سنن الدارقطني

امام ابوحنیفہ رحمہ اللہ تعالیٰ اپنی سند کے حوالے سے سیدنا جابر رضی اللہ عنہ کا یہ بیان نقل کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”جس شخص کا امام ہو (یعنی جو باجماعت نماز ادا کر رہا ہو) تو امام کی قراءت اس شخص کی قراءت کی ہو گی۔“ اس روایت کو موسیٰ نامی راوی سے صرف امام ابوحنیفہ اور حسن نامی راوی نے نقل کیا ہے اور یہ دونوں ضعیف ہیں۔

امام ابوحنیفہ رحمہ اللہ اپنی سند کے حوالے سے سیدنا جابر بن عبداللہ رضی اللہ عنہ کا یہ بیان نقل کرتے ہیں: ایک مرتبہ نبی کریم صلی اللہ علیہ وسلم نے ہمیں نماز پڑھائی آپ کی اقتداء میں ایک صاحب نے قراءت کرنا شروع کر دی تو نبی کریم صلی اللہ علیہ وسلم کے اصحاب میں سے ایک نے اسے روکا، جب نبی کریم صلی اللہ علیہ وسلم نماز پڑھ کر فارغ ہوئے تو ان دونوں نے بحث شروع کر دی۔ پہلے والے صاحب بولے: ”کیا آپ مجھے نبی کریم صلی اللہ علیہ وسلم کی اقتداء میں قراءت کرنے سے روک رہے ہیں؟“ ان دونوں کے درمیان بحث چھڑ گئی اس بات کا پتہ نبی کریم صلی اللہ علیہ وسلم کو چلا تو آپ صلی اللہ علیہ وسلم نے ارشاد فرمایا: ”جو شخص امام کی اقتداء میں نماز ادا کر رہا ہو امام کی قراءت ہی اس شخص کی قراءت شمار ہوتی ہے۔“ اس روایت کو امام لیث بن سعد نے امام ابویوسف کے حوالے سے امام ابوحنیفہ سے روایت کیا ہے۔

لیث بن سعد، امام ابویوسف اور امام ابوحنیفہ رحمہ اللہ کے حوالے سے نقل کرتے ہیں، سیدنا جابر بن عبداللہ رضی اللہ عنہ بیان کرتے ہیں: ایک شخص نے نبی کریم صلی اللہ علیہ وسلم کی اقتداء میں سورہ الاعلیٰ کی تلاوت شروع کی جب نبی کریم صلی اللہ علیہ وسلم نماز پڑھ کر فارغ ہوئے تو دریافت کیا: ”تم میں سے کس نے سورہ الاعلیٰ کی تلاوت کی تھی؟“ راوی بیان کرتے ہیں: سب لوگ خاموش رہے۔ نبی کریم صلی اللہ علیہ وسلم نے یہ تین مرتبہ سوال کیا ہر مرتبہ وہ خاموش رہے پھر اس شخص نے عرض کی: ”میں نے۔“ تو نبی کریم صلی اللہ علیہ وسلم نے ارشاد فرمایا: ”مجھے اندازہ ہو گیا تھا تم میں سے کوئی ایک میرے لیے دشواری پیدا کر رہا ہے۔“

سیدنا جابر بن عبداللہ رضی اللہ عنہ بیان کرتے ہیں: ایک شخص نے نبی کریم صلی اللہ علیہ وسلم کی اقتداء میں ظہر اور عصر کی نماز میں قراءت کی، ایک دوسرے شخص نے اس کو اشارے سے روکا، جب وہ نماز پڑھ کر فارغ ہوا تو پہلا شخص بولا: ”کیا تم مجھے نبی کریم صلی اللہ علیہ وسلم کی اقتداء میں قراءت کرنے سے روک رہے ہو؟“ ان دونوں کے درمیان بحث چھڑ گئی یہاں تک کہ نبی کریم صلی اللہ علیہ وسلم نے بھی اس بات کو سن لیا، آپ صلی اللہ علیہ وسلم نے ارشاد فرمایا: ”جو شخص امام کی اقتداء میں نماز ادا کر رہا ہو تو امام کی قراءت اس شخص کی قراءت شمار ہوتی ہے۔“ ابوالولید نامی راوی مجہول ہے۔ اس کی سند میں سیدنا جابر رضی اللہ عنہ سے منقول ہونے کا ذکر صرف امام ابوحنیفہ نے کیا ہے۔ یہی روایت ایک اور سند کے حوالے سے بھی منقول ہے۔

سیدنا جابر رضی اللہ عنہ کے حوالے سے یہی روایت ایک اور سند کے ہمراہ بھی منقول ہے۔ یہی روایت بعض دیگر اسناد کے ہمراہ بھی منقول ہے۔ بعض اسناد میں یہ روایت مرسل حدیث کے طور پر منقول ہے اور یہی درست ہے۔

سالم بن عبداللہ اپنے والد (سیدنا عبداللہ بن عمر رضی اللہ عنہما) کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”جس شخص کا امام ہو (یعنی باجماعت نماز ادا کر رہا ہو) تو امام کا قراءت کرنا اس شخص کا قراءت کرنا شمار ہو گا۔“ اس روایت کا راوی محمد بن فضل متروک ہے۔

سیدنا ابوہریرہ رضی اللہ عنہ اس آیت کے بارے میں بیان کرتے ہیں: ”اور جب قرآن کی تلاوت کی جائے، تو تم خاموش رہو اور غور سے سنو، تاکہ تم پر رحم کیا جائے۔“ سیدنا ابوہریرہ رضی اللہ عنہ فرماتے ہیں: یہ ایک آواز بلند کرنے کے بارے میں نازل ہوئی تھی۔ لوگ اس وقت نبی کریم صلی اللہ علیہ وسلم کی اقتداء میں نماز ادا کر رہے تھے۔ روایت کے یہ الفاظ ابن ابوداؤد رحمہ اللہ نامی راوی کے ہیں۔ اس روایت کا راوی عبداللہ بن عامر رحمہ اللہ ضعیف ہے۔

سیدنا عمران بن حصین رضی اللہ عنہ بیان کرتے ہیں: نبی کریم صلی اللہ علیہ وسلم لوگوں کو نماز پڑھا رہے تھے ایک شخص نے آپ کی اقتداء میں قراءت کرنا شروع کر دی جب نبی کریم صلی اللہ علیہ وسلم نماز پڑھ کر فارغ ہوئے تو آپ نے دریافت کیا: ”تم میں سے کون شخص میری سورت (تلاوت) کے بارے میں رکاوٹ ڈال رہا تھا؟“ پھر نبی کریم صلی اللہ علیہ وسلم نے ان لوگوں کو امام کی اقتداء میں قراءت کرنے سے منع کر دیا۔ روایت کے یہ الفاظ حجاج نامی راوی نے نقل کیے ہیں۔ قتادہ کے دیگر شاگردوں یعنی شعبہ، سعید، اور دیگر حضرات نے اس کے برعکس روایت نقل کی ہے۔ انہوں نے اپنی روایت میں یہ الفاظ نقل نہیں کیے: ”نبی کریم صلی اللہ علیہ وسلم نے انہیں قراءت کرنے سے منع کر دیا۔“ حجاج نامی راوی مستند نہیں ہے۔

سیدنا جابر بن عبداللہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جس نماز میں سورہ فاتحہ نہ ہو تو وہ ناقص ہوتی ہے ماسوائے اس نماز کے جو امام کی اقتداء میں ہو۔“ یحییٰ بن سلام نامی راوی ضعیف ہے۔ درست یہ ہے کہ یہ روایت موقوف ہے۔

یہ روایت ایک اور سند کے ہمراہ موقوف روایت کے طور پر منقول ہے۔