اللؤلؤ والمرجان

حضرت انس بن مالک رضی اللہ عنہ نے بیان کیا کہ نبی کریم صلی اللہ علیہ وسلم نے فرمایا ’’جب اہل کتاب تمہیں سلام کریں تو تم اس کے جواب میں صرف ’’وعلیکم‘‘ کہو۔‘‘

حضرت عبداللہ بن عمر رضی اللہ عنہمانے بیان کیا کہ رسول اللہ صلی اللہ علیہ وسلم نے فرمایا جب تمہیں یہودی سلام کریں اور اگر ان میں سے کوئی ’’السام علیک‘‘ کہے تو تم اس کے جواب میں صرف ’’وعلیک‘‘ (اور تمہیں بھی) کہہ دیا کرو۔

حضرت عائشہ رضی اللہ عنہانے بیان کیا کہ کچھ یہودی رسول اللہ صلی اللہ علیہ وسلم کی خدمت میں حاضر ہوئے اور کہا کہ ’’السام علیک‘‘ (تمہیں موت آئے) میں ان کی بات سمجھ گئی اور میں نے جواب دیا ’’علیکم السام واللعنۃ‘‘ آنحضرت صلی اللہ علیہ وسلم نے فرمایا: عائشہ صبر سے کام لے کیونکہ اللہ تعالیٰ تمام معاملات میں نرمی کو پسند کرتا ہے، میں نے عرض کیا: یا رسول اللہ!کیا آپ نے نہیں سنا کہ انہوں نے کیا کہا تھا؟ آنحضرت صلی اللہ علیہ وسلم نے فرمایا کہ میں نے ان کا جواب دے دیا تھا کہ ’’وعلیکم‘‘ (اور تمہیں بھی)۔