سنن الدارقطني

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے سورة ص میں سجدہ کیا ہے۔ راوی بیان کرتے ہیں: اسے صرف حفص نے نقل کیا ہے۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم سجدہ تلاوت میں یہ پڑھا کرتے تھے: ”میرا چہرہ اس ذات کی بارگاہ میں جھکا ہوا ہے، جس نے اسے پیدا کیا ہے، اسے سماعت اور بصارت اپنی مدد اور قوت سے عطا کی ہے۔“

سیدنا عبداللہ بن عباس رضی اللہ عنہما بیان کرتے ہیں: اللہ کے نبی کریم صلی اللہ علیہ وسلم نے فرمایا: سیدنا داؤد علیہ السلام نے یہاں توبہ کی وجہ سے سجدہ کیا تھا اور ہم شکر کی وجہ سے سجدہ کرتے ہیں۔ راوی بیان کرتے ہیں: اس سے مراد سورة ص میں مذکور سجدہ ہے۔

ایک اور سند کے ہمراہ یہ روایت منقول ہے، جو اس سجدے کے بارے میں ہے جو سورة ص میں ہے، سیدنا داؤد علیہ السلام نے توبہ کے طور پر یہ سجدہ کیا تھا، اور ہم شکر کے طور پر یہ سجدہ کرتے ہیں۔

سعید بن جبیر بیان کرتے ہیں: انہوں نے سیدنا عبداللہ بن عباس رضی اللہ عنہما کو یہ بیان کرتے ہوئے سنا ہے، وہ فرماتے ہیں: میں نے سیدنا عمر رضی اللہ عنہ کو منبر پر سورة ص کی تلاوت کرتے ہوئے سنا، وہ منبر سے نیچے اترے، انہوں نے سجدہ تلاوت کیا اور پھر منبر پر چڑھ گئے۔

سائب بن یزید بیان کرتے ہیں: سیدنا عثمان غنی رضی اللہ عنہ نے منبر پر سورة ص کی تلاوت کی، تو نیچے اتر کر انہوں نے سجدہ تلاوت کیا۔

سیدنا ابوسعید خدری رضی اللہ عنہ بیان کرتے ہیں: ایک دن نبی کریم صلی اللہ علیہ وسلم ہمیں خطبہ دے رہے تھے، آپ صلی اللہ علیہ وسلم نے سورة ص کی تلاوت کی، جب آپ سجدے سے متعلق مقام پر پہنچے، تو آپ منبر سے نیچے اترے، آپ نے سجدہ کیا، آپ کے ساتھ ہم نے بھی سجدہ کیا، پھر آپ نے دوبارہ اس سورت کی تلاوت کی، جب آپ سجدے کے مقام پر پہنچے، تو ہم سجدہ کرنے کے لیے تیار تھے، جب آپ نے ہمیں ملاحظہ کیا، تو فرمایا: ”یہ ایک نبی کی توبہ کا واقعہ ہے اور میں یہ دیکھ رہا ہوں کہ تم لوگ سجدہ کرنے کے لیے تیار ہو۔“ پھر نبی کریم صلی اللہ علیہ وسلم منبر سے نیچے اترے، آپ نے سجدہ کیا، تو ہم نے بھی سجدہ کیا۔

سیدنا عمرو بن عاص رضی اللہ عنہ بیان کرتے ہیں: نبی کریم صلی اللہ علیہ وسلم نے انہیں قرآن مجید میں پندرہ مقامات پڑھائے تھے، جہاں سجدہ ہے، ان میں سے تین مفصل سورتوں میں ہیں اور سورة حج میں دو سجدے ہیں۔

سیدنا عقبہ بن عامر رضی اللہ عنہ بیان کرتے ہیں: میں نے عرض کی: یا رسول اللہ! کیا سورة حج میں دو سجدے ہیں؟ آپ نے فرمایا: ”ہاں، اگر تم ان کو ادا نہیں کرتے، تو پھر تم اس سورت کی تلاوت نہ کرو۔“

عبداللہ بن ثعلبہ بیان کرتے ہیں: میں نے سیدنا عمر رضی اللہ عنہ کو دیکھا، انہوں نے سورة حج میں دو سجدے کیے، راوی بیان کرتے ہیں: میں نے دریافت کیا: کیا صبح کی نماز میں؟ انہوں نے جواب دیا: جی ہاں، صبح کی نماز میں۔

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے (اور آپ کے ساتھ) جنات، انسانوں اور درختوں نے سورة النجم کی آخری آیت میں سجدہ کیا۔

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے سورة النجم کی تلاوت کرتے ہوئے سجدہ کیا اور مسلمانوں اور مشرکین نے بھی (آپ کے ساتھ) سجدہ کیا۔

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے سورۃ النجم پڑھی اور آپ نے اس میں سجدہ کیا۔

سیدنا ابوہریرہ رضی اللہ عنہ بیان کرتے ہیں: میں نے نبی کریم صلی اللہ علیہ وسلم کی اقتداء میں سورة الإنشقاق اور سورة العلق میں سجدہ تلاوت کیا ہے۔

خارجہ بن زید اپنے والد سیدنا زید بن ثابت انصاری رضی اللہ عنہ کا یہ بیان نقل کرتے ہیں: میں نے نبی کریم صلی اللہ علیہ وسلم کے سامنے سورة النجم کی تلاوت کی، تو ہم میں سے کسی نے بھی سجدہ نہیں کیا۔ ابوصخر بیان کرتے ہیں: میں نے عمر بن عبدالعزیز اور ابوبکر بن حزم کی اقتداء میں (نماز ادا کی، جس میں انہوں نے اس سورت کی تلاوت کی)، تو ان دونوں نے سجدہ تلاوت نہیں کیا۔