سنن الدارقطني

محمود بن لبید بیان کرتے ہیں: سیدنا اسید بن حضیر رضی اللہ عنہ کو عرق النساء کی شکایت ہو گئی، وہ ہمارے امام تھے، وہ ہمارے پاس تشریف لاتے، ہمیں ہاتھ کے ذریعے اشارہ کرتے کہ تم لوگ بیٹھے رہو، ہم بیٹھے رہتے، تو وہ بیٹھ کر ہمیں نماز پڑھاتے اور ہم بھی بیٹھ کر نماز ادا کر لیتے۔

سیدہ عائشہ رضی اللہ عنہا مرفوع حدیث کے طور پر یہ بات بیان کرتی ہیں: ”بیٹھ کر نماز پڑھنے والے کو کھڑے ہو کر نماز پڑھنے والے کے مقابلے میں نصف ثواب ملتا ہے، ماسوائے اس شخص کے جو چوکڑی مار کر بیٹھے۔“

سیدہ عائشہ رضی اللہ عنہا بیان کرتی ہیں: میں نے نبی کریم صلی اللہ علیہ وسلم کو چوکڑی مار کر بیٹھ کر نماز ادا کرتے ہوئے دیکھا ہے۔

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم کو کوئی تکلیف تھی، آپ نے سیدنا ابوبکر رضی اللہ عنہ کو لوگوں کو نماز پڑھانے کا حکم دیا، پھر نبی کریم صلی اللہ علیہ وسلم نے بہتری محسوس کی، تو تشریف لائے اور سیدنا ابوبکر رضی اللہ عنہ کے پہلو میں آ کر بیٹھ گئے، نبی کریم صلی اللہ علیہ وسلم نے سیدنا ابوبکر رضی اللہ عنہ کو نماز پڑھائی، آپ اس وقت بیٹھے ہوئے تھے، جبکہ سیدنا ابوبکر رضی اللہ عنہ نے لوگوں کو کھڑے ہو کر نماز پڑھائی۔

سیدنا عبداللہ بن عباس رضی اللہ عنہما، سیدنا عباس بن عبدالمطلب رضی اللہ عنہ کے بارے میں یہ بات بیان کرتے ہیں: نبی کریم صلی اللہ علیہ وسلم نے بیماری کے دوران یہ فرمایا: ”تم ابوبکر سے کہو، وہ لوگوں کو نماز پڑھا دے۔“ پھر نبی کریم صلی اللہ علیہ وسلم کو بہتری محسوس ہوئی، تو آپ دو آدمیوں کے درمیان سہارا لے کر چلتے ہوئے (مسجد میں) تشریف لے گئے، سیدنا ابوبکر رضی اللہ عنہ پیچھے ہٹنے لگے، تو نبی کریم صلی اللہ علیہ وسلم نے انہیں اشارہ کیا: ”تم اپنی جگہ پر رہو۔“ پھر نبی کریم صلی اللہ علیہ وسلم تشریف لائے اور سیدنا ابوبکر رضی اللہ عنہ کے پہلو میں تشریف فرما ہو گئے، آپ نے اسی جگہ سے تلاوت کرنا شروع کی، جہاں سے سیدنا ابوبکر رضی اللہ عنہ نے تلاوت چھوڑی تھی۔

امام شعبی بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”کوئی بھی شخص بیٹھ کر امامت نہ کرے۔“ اس روایت کو صرف جابر نے نقل کیا ہے اور یہ شخص متروک ہے اور یہ روایت بھی مرسل ہے، اسے مستند قرار نہیں دیا جا سکتا۔