سنن الدارقطني

سیدنا عبداللہ بن عمر رضی اللہ عنہما بیان کرتے ہیں: سیدنا عمر رضی اللہ عنہ نے زمانہ جاہلیت میں یہ نذر مانی تھی کہ مسجد حرام میں ایک رات کا اعتکاف کریں گے، انہوں نے اس بارے میں نبی کریم صلی اللہ علیہ وسلم سے دریافت کیا، تو آپ نے ارشاد فرمایا: ”تم اپنی نذر کو پورا کرو۔“ اس کی سند مستند ہے۔

سیدنا عبداللہ بن عمر رضی اللہ عنہما بیان کرتے ہیں: سیدنا عمر بن خطاب رضی اللہ عنہ نے زمانہ جاہلیت میں یہ نذر مانی تھی کہ وہ مسجد حرام میں ایک رات کا اعتکاف کریں گے، جب اسلام کا زمانہ آیا، تو انہوں نے اس بارے میں نبی کریم صلی اللہ علیہ وسلم سے دریافت کیا، تو آپ نے فرمایا: ”تم اپنی نذر کو پورا کرو۔“ تو سیدنا عمر رضی اللہ عنہ نے ایک رات کا اعتکاف کیا تھا۔ اس کی سند ثابت ہے۔

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”اعتکاف کرنے والے شخص پر روزہ رکھنا لازم نہیں ہوتا، البتہ اگر وہ اپنے اوپر (روزہ رکھنے کو بھی) لازم کرے، تو حکم (مختلف ہو گا)۔“ شیخ نے اس روایت کو مرفوع حدیث کے طور پر نقل کیا ہے، جبکہ دیگر راویوں نے اسے مرفوع حدیث کے طور پر نقل نہیں کیا۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے یہ بات ارشاد فرمائی ہے: ”اعتکاف صرف روزے کے ہمراہ ہی درست ہوتا ہے۔“ اس کو نقل کرنے میں سویہ نامی راوی منفرد ہیں۔

سیدنا حذیفہ رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”ہر وہ مسجد جس میں موذن اور امام موجود ہوں، اس میں اعتکاف ہو سکتا ہے۔“ اس روایت کے راوی ضحاک نے سیدنا حذیفہ رضی اللہ عنہ سے احادیث کا سماع نہیں کیا ہے۔

سیدنا علی رضی اللہ عنہ فرماتے ہیں: ”اعتکاف کرنے والا شخص جمعے کی نماز میں شریک ہو سکتا ہے، جنازے میں شریک ہو سکتا ہے اور بیمار کی عیادت کر سکتا ہے۔“

سیدنا علی رضی اللہ عنہ ارشاد فرماتے ہیں: ”اعتکاف کرنے والا شخص بیمار کی عیادت کر سکتا ہے، جنازے میں شریک ہو سکتا ہے، جمعے کے لیے جا سکتا ہے، اپنے گھر جا سکتا ہے (لیکن ان کے ساتھ زیادہ دیر رہ نہیں سکتا)۔“

سیدنا عبداللہ بن عمر رضی اللہ عنہما، سیدنا عمر رضی اللہ عنہ کے بارے میں یہ بات نقل کرتے ہیں: انہوں نے نبی کریم صلی اللہ علیہ وسلم سے اعتکاف کے بارے میں دریافت کیا، جو ان کے ذمے لازم تھا، تو نبی کریم صلی اللہ علیہ وسلم نے انہیں ہدایت کی کہ: ”وہ اعتکاف کریں اور روزہ بھی رکھیں۔“ اس روایت کو نقل کرنے میں ابن بدیل نامی راوی منفرد ہیں اور یہ ضعیف ہیں۔

سیدنا عبداللہ بن عمر رضی اللہ عنہما نے یہ بات نقل کی ہے: سیدنا عمر رضی اللہ عنہ نے نبی کریم صلی اللہ علیہ وسلم کی خدمت میں عرض کی: ”میں نے یہ نذر مانی تھی کہ میں ایک دن کا اعتکاف کروں گا،“ تو نبی کریم صلی اللہ علیہ وسلم نے فرمایا: ”تم اعتکاف بھی کرو اور روزہ بھی رکھو۔“ شیخ ابوبکر نیشاپوری کو میں نے یہ کہتے ہوئے سنا ہے، وہ فرماتے ہیں: یہ حدیث منکر ہے، کیونکہ عمرو بن دینار کے ثقہ شاگردوں نے اسے نقل نہیں کیا، جن میں ابن جریج، ابن عیینہ، حماد بن سلمہ، حماد بن زید اور دیگر حضرات شامل ہیں، جبکہ اس کا راوی ابن بدیل ضعیف ہے۔

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم رمضان کے مہینے کے آخری عشرے میں اعتکاف کیا کرتے تھے، اس کے بعد یہ معمول اسی طرح رہا، یہاں تک کہ آپ کا وصال ہو گیا۔

عروہ بن زبیر اور سعید بن مسیب نے یہ بات بیان کی ہے: سیدہ عائشہ رضی اللہ عنہا نے انہیں یہ بتایا ہے، نبی کریم صلی اللہ علیہ وسلم رمضان کے مہینے میں آخری عشرے میں اعتکاف کیا کرتے تھے، یہاں تک کہ اللہ تعالیٰ نے آپ کو وفات دے دی، آپ کے بعد آپ کی ازواج نے بھی ان دنوں میں اعتکاف کیا اور اعتکاف کرنے والے شخص کے لیے سنت یہ ہے: ”صرف قضائے حاجت کے لیے (اعتکاف کی جگہ سے) باہر نکلے گا، وہ جنازے میں شریک نہیں ہو گا، مریض کی عیادت کے لیے نہیں جائے گا، وہ عورت کو چھوئے گا نہیں اور اس کے ساتھ مباشرت نہیں کرے گا، اور اعتکاف صرف اس مسجد میں ہو سکتا ہے، جہاں باجماعت نماز ہوتی ہے اور اعتکاف کرنے والے شخص کو یہ حکم دیا جائے گا کہ وہ روزہ بھی رکھے۔“ ایک قول کے مطابق اس روایت کے یہ الفاظ: ”اعتکاف کرنے والے شخص کے لیے سنت یہ ہے“ اس کے بعد سے لے کر روایت کے آخر تک کا حصہ نبی کریم صلی اللہ علیہ وسلم کا فرمان نہیں ہے، بلکہ (اس روایت کے راوی) زہری کا کلام ہے، جنہوں نے اسے حدیث میں ہی درج کر دیا ہے، جس کی وجہ سے یہ وہم ہوا ہے، باقی اللہ بہتر جانتا ہے۔ ہشام بن سلیمان نامی راوی نے اس کا تذکرہ نہیں کیا ہے۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم رمضان کے آخری عشرے میں اعتکاف کرتے تھے، یہاں تک کہ اللہ تعالیٰ نے آپ کو وفات دے دی، آپ کے بعد آپ کی ازواج نے اعتکاف کیا اور اعتکاف کرنے والے کے لیے سنت یہ ہے: ”وہ صرف قضائے حاجت کے لیے (اعتکاف کی جگہ سے) باہر نکل سکتا ہے، وہ جنازے میں شریک نہیں ہو گا، بیمار کی عیادت نہیں کرے گا، وہ اپنی بیوی کو چھو نہیں سکے گا، اس کے ساتھ مباشرت نہیں کر سکتا، اعتکاف صرف اس جگہ میں ہو گا، جہاں باجماعت نماز ادا کی جاتی ہے، اور اعتکاف کرنے والے کے لیے سنت یہ ہے، وہ روزہ رکھے۔“

سیدنا عبداللہ بن عمر رضی اللہ عنہما بیان کرتے ہیں: سیدنا عمر رضی اللہ عنہ نے زمانہ شرک میں یہ نذر مانی تھی کہ وہ اعتکاف کریں گے اور روزہ رکھیں گے، انہوں نے اسلام قبول کرنے کے بعد نبی کریم صلی اللہ علیہ وسلم سے اس بارے میں دریافت کیا، تو آپ صلی اللہ علیہ وسلم نے ارشاد فرمایا: ”تم اپنی نذر کو پورا کرو۔“ اس کی سند حسن ہے، اسے ان الفاظ میں نقل کرنے میں سعید بن بشیر نامی راوی منفرد ہیں۔