مجمع الزوائد ومنبع الفوائد

سیدنا عثمان غنی رضی اللہ عنہ بیان کرتے ہیں : میری یہ خواہش تھی کہ میں نے نبی اکرم صلی اللہ علیہ وسلم سے اس بارے میں دریافت کیا ہوتا ، کہ شیطان ہمارے من میں جو چیز ڈال دیتا ہے ، اُس سے نجات کا طریقہ کیا ہے ؟ تو سیدنا ابوبکر رضی اللہ عنہ نے بتایا : میں نے نبی اکرم صلی اللہ علیہ وسلم سے اس بارے میں سوال کیا تھا ، تو نبی اکرم صلی اللہ علیہ وسلم نے ارشاد فرمایا : ”اس سے تمہیں یہ چیز نجات دلائے گی کہ تم وہ کلمہ پڑھ لو ، جو میں نے اپنے چچا کو ، ان کے انتقال کے وقت پڑھنے کا کہا: تھا ، اور انہوں نے ایسا نہیں کیا تھا ۔“
یہ روایت امام أحمد نے نقل کی ہے ، اس کی سند میں ایک راوی ابوحویرث عبدالرحمن بن معاویہ ہے ، ابن حبان نے اس کا تذکرہ ”کتاب الثقات “میں کیا ہے ، تاہم زیادہ تر محدثین نے اسے ضعیف قرار دیا ہے ۔

سیدنا خزیمہ بن ثابت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شیطان انسان کے پاس آتا ہے ، اور کہتا ہے : آسمانوں کو کس نے پیدا کیا ہے ؟ آدمی کہتا ہے : اللہ تعالی نے ، شیطان کہتا ہے : زمین کو کس نے پیدا کیا ہے ؟ آدمی کہتا ہے : اللہ تعالیٰ نے ، یہاں تک کہ شیطان کہتا ہے : اللہ تعالی کو کس نے پیدا کیا ہے ؟ جب کوئی شخص اس طرح کی صورتحال پائے ، تو اُسے یہ کہنا چاہیے : میں اللہ تعالیٰ اور اُس کے رسونوں پر ایمان رکھتا ہوں “ ۔

یہ روایت امام أحمد نے اور امام طبرانی نے معجم کبیر میں ، ایسی سند کے ساتھ نقل کی ہے ، جس میں ایک راوی ابن لہیعہ ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا ہے : ” تم میں سے کسی ایک کے پاس شیطان آتا ہے اور یہ کہتا ہے : تمہیں کس نے پیدا کیا ہے ؟ آدمی کہتا ہے : اللہ تعالٰی نے شیطان کہتا ہے : اللہ تعالیٰ کو کس نے پیدا کیا ہے ؟ ( نبی اکرم صلی اللہ علیہ وسلم فرماتے ہیں : ) جب کوئی شخص ایسی صورتحال پائے ، تو اسے یہ کہنا چاہیے : میں اللہ تعالیٰ اور اس کے رسول پر ایمان رکھتا ہوں ، تو یہ چیز ( یعنی وسوسہ ) اُس سے دور ہو جائے گا “ ۔
یه روایت امام أحمد ، امام ابویعلیٰ اور امام بزار نے نقل کی ہے اور اس کے رجال ثقہ ہیں ۔

سیدہ عائشہ صدیقہ بیان کرتی ہیں : کچھ لوگوں نے نبی اکرم صلی اللہ علیہ وسلم کے سامنے وسوسے آنے کے حوالے سے شکایت کی انہوں نے عرض کی : یا رسول اللہ ! ہم ایسا خیال بھی پاتے ہیں کہ اگر ہم میں سے کوئی ایک آسمان سے گر جائے ، تو یہ اُس کے نزدیک اس خیال کے بارے میں بات کرنے سے زیادہ پسندیدہ ہو گا ، نبی اکرم صلی اللہ علیہ وسلم نے ارشاد فرمایا :” یہ محض ایمان ہے“ ۔
یہ روایت امام أحمد نے اور امام ابویعلیٰ نے ، اس کی مانند نقل کی ہے ، تاہم امام ابویعلیٰ کے الفاظ یہ ہیں : ” ایک شخص نے سیدہ عائشہ رضی اللہ عنہا سے کہا: ہم میں سے کسی ایک شخص کو بعض اوقات ایسا خیال آتا ہے کہ اگر آدمی اُس کے بارے میں بات کر لے ، تو اس کی آخرت تباہ ہو جائے اور اگر وہ اُس خیال کو ظاہر کرئے تو اسے قتل کر دیا جائے راوی بیان کرتے ہیں : سیدہ عائشہ رضی اللہ عنہا نے تین مرتبہ تکبیر کہی ، پھر انہوں نے فرمایا : ” نبی اکرم صلی اللہ علیہ وسلم سے بھی اس بارے میں دریافت کیا گیا تھا ، تو آپ صلی اللہ علیہ وسلم نے تین مرتبہ تکبیر کہی تھی اور پھر یہ ارشاد فرمایا تھا : اس کے ذریعے مؤمن کا امتحان لیا جاتا ہے “ ۔
اس روایت کی سند میں ، ایک راوی شہر بن حوشب ہے ۔

محمد بن جبیر بیان کرتے ہیں : سیدنا عمر رضی اللہ عنہ کا گزر سیدنا عثمان رضی اللہ عنہ کے پاس سے ہوا ، جو مسجد میں بیٹھے ہوئے تھے ، سیدنا عمر رضی اللہ عنہ نے انہیں سلام کیا ، لیکن انہوں نے جواب نہیں دیا ، سیدنا عمر رضی اللہ عنہ سیدنا ابوبکر رضی اللہ عنہ کے پاس گئے اور ان کے سامنے شکایت کی ، اور یہ بتایا کہ میں عثمان کے پاس سے گزرا تھا ، میں نے اُسے سلام کیا تھا ، لیکن اس نے مجھے جواب نہیں دیا ، سیدنا ابوبکر رضی اللہ عنہ نے دریافت کیا : وہ کہاں ہے ؟ سیدنا عمر رضی اللہ عنہ نے بتایا : وہ مسجد میں بیٹھا ہوا ہے ، یہ دونوں حضرات ، سیدنا عثمان رضی اللہ عنہ کے پاس گئے ، تو سیدنا ابوبکر رضی اللہ عنہ نے اُن سے دریافت کیا : آپ کے بھائی نے جب آپ کو سلام کیا تھا ، تو آپ نے اسے جواب کیوں نہیں دیا ؟ سیدنا عثمان رضی اللہ عنہ نے کہا: اللہ کی قسم ! مجھے تو پتہ ہی نہیں چلا کہ یہ میرے پاس سے گزرے ہیں ، میں اپنے خیالوں میں گم تھا ، اس لیے مجھے پتہ نہیں چل سکا ، کہ انہوں نے سلام کیا ہے ، سیدنا ابوبکر رضی اللہ عنہ نے دریافت کیا : آپ کن خیالوں میں گم تھے ؟ سیدنا عثمان رضی اللہ عنہ نے بتایا : جب میں اکیلا ہوتا ہوں ، تو شیطان میرے ذہن میں ایسے خیالات ڈالتا ہے کہ مجھے یہ پسند نہیں ہے ، کہ میں اُن کے بارے میں بات چیت کروں ، اگرچہ اس کے بدلے میں مجھے روئے زمین پر موجود ہر چیز مل رہی ہو ، جب شیطان میرے ذہن میں اس طرح کے خیال ڈالتا ہے ، تو میں دل میں سوچتا ہوں ، کاش میں نے نبی اکرم صلی اللہ علیہ وسلم سے اس بارے میں دریافت کیا ہوتا ، کہ شیطان ہمارے ذہنوں میں اس طرح کے خیال پیدا کرتا ہے تو اس سے کیا چیز ہمیں نجات دے سکتی ہے ؟ سیدنا ابوبکر رضی اللہ عنہ بولے : اللہ کی قسم ! میں نے نبی اکرم صلی اللہ علیہ وسلم کے سامنے اسی چیز کی شکایت کی تھی اور میں نے آپ صلی اللہ علیہ وسلم سے یہ سوال کیا تھا ، شیطان ہمارے ذہنوں میں جو خیال ڈالتا ہے ، کیا چیز اُس سے ہمیں نجات دے سکتی ہے ؟ تو نبی اکرم صلی اللہ علیہ وسلم نے ارشاد فرمایا تھا : اس سے تمہیں وہ چیز نجات دے سکتی ہے ، کہ تم وہ ( کلمہ ) پڑھو ، جو میں نے اپنے چچا کو پڑھنے کے لیے کہا تھا ، جب اُن کا انتقال ہونے لگا تھا ، تو انہوں نے ایسا نہیں کیا تھا “ ۔
یہ روایت امام ابویعلیٰ نے نقل کی ہے ، امام أحمد نے اس کا ایک حصہ نقل کیا ہے ، اس کی سند میں ایک راوی ابوحویرث عبدالرحمن بن معاویہ ہے ، جسے ابن حبان نے ثقہ قرار دیا ہے ، تاہم اکثر اہل علم نے اسے ضعیف قرار دیا ہے ، باقی اللہ بہتر جانتا ہے ۔

سیدنا انس بن مالک رضی اللہ عنہ بیان کرتے ہیں : لوگوں نے عرض کی : یا رسول اللہ ! اس بارے میں آپ کی کیا رائے ہے ؟ کہ بعض اوقات ہم میں سے کسی ایک کو ایسا خیال آتا ہے کہ اگر وہ آسمان سے گرے اور اس کے ٹکڑے ہو جائیں ، تو یہ چیز اُس شخص کے نزدیک اس سے زیادہ پسندیدہ ہو گی کہ وہ اس خیال کے بارے میں کلام کرے ، تو نبی اکرم صلی اللہ علیہ وسلم نے ارشاد فرمایا :” یہ محض ایمان ہے “ ۔
یہ روایت امام ابویعلیٰ نے نقل کی ہے ، اس کے راوی صحیح کے رجال ہیں ، صرف یزید بن ابان رقاشی کا معاملہ مختلف ہے ۔

سیدنا انس رضی اللہ عنہ بیان کرتے ہیں : لوگوں نے عرض کی : یا رسول اللہ ! جب ہم آپ کے پاس ہوتے ہیں ، تو ہماری مخصوص کیفیت ہوتی ہے ، اور جب ہم آپ سے جدا ہوتے ہیں ، تو وہ کیفیت تبدیل ہو جاتی ہے ، نبی اکرم صلی اللہ علیہ وسلم نے ارشاد فرمایا : ” تمہارا ، اپنے نبی کے ساتھ تعلق کیسا ہے ؟ “ انہوں نے عرض کی : پوشیدہ اور علانیہ ( ہر حال میں ) آپ صلی اللہ علیہ وسلم ہمارے نبی ہیں ، نبی اکرم صلی اللہ علیہ وسلم نے ارشاد فرمایا : ” یہ چیز ( یعنی کیفیات کا تبدیل ہونا ) منافقت نہیں ہے “ ۔ یہ روایت امام ابویعلیٰ اور امام بزار نے نقل کی ہے ، تاہم امام بزار کے الفاظ یہ ہیں : ” تمہارا اور تمہارے پروردگار کا تعلق کیسا ہے ؟ لوگوں نے عرض کی : پوشیدہ اور علانیہ ( ہر حال میں ) اللہ تعالی ہمارا پروردگار ہے “ ۔
امام ابویعلیٰ کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” شیطان تم میں سے کسی ایک کے پاس آتا ہے ، اور کہتا ہے : آسمان کو کس نے پیدا کیا ہے ؟ بندہ کہتا ہے : اللہ تعالٰی نے وہ پوچھتا ہے : زمین کو کس نے پیدا کیا ہے ؟ بندہ کہتا ہے : اللہ تعالیٰ نے ، وہ پوچھتا ہے : اللہ تعالیٰ کو کس نے پیدا کیا ہے ؟ ( نبی اکرم صلی اللہ علیہ وسلم فرماتے ہیں : ) جب کوئی شخص یہ صورتحال پائے ، تو اُسے یہ کہنا چاہیے : میں اللہ تعالٰی اور اُس کے رسولوں پر ایمان رکھتا ہوں “ ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کے رجال صحیح کے رجال ہیں ، صرف أحمد بن محمد بن نافع طحان کا معاملہ مختلف ہے ، جو امام طبرانی کے استاد ہیں ۔

سیدنا عبداللہ بن عباس بیان کرتے ہیں : ایک شخص نے نبی اکرم صلی اللہ علیہ وسلم کی خدمت میں عرض کی : مجھے بعض اوقات ایسا خیال آتا ہے کہ میں کوئلہ بن جاؤں ، یہ میرے نزدیک اس سے زیادہ پسندیدہ ہو گا ، کہ میں اس خیال کے حوالے سے کلام کروں ، تو نبی اکرم صلی اللہ علیہ وسلم نے ارشاد فرمایا : ”یہ صریح ایمان ہے “ ۔
یہ روایت امام طبرانی نے معجم صغیر میں نقل کی ہے اور اس کے رجال صحیح کے رجال ہیں ، صرف مختصر کا معاملہ مختلف ہے ، جو امام طبرانی کے استاد ہیں ۔

سیدہ ام سلمہ رضی اللہ عنہا بیان کرتی ہیں : انہوں نے نبی اکرم صلی اللہ علیہ وسلم کو سنا : ایک شخص نے آپ سے سوال کرتے ہوئے یہ کہا: میرے ذہن میں ایسا خیال آ جاتا ہے ، کہ اگر میں اس کے بارے میں کلام کروں ، تو میں اپنی آخرت کو برباد کر دوں گا ، تو نبی اکرم صلی اللہ علیہ وسلم نے ارشاد فرمایا : اس طرح کی بات ( یعنی وسوسہ ) کا سامنا ، صرف مؤمن کرتا ہے ۔
یہ روایت امام طبرانی نے معجم اوسط اور معجم صغیر میں نقل کی ہے ، اس کی سند میں ایک راوی سیف بن عمیرہ ہے ، ازدی کہتے ہیں : علماء نے اس کے بارے میں کلام کیا ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم سے وسوسہ کے بارے میں سوال کیا گیا ، تو آپ صلی اللہ علیہ وسلم نے ارشاد فرمایا : ”یہ محض ایمان ہے “۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ، امام طبرانی کے استاد بھی ثقہ ہیں ، باقی اللہ بہتر جانتا ہے

سیدنا معاذ بن جبل رضی اللہ عنہ بیان کرتے ہیں : میں نے عرض کی : یا رسول اللہ ! اُس ذات کی قسم ! جس نے آپ کو حق کے ہمراہ مبعوث کیا ہے ، بعض اوقات میرے ذہن میں ایسا خیال پیدا ہوتا ہے ، کہ میں جل کر کوئلہ بن جاؤں ، یہ میرے نزدیک اس سے زیادہ پسندیدہ ہو گا کہ میں اُس خیال کے بارے میں کلام کروں ، نبی اکرم صلی اللہ علیہ وسلم نے ارشاد فرمایا :” اس بات پر ، ہر طرح کی حمد ، اللہ تعالیٰ کے لیے مخصوص ہے ، کہ شیطان اس بات سے مایوس ہو چکا ہے ، کہ اب میری اس سرزمین پر اُس کی عبادت کی جائے ، البتہ اب وہ تمہارے اعمال میں سے ، معمولی سی چیزوں ( یعنی گناہوں اور کوتاہیوں ) سے بھی راضی ہو جائے گا “۔
یہ روایت امام طبرانی نے معجم کبیر میں نقل کی ہے ، یہ روایت ذر بن عبداللہ نے سیدنا معاذ رضی اللہ عنہ سے نقل کی ہے ، حالانکہ انہوں نے سیدنا معاذ رضی اللہ عنہ کا زمانہ نہیں پایا ہے ۔

عمارہ بن ابوالحسن ، یا شاید عمارہ بن حسن ، اپنے چچا کے حوالے سے یہ بات نقل کرتے ہیں : لوگوں نے نبی اکرم صلی اللہ علیہ وسلم سے اس وسوسہ کے بارے میں دریافت کیا ، جس کا سامنا اُن میں سے کوئی ایک کرتا ہے ، کہ اس کا ثریا ستارے سے گر جانا ، اُس شخص کے نزدیک اس سے زیادہ پسندیدہ ہو گا کہ وہ شخص اُس وسوسے کے حوالے سے کلام کرے ، راوی بیان کرتے ہیں : تو نبی اکرم صلی اللہ علیہ وسلم نے ارشاد فرمایا : یہ صریح ایمان ہے ، بیشک شیطان ، بندے کے پاس ، اس سے کم معاملے کے بارے میں آتا ہے ، تو جب وہ اس سے محفوظ ہو جاتا ہے تو پھر کسی دوسرے میں مبتلا ہو جاتا ہے ۔
یہ روایت امام بزار نے روایت کی ہے اور اس کے رجال ثقہ ائمہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ”لوگ مسلسل یہ کہتے رہیں گے اللہ تعالیٰ ہر چیز سے پہلے تھا ، اس سے پہلے کیا تھا ؟“
یہ روایت امام بزار نے نقل کی ہے ” صحیح “ میں اس راوی کے حوالے سے اس کے علاوہ ایک اور روایت منقول ہے اور اس کے رجال کی توثیق کی گئی ہے ۔