مجمع الزوائد ومنبع الفوائد

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” آسانی فراہم کرو ! تنگی میں مبتلا نہ کرو ، تسکین فراہم کرو ، متنفر نہ کرو ۔ “
یہ روایت امام بزار نے نقل کی ہے اور اس کے رجال ثقہ ہیں ۔

ایک دیہاتی کے حوالے سے یہ بات منقول ہے : جنہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تمہارے دین میں سب سے بہتر وہ ہے ، جو سب سے زیادہ آسان ہو “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عروہ فقیمی بیان کرتے ہیں : ہم لوگ اللہ کے رسول کا انتظار کر رہے تھے ( یعنی ہم نے انہیں پہلے نہیں دیکھا تھا ) ایک صاحب تشریف لائے ، جن کے سر سے وضو ، یا شاید غسل کی وجہ سے ، پانی کے قطرے چمک رہے تھے ، انہوں نے نماز پڑھانی شروع کی ، جب وہ نماز سے فارغ ہوئے ، تو لوگوں نے اُن سے سوال کرتے ہوئے کہا: اے اللہ کے رسول ! کیا اس صورت میں ہم پر کوئی گناہ ہو گا ؟ نبی اکرم صلی اللہ علیہ وسلم نے ارشاد فرمایا : اے لوگو ! اللہ کا دین آسانی میں ہے ، یہ بات آپ صلی اللہ علیہ وسلم نے تین مرتبہ ارشاد فرمائی ، ( یہاں یزید نامی راوی نے ایک مرتبہ یہ الفاظ نقل کئے ہیں : ) لوگوں نے یہ کہنا شروع کیا : اے اللہ کے رسول ! افلاں صورت کے بارے میں ، آپ صلی اللہ علیہ وسلم کیا کہتے ہیں ؟ فلاں صورت کے بارے میں آپ صلی اللہ علیہ وسلم کیا کہتے ہیں ؟ فلاں صورت کے بارے میں آپ صلی اللہ علیہ وسلم کیا کہتے ہیں ؟
یہ روایت امام أحمد نے ، امام طبرانی نے معجم کبیر میں ، اور امام ابویعلیٰ نے نقل کی ہے ، اس کی سند میں ایک راوی حسن بن ہلال ہے ، جسے ابوحاتم اور امام ابوداؤد نے ثقہ قرار دیا ہے ، جبکہ امام نسائی رحمہ اللہ اور دیگر حضرات نے اسے ضعیف قرار دیا ہے ، حاضرہ نامی راوی سے عاصم نامی اس راوی کے علاوہ ، اور کسی نے روایت نقل نہیں کی ہے ، امام مزی نے اسی طرح اُس کا ذکر کیا ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” یہ دین مضبوط ہے ، تو تم لوگ اس میں نرمی کے ساتھ رہو “ ۔
یہ روایت امام أحمد نے نقل کی ہے اور اس کے رجال کی توثیق کی گئی ہے ، البتہ یہ ہے کہ خلف بن مہران نامی راوی نے سیدنا انس رضی اللہ عنہ کا زمانہ نہیں پایا ہے ، باقی اللہ بہتر جانتا ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” یہ دین مضبوط ہے ، تو تم لوگ اس میں نرمی کے ساتھ رہو ! کیونکہ جو شخص تیزی سے سفر کرتا ہے نہ تو زمین پار کرتا ہے ، اور نہ ہی ( جانور پر ) گوشت کو باقی رہنے دیتا ہے “ ۔
یہ روایت امام بزار نے نقل کی ہے ، اس کی سند میں ایک راوی یحییٰ بن متوکل ابوعقیل ہے اور وہ کذاب ہے ۔

سیدنا بریدہ اسلمی رضی اللہ عنہ بیان کرتے ہیں : ایک دن میں کسی کام کے سلسلے میں باہر نکلا ، تو میں نے دیکھا کہ نبی اکرم صلی اللہ علیہ وسلم مجھ سے آگے جا رہے ہیں ، نبی اکرم صلی اللہ علیہ وسلم نے میرا ہاتھ پکڑا اور ہم ایک ساتھ چلنے لگے ، ہمیں اپنے سامنے ایک شخص نظر آیا ، جو نماز ادا کر رہا تھا اور بکثرت رکوع و سجود کر رہا تھا ، نبی اکرم صلی اللہ علیہ وسلم نے ارشاد فرمایا : کیا اس شخص کے بارے میں ، تم یہ سمجھتے ہو ؟ کہ یہ دکھاوا کر رہا ہے ؟ میں نے عرض کی : اللہ اور اُس کا رسول زیادہ بہتر جانتے ہیں ، نبی اکرم صلی اللہ علیہ وسلم نے میرے ہاتھ سے اپنا ہاتھ چھڑا کر اپنے دونوں ہاتھ ملا لئے ، انہیں نیچے کیا ، پھر انہیں بلند کیا اور پھر ارشاد فرمایا : ” تم پر میانہ روی کا طریقہ اختیار کرنا لازم ہے ، تم پر میانہ روی کا طریقہ اختیار کرنا لازم ہے ، تم پر میانہ روی کا طریقہ اختیار کرنا لازم ہے ، کیونکہ جو شخص اس دین کے بارے میں سختی سے کام لے گا ، یہ دین اس پر غالب آ جائے گا “ ۔
یہ روایت امام أحمد نے نقل کی ہے اور اس کے رجال کی توثیق کی گئی ہے ۔

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اسلام آسان ہے اور اس پر صرف آسان شخص ہی سوار ہو سکتا ہے “ ۔
یہ روایت امام أحمد نے نقل کی ہے ، اس کی سند میں ایک راوی ابوخلف نابینا ہے اور وہ منکرالحدیث ہے ۔

سیدنا سہل بن حنیف رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اپنی ذات کے حوالے سے شدت اختیار نہ کرو ! کیونکہ تم سے پہلے کے لوگ ، اپنی ذات کے حوالے سے شدت اختیار کرنے کی وجہ سے ہلاکت کا شکار ہو گئے اور اُن لوگوں کے بقایا جات کو تم گرجا گھروں اور مندروں میں پاؤ گے ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی عبداللہ بن صالح ہے ، جو لیث بن سعد کا کاتب ہے ، ایک جماعت نے اسے ثقہ قرار دیا ہے اور دوسرے لوگوں نے اسے ضعیف قرار دیا ہے ۔

سیدنا سمرہ بن جندب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ غلو سے بچو ! کیونکہ بنی اسرائیل میں سے بہت سے لوگوں نے غلو اختیار کیا ، یہاں تک کہ ایک چھوٹے قد کی عورت نے لکڑی کے جوتے بنوائے ، اور ان میں پاؤں داخل کیے ، پھر وہ ایک طویل القامت عورت کے ساتھ کھڑی ہوئی اور اس کے ساتھ چلنے لگی ، تو وہ اس کے برابر کے قد کی ، یا اس سے طویل محسوس ہوتی تھی “ ۔
یہ روایت امام بزار نے نقل کی ہے ، اس کی سند میں ایک راوی یوسف بن خالد سمتی ہے ، یحییٰ بن معین کہتے ہیں : یہ کذب اور خبیث ہے ۔

سیدنا عبداللہ بن بسر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میانہ روی اختیار کرو ! اور یہ خوش خبری حاصل کرو کہ اللہ تعالیٰ تمہارے عذاب کی طرف جلدی کرنے والا نہیں ہے اور عنقریب ایسی قوم آئے گی ، جن کے پاس کوئی حجت نہیں ہو گی “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی بقیہ ہے ، لیکن اُس نے ( اس روایت میں ) تحدیث کی صراحت کی ہے