہ اللہ تعالی کی خاطر اسے ترک کر دیتے ہیں “ ۔
یہ روایت امام أحمد نے نقل کی ہے ، اس کی سند میں ایک راوی ” دراج “ ہے ، جس کو یحیی بن معین نے ثقہ قرار دیا ہے اور دیگر حضرات نے اسے ضعیف قرار دیا ہے ۔

سیدنا عبداللہ بن عمر رضی اللہ عنہما وایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ہمیں ایسی کسی چیز کا علم نہیں ہے ، جو اپنے ہی جیسی ” ایک سو “ چیزوں سے زیادہ بہتر ہو ، البتہ مؤمن شخص کا معاملہ مختلف ہے “ ۔ یہ روایت امام أحمد نے اور امام طبرانی نے معجم اوسط اور معجم صغیر میں نقل کی ہے ، البتہ امام طبرانی نے روایت میں یہ الفاظ نقل کئے ہیں : ” ہمیں ایسی کسی چیز کا علم نہیں ہے ، جو اپنے جیسی ” ایک ہزار “ چیزوں سے زیادہ بہتر ہو “۔
اس کی سند کا مدار ، اسامہ بن زید بن اسلم ، نامی راوی پر ہے اور وہ بہت زیادہ ضعیف ہے ۔