سنن الدارقطني

سیدہ ام عبداللہ دوسیہ رضی اللہ عنہا بیان کرتی ہیں: نبی کریم صلی اللہ علیہ وسلم نے یہ بات ارشاد فرمائی: ”ہر بستی میں رہنے والوں پر جمعہ لازم ہوتا ہے، اگرچہ اس بستی میں صرف چار افراد رہ جائیں،“ یہاں پر بستی سے مراد شہر ہے اور یہ بات زہری سے مستند طور پر منقول نہیں ہے۔

سیدہ ام عبداللہ دوسیہ رضی اللہ عنہا بیان کرتی ہیں: نبی کریم صلی اللہ علیہ وسلم نے یہ بات ارشاد فرمائی: ”ہر اس بستی والوں پر جمعہ پڑھنا لازم ہے، جس میں امام موجود ہو، اگرچہ اس بستی میں صرف چار افراد موجود ہوں،“ اس روایت میں ایک راوی ولید بن محمد متروک ہے اور یہ روایت زہری سے مستند طور پر منقول نہیں ہے، اسے نقل کرنے والے تمام راوی متروک ہیں۔

سیدہ ام عبداللہ دوسیہ رضی اللہ عنہا بیان کرتی ہیں: میں نے نبی کریم صلی اللہ علیہ وسلم کو یہ ارشاد فرماتے ہوئے سنا: ”ہر بستی کے رہنے والوں پر جمعہ پڑھنا لازم ہے، اگرچہ وہاں صرف تین افراد رہ جائیں اور چوتھا ان کا امام ہو،“ زہری کا سیدہ دوسیہ رضی اللہ عنہا سے احادیث کا سماع مستند طور پر ثابت نہیں ہے اور اس روایت کا راوی، حکم، متروک ہے۔