سنن الدارقطني

ابراہیم تیمی اپنے والد کے حوالے سے سیدنا ابوذر غفاری رضی اللہ عنہ کا یہ بیان نقل کرتے ہیں: ”اللہ کی قسم! حج تمتع کا حکم صرف ہمارے لیے مخصوص تھا یا اس شخص کے لیے ہے، جسے محصور کر دیا گیا ہو۔“

حارث بن بلال اپنے والد کا یہ بیان نقل کرتے ہیں: میں نے عرض کی: ”یا رسول اللہ! حج کو فسخ کرنے کا حکم صرف ہمارے لیے ہے، یا ہمارے بعد والوں کے لیے بھی ہے؟“ نبی کریم صلی اللہ علیہ وسلم نے ارشاد فرمایا: ”نہیں! صرف ہمارے لیے ہے۔“

ابراہیم تیمی بیان کرتے ہیں: ان کے والد نے سیدنا ابوذر رضی اللہ عنہ کے بارے میں یہ بات نقل کی ہے، ان سے حج تمتع کے بارے میں دریافت کیا گیا، تو انہوں نے فرمایا: ”اللہ کی قسم! یہ صرف ہمارے یعنی نبی کریم صلی اللہ علیہ وسلم کے اصحاب کے لیے مخصوص ہے، یہ باقی لوگوں کے لیے نہیں ہے، البتہ (باقی لوگوں میں سے صرف) اس شخص کے لیے اس کا حکم ہے، جسے محصور کر دیا گیا ہو۔“

سیدنا ابوذر غفاری رضی اللہ عنہ فرماتے ہیں: حج تمتع کرنے کا حق کسی کو نہیں ہے کہ وہ حج کا احرام باندھے اور پھر سے عمرے کے ذریعے فسخ کر دے، ماسوائے ان سواروں کے، جو نبی کریم صلی اللہ علیہ وسلم کے ساتھ تھے (یعنی یہ نبی کریم صلی اللہ علیہ وسلم کے اصحاب کے ساتھ مخصوص ہے)۔

سیدنا ابوذر غفاری رضی اللہ عنہ فرماتے ہیں: ہمارے بعد یہ حق کسی کو بھی نہیں ہے کہ وہ پہلے حج کا احرام باندھے اور پھر حج کرنے سے پہلے ہی اسے فسخ کر کے عمرے میں تبدیل کر دے۔

سیدنا ابوذر غفاری رضی اللہ عنہ فرماتے ہیں: کسی بھی شخص کو اس بات کا حق حاصل نہیں کہ وہ حج کا احرام باندھنے کے بعد اسے عمرے کے ذریعے فسخ کر دے، یہ حکم صرف ان سواروں کے لیے تھا، جو نبی کریم صلی اللہ علیہ وسلم کے ساتھ تھے۔