سنن الدارقطني

یہی روایت ایک اور سند کے ہمراہ منقول ہے، تاہم اس میں یہ الفاظ ہیں: ”ہم نبی کریم صلی اللہ علیہ وسلم کے زمانہ اقدس میں ام ولد کو فروخت کر دیا کرتے تھے۔“

سعید بن مسیب بیان کرتے ہیں: سیدنا عمر رضی اللہ عنہ نے ام ولد کنیزوں کو آزاد قرار دیا تھا، سیدنا عمر رضی اللہ عنہ نے یہ بات بیان کی تھی: نبی کریم صلی اللہ علیہ وسلم نے بھی انہیں آزاد قرار دیا ہے۔

سیدنا علی رضی اللہ عنہ کے بارے میں یہ بات منقول ہے: ایک مرتبہ انہوں نے ایک کنیز اور اس کے بچے کے درمیان علیحدگی کر دی تھی، تو نبی کریم صلی اللہ علیہ وسلم نے انہیں اس بات سے منع کیا تھا اور اس سودے کو ختم کر دیا تھا۔

سلیمان بن یسار بیان کرتے ہیں: ایک مرتبہ میں سیدنا زید بن ثابت رضی اللہ عنہ کے پاس بیٹھا ہوا تھا، ان کے پاس انصار کا ایک نوجوان آیا اور اس نے بتایا: میری ایک چچا زاد ہے، جس کا میں ولی ہوں، اس نے مدبر کے طور پر اپنی کنیز کو آزاد کر دیا ہے، اس (چچا زاد) کے پاس اس کنیز کے علاوہ اور کوئی مال نہیں ہے، تو سیدنا زید نے فرمایا: جب تک (تمہارا وہ چچا زاد) زندہ ہے، اس وقت تک تم اس کے ساتھ صلہ رحمی کرو۔ ابوبکر نامی راوی نے یہ کہا ہے: یہ حدیث ”غریب“ ہے۔

سیدنا عبداللہ بن عمر رضی اللہ عنہما ارشاد فرماتے ہیں: مدبرہ کنیزوں کی اولاد، ان کی آزادی کے ساتھ آزاد شمار ہو گی اور ان کی غلامی کے ساتھ غلام شمار ہو گی۔

سیدنا جابر رضی اللہ عنہ بیان کرتے ہیں کہ نبی کریم صلی اللہ علیہ وسلم کے زمانہ اقدس میں ایک شخص نے اپنے غلام کو آزاد کر دیا، اس نے مدبر کے طور پر اسے آزاد کیا تھا، تو نبی کریم صلی اللہ علیہ وسلم نے اس شخص کو یہ ہدایت کی کہ وہ اس غلام کو فروخت کر کے اپنے قرض کو ادا کر لے، تو اس شخص نے اس غلام کو آٹھ سو درہم میں فروخت کیا تھا۔ ابوجعفر نامی راوی بیان کرتے ہیں: جس وقت سیدنا جابر رضی اللہ عنہ نے یہ بات بیان کی، اس وقت میں بھی وہاں موجود تھا، انہوں نے اس بات کی اجازت دی تھی کہ اس کی خدمات کو فروخت کیا جا سکتا ہے۔ اس روایت کا راوی عبدالغفار ”ضعیف“ ہے، دیگر راویوں نے اسے ابوجعفر نامی راوی کے حوالے سے ”مرسل“ روایت کے طور پر نقل کیا ہے۔

ابوجعفر نامی راوی (شاید یہ امام باقر رضی اللہ عنہ ہیں) بیان کرتے ہیں کہ نبی کریم صلی اللہ علیہ وسلم نے مدبرہ کنیز کی خدمات کو فروخت کیا تھا۔

ابوجعفر نامی راوی بیان کرتے ہیں: نبی کریم صلی اللہ علیہ وسلم نے مدبرہ کنیز کی خدمات کو فروخت کیا تھا۔ ابوبکر نامی راوی بیان کرتے ہیں: مجھے اس بارے میں صرف یہی حدیث مل سکی ہے اور ابوجعفر نامی راوی اگرچہ ثقہ ہیں، لیکن ان کی روایت ”مرسل“ ہے۔

سیدنا جابر بن عبداللہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”مدبر کی خدمات فروخت کرنے میں کوئی حرج نہیں ہے، جبکہ وہ ضرورت مند ہو۔“ ابن طریف نامی راوی کے حوالے سے منقول ہونے کے اعتبار سے یہ روایت غلط ہے، صحیح روایت یہ ہے کہ اسے عبدالملک نامی راوی نے ابوجعفر نامی راوی سے ”مرسل“ روایت کے طور پر نقل کیا ہے اور یہ روایت پہلے گزر چکی ہے۔

سیدنا جابر رضی اللہ عنہ بیان کرتے ہیں کہ نبی کریم صلی اللہ علیہ وسلم نے مدبر کو فروخت کرنے کا حکم دیا ہے۔

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”مدبر (کی آزادی کا فیصلہ میت کے) ایک تہائی مال میں سے ہو گا۔“

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”مدبر غلام کو فروخت نہیں کیا جا سکتا، اسے ہبہ نہیں کیا جا سکتا، (میت کے) ایک تہائی مال میں سے وہ آزاد شمار ہو گا۔“ اس روایت کو صرف عبیدہ بن حسان نامی راوی نے سند کے ساتھ نقل کیا ہے اور یہ راوی ضعیف ہے۔ یہ روایت سیدنا عبداللہ بن عمر رضی اللہ عنہما کے حوالے سے ”موقوف“ روایت کے طور پر، یعنی ان کے اپنے قول کے طور پر منقول ہے۔

سیدنا عبداللہ بن عمر رضی اللہ عنہما کے بارے میں یہ بات منقول ہے: وہ مدبر کو فروخت کرنے کو مکروہ سمجھتے تھے۔ یہی روایت مستند ہے اور یہ روایت ”موقوف“ ہے۔ اس سے پہلے کی روایت، جو ”مرفوع“ حدیث کے طور پر منقول ہے، وہ ثابت نہیں ہے اور اس کے راوی ضعیف ہیں۔

سیدنا جابر رضی اللہ عنہ بیان کرتے ہیں کہ ایک مرتبہ ایک شخص فوت ہو گیا، اس نے ایک مدبر غلام کو بھی چھوڑا اور کچھ قرض بھی چھوڑا، تو نبی کریم صلی اللہ علیہ وسلم نے اس کے ورثاء کو یہ حکم دیا کہ وہ اس قرض کی ادائیگی کے لیے اس مدبر غلام کو فروخت کر دیں، تو ان لوگوں نے اس غلام کو آٹھ سو (درہم) کے عوض میں فروخت کیا۔ ابوبکر نامی محدث نے یہ بات بیان کی ہے کہ روایت کے یہ الفاظ: ایک شخص فوت ہو گیا، اس میں راوی کو غلطی ہوئی ہے، کیونکہ دیگر راویوں نے یہ بات نقل کی ہے: (اس کے آقا نے خود اس غلام کو آزاد کیا تھا) نبی کریم صلی اللہ علیہ وسلم نے اس غلام کی قیمت اس کے آقا کو ادا کرتے ہوئے فرمایا تھا کہ اس کے ذریعے تم اپنا قرض ادا کر لو۔ اسی طرح دیگر راویوں نے سیدنا جابر رضی اللہ عنہ کے حوالے سے یہ بات نقل کی ہے کہ جس دن اس غلام کو فروخت کیا گیا تھا، اس وقت اس کا آقا زندہ تھا۔

سیدہ عائشہ رضی اللہ عنہا کے بارے میں یہ بات منقول ہے کہ ایک مرتبہ وہ بیمار ہو گئیں، تو ان کے کسی بھتیجے نے ان کی بیماری کا تذکرہ ”زط“ قبیلے سے تعلق رکھنے والے کسی شخص سے کیا، جو طبیب تھا، تو وہ شخص بولا: تم جن کے بارے میں بتا رہے ہو، اس خاتون پر جادو کیا گیا ہے اور یہ جادو اس کی کسی کنیز نے کیا ہے، جس کی گود میں اس وقت بچہ بھی موجود ہے اور اس بچے نے اس عورت کی گود میں پیشاب کیا تھا۔ ان بھتیجوں نے اس بات کا تذکرہ سیدہ عائشہ سے کیا، تو سیدہ عائشہ نے فرمایا کہ فلاں کنیز کو میرے پاس لے کر آؤ، انہوں نے اپنی ایک کنیز کے بارے میں کہا: تو ان لوگوں نے بتایا کہ اس کی گود میں اس کا ایک بچہ ہے، جس نے سیدہ عائشہ کی گود میں پیشاب کیا تھا، تو سیدہ عائشہ نے کہا: کہ اسے میرے پاس لے کر آؤ۔ اس کنیز کو لایا گیا، تو سیدہ عائشہ نے دریافت کیا: ”تم نے مجھ پر جادو کیا تھا؟“ تو اس نے جواب دیا: جی ہاں! سیدہ عائشہ نے دریافت کیا: ”وہ کیوں؟“ اس نے جواب دیا: ”میں یہ چاہتی تھی کہ آپ مجھے آزاد کر دیں۔“ تو سیدہ عائشہ نے مدبر کے طور پر اس کنیز کو آزاد کر دیا، پھر سیدہ عائشہ نے فرمایا: ”اب اللہ کے نام پر یہ بات مجھ پر لازم ہے کہ تم کبھی آزاد نہیں ہو سکتی۔“ (پھر انہوں نے لوگوں سے فرمایا:) ”کوئی ایسا شخص ڈھونڈو، جو بہت برا مالک ہو اور اس کنیز کو اس سے فروخت کر دو۔“ پھر سیدہ عائشہ رضی اللہ عنہا نے اس کی قیمت کے عوض میں ایک اور کنیز خرید لی اور اسے آزاد کر دیا۔