الفتح الربانی

فوائد: … صبح کے پھٹنے سے مراد یہ ہے وہ خواب آپ صلی اللہ علیہ وآلہ وسلم کو بیداری میں واضح طور پر پورا ہوتا ہوا نظر آتا، خوابوں کا سلسلہ فرشتے اور وحی کے لیے تمہید ہوتا ہے، اس سلسلے کی وجہ سے بشری قوتیں وحی کا بار برداشت کرنے کے لیے تیار ہو جاتی ہیں۔
سیدہ خدیجہ رضی اللہ عنہا کا آپ صلی اللہ علیہ وآلہ وسلم کے مکارم اور خصائل کا ذکر کر کے آپ صلی اللہ علیہ وآلہ وسلم کو تسلی دینا، اس سے معلوم ہوا کہ مکارمِ اخلاق اور خصائل خیریہ برے انجام سے سلامتی کا سبب ہوتے ہیں۔
وحی کا نزول نبی کریم صلی اللہ علیہ وآلہ وسلم کو انسانیت میں سب سے بڑا منصب عطا کرنے کے لیے تھا، لیکن آپ صلی اللہ علیہ وآلہ وسلم کے کندھوں کے گوشت کا کانپنا، سیدہ خدیجہ رضی اللہ عنہا کا آپ صلی اللہ علیہ وآلہ وسلم کے مطالبے پر آپ صلی اللہ علیہ وآلہ وسلم کو کپڑا اوڑھا دینا، پھر آپ صلی اللہ علیہ وآلہ وسلم کا فرمانا کہ خدیجہ! مجھے کیا ہو گیا؟ میں اپنے بارے میں ڈر رہا ہوں۔ پھر جب کچھ عرصہ تک وحی رکی رہی تو آپ صلی اللہ علیہ وآلہ وسلم کا حدیث کے آخری حصے میں بیان کی گئی کیفیت میں مبتلا ہو جانا۔
ان امور میں کوئی چیز بھی ایسی نہیں ہے، جس کی وجہ سے احادیث ِ مبارکہ یا ان کے ثقہ راویوں پر اعتراض کیا جا سکے، اسی قسم کی کیفیتوں کو ہلکا کرنے کے لیے آپ صلی اللہ علیہ وآلہ وسلم کو غارِ حراء میں جانے کی توفیق بخشی گئی اور آپ صلی اللہ علیہ وآلہ وسلم کے لیے خوابوں کاسلسلہ شروع کیا گیا۔ دراصل ابتداء میں بارِ نبوت کو برداشت کرنا بشری قوتوں کے لیے خاصا مشکل مرحلہ ہوتا ہے، بعد میں تو آپ صلی اللہ علیہ وآلہ وسلم جبریل علیہ السلام کی تاخیر کی وجہ سے پریشان ہو جاتے تھے، جبکہ یہ ہمارا اندازہ ہے، حقیقت میں انبیاء و رسل ہی بہتر جانتے ہیں کہ وصولِ نبوت کا بوجھ کیسا ہوتا ہے، سخت سردی میں نزول وحیکے وقت آپ صلی اللہ علیہ وآلہ وسلم کی پیشانی مبارک سے پسینہ ٹپکنے لگتا تھا، جبکہ آپ صلی اللہ علیہ وآلہ وسلم نے خود فرمایا کہ جب وحی گھنٹی کی آواز کی طرح آتی ہے تو اس وقت آپ صلی اللہ علیہ وآلہ وسلم کو بڑی سختی اور شدت کا سامنا کرنا پڑتا ہے، جبکہ صحابۂ کرام نے آپ صلی اللہ علیہ وآلہ وسلم سے اس شدت کی کیفیت کا سوال نہیں کیا، دیکھیں جب موسی علیہ السلام نے اللہ تعالیٰ کی تجلی کی وجہ سے پہاڑ کو ریزہ ریزہ ہوتے ہوئے دیکھا تو وہ بیہوش ہو کر گر پڑے، جبکہ چند لمحے پہلے وہی اللہ تعالیٰ کے دیدار کا اصرار کر رہے تھے۔
آخر میں آپ صلی اللہ علیہ وآلہ وسلم کا جو اضطراب بیان کیا گیا ہے، اس کی ایک وجہ یہ بھی بیان کی گئی ہے کہ جب کچھ عرصہ وحی کا سلسلہ رکا رہا تو آپ صلی اللہ علیہ وآلہ وسلم کو یہ خدشہ ہونے لگا کہ کہیں ایسے تو نہیں ہوا کہ آپ صلی اللہ علیہ وآلہ وسلم سے کوئی ایسا فعل یا سبب سرزد ہوگیا ہو، جس کی وجہ سے آپ صلی اللہ علیہ وآلہ وسلم کو سزا مل رہی ہو، یایہ کیفیت اس غم کی وجہ سے تھی، جو وحی کی تاخیر کی وجہ سے آپ صلی اللہ علیہ وآلہ وسلم پر طاری ہو گیا، جبکہ آپ صلی اللہ علیہ وآلہ وسلم کو یہ اطلاع تو نہیں دی گئی تھی کہ آپ اللہ کے رسول ہیں اور آپ کو بندوں کی طرف بھیجا گیا ہے۔
غور کریں کہ نبی کریم صلی اللہ علیہ وآلہ وسلم کے مقابلے میں ورقہ بن نوفل کی حیثیت کیا تھی، لیکن وہ آپ صلی اللہ علیہ وآلہ وسلم کو تسلی دلا رہا ہے، کیونکہ وہ جانتا تھا کہ انبیاء کے ساتھ ایسے ہی ہوتا ہے۔
بہتریہ ہے کہ اس حدیث ِ مبارکہ میں نبی کریم صلی اللہ علیہ وآلہ وسلم کے جو احساسات بیان کیے گئے ہیں، ان کو آپ صلی اللہ علیہ وآلہ وسلم کا طبعی تقاضا سمجھا جائے، جب آپ صلی اللہ علیہ وآلہ وسلم نے بارِ نبوت اٹھا لیا اور اپنے منصب تک پوری رسائی حاصل کر لی تو پھر آپ صلی اللہ علیہ وآلہ وسلم اس قابل ہو گئے کہ وحی کی مختلف مجلسوں میں پورا قرآن مجیدوصول کر سکیں، قرآن مجید کے علاوہ وحی کی دوسری اقسام کے ذریعے اللہ تعالیٰ کے پیغامات موصول کر سکیں، جنت و جہنم کے مناظر دیکھ سکیں، اسراء و معراج کی صورت میں آسمانوں کی سیر کر سکیں، جہنم میں پتھر گرنے اور آسمان کے دروازے کھلنے کی آواز سن سکیں، قبروں میںعذاب میں مبتلا لوگوں کے عذاب کی کیفیت دیکھ سکیں، کثرت ِ عبادت میں اپنی جسمانی غذاکو محسوس کر سکیں، علی ہذا القیاس۔واللہ اعلم بالصواب۔

فوائد: … مکہ مکرمہ میں آپ صلی اللہ علیہ وآلہ وسلم نے تیرہ برس گزارے، لیکن اس روایت میں پندرہ سالوں کا ذکر ہے، دراصل اس میں نبوت کے مقدّمات کو بھی شامل کیا گیا ہے، جیسا کہ آپ صلی اللہ علیہ وآلہ وسلم کا روشنی کو دیکھنااور آواز کو سننے کے الفاظ سے ظاہر ہوتا ہے۔

فوائد: … مکہ مکرمہ میں آپ صلی اللہ علیہ وآلہ وسلم کے قیام کی مدت میں اختلاف ہے، اس مدت کی وجہ سے آپ صلی اللہ علیہ وآلہ وسلم کی عمر میں بھی اختلاف پڑ جاتا ہے۔
امام نووی رحمتہ اللہ علیہ نے کہا: امام مسلم نے اس باب میں کل تین روایات ذکر کی ہیں: ۱۔ آپ صلی اللہ علیہ وآلہ وسلم ساٹھ برس کی عمر میں فوت ہوئے (اور مکہ میں دس برس قیام کیا)۔
۲۔ آپ صلی اللہ علیہ وآلہ وسلم کی عمر پینسٹھ برس تھی (اور مکہ میں پندرہ سال قیام کیا)۔
۳۔ آپ صلی اللہ علیہ وآلہ وسلم کی عمر تریسٹھ سال تھی (اور مکہ میں تیرہ سال قیام کیا)۔
آخری روایت زیادہ صحیح اور مشہور ہے، امام مسلم نے اس روایت کو سیدہ عائشہ، سیدنا انس اور سیدنا عبد اللہ بن عباس سے بیان کیا۔ علمائے کرام کا اتفاق ہے کہ صحیح ترین روایت تریسٹھ برس عمر والی ہے، انھوں نے باقی روایات کی توجیہ کی ہے، ساٹھ برس والی روایت کے بارے میں کہا کہ اس میں دہائیوں کا اعتبار کیا اور اکائیوں کو چھوڑ دیا (اور عرب ایسا کرتے رہتے ہیں)، اسی طرح پینسٹھ برس والی روایت کی بھی توجیہ کی جائے گی۔
یہ بات بھی اتفاقی ہے کہ آپ صلی اللہ علیہ وآلہ وسلم نے مدینہ منورہ میں دس سال قیام کیا اور نبوت سے پہلے آپ صلی اللہ علیہ وآلہ وسلم کی عمر چالیس برس تھی، اختلاف صرف مکہ میں قیام کی مدت میں ہے، راجح اور صحیحیہی ہے کہ آپ صلی اللہ علیہ وآلہ وسلم نے نبوت کے بعد مکہ میں تیرہ برس قیام کیا، اس طرح آپ صلی اللہ علیہ وآلہ وسلم کی عمر مبارک (۶۳) برس بنتی ہے۔

فوائد: … جمہور اہل علم کے نزدیک پہلی وحی {اِقْرَاْ بِاسْمِ رَبِّکَ الَّذِیْ خَلَقَ } والی آیات ہی ہیں، سیدنا جابر بن عبد اللہ رضی اللہ عنہ کی اس حدیث سے مراد دوسری وحی ہے، جو فترۂ وحی کے بعد نازل ہوئی تھی، اس حدیث کے درج ذیل سیاق پر غور کریں: سیدنا جابر بن عبد اللہ رضی اللہ عنہ فترۂ وحی کے بارے میں بیان کرتے ہوئے روایت کرتے ہیں کہ رسول اللہ صلی اللہ علیہ وآلہ وسلم نے فرمایا: ((بَیْنَا أَنَا أَمْشِی إِذْ سَمِعْتُ صَوْتًا مِنْ السَّمَاء ِ فَرَفَعْتُ بَصَرِی فَإِذَا الْمَلَکُ الَّذِی جَاء َنِی بِحِرَاء ٍ جَالِسٌ عَلٰی کُرْسِیٍّ بَیْنَ السَّمَاء ِ وَالْأَرْضِ فَرُعِبْتُ مِنْہُ فَرَجَعْتُ فَقُلْتُ زَمِّلُونِی زَمِّلُونِی فَأَنْزَلَ اللّٰہُ تَعَالَی {یَا أَیُّہَا الْمُدَّثِّرُ قُمْ فَأَنْذِرْ … إِلٰی قَوْلِہِ … وَالرُّجْزَ فَاہْجُر} فَحَمِیَ الْوَحْیُ وَتَتَابَعَ۔ … ایک مرتبہ میں چلا جا رہا تھا کہ ناگہاں آسمان کی طرف سے مجھے آواز سنائی دی، میں نے نگاہ اٹھا کر دیکھا کہ جو فرشتہ میرے پاس غار حراء میں آیا تھا وہ آسمان و زمین کے درمیان ایک کرسی پر بیٹھا ہے، میں گھبرا گیا اور گھر آتے ہی کہا کہ مجھے کپڑوں سے لپیٹ دو،چنانچہ گھر والوں نے مجھے کپڑا اوڑھا دیا اور اللہ تعالیٰ نے یہ آیات نازل فرمائیں: {یَا أَیُّھَا الْمُدَّثِّرْ قُمْ فَأَنْذِرْ وَرَبَّکَ فَکَبِّرْ وَثَیَابَکَ فَطَھِّرْوَالرُّجْزَ فَاہْجُرْ}اس کے بعد وحی پے در پے اور کثرت سے
نازل ہونے لگی۔ (صحیح بخاری، صحیح مسلم) حافظ ابن کثیر نے کہا کہ یہی سیاق محفوظ ہے، اس سے صاف پتہ چلتاہے کہ اس سے پہلے بھی کوئی وحی آئی تھی۔

فوائد: … فرشتے کا ادب کرتے ہوئے اور وحی کی شدت محسوس کرتے ہوئے آپ صلی اللہ علیہ وآلہ وسلم اس وقت مسکراتے نہیں تھے۔

فوائد: … نزول وحی کے وقت آپ صلی اللہ علیہ وآلہ وسلم پر دباؤ پڑتا تھا، جیسا کہ اگلی حدیث سے بھی معلوم ہورہا ہے، مزید دیکھیں حدیث نمبر (۱۰۴۸۹)

فوائد: … جب آپ صلی اللہ علیہ وآلہ وسلم اونٹنی پر سوار ہوتے تو نزولِ وحی کی وجہ سے اس پر بھی بوجھ پڑتا، وہ اس بوجھ کو ہلکا کرنے کے لیے اپنی گردن کو زمین پر پھیلا دیتی۔