بلوغ المرام

´سیدنا عبداللہ بن عمر رضی اللہ عنہما سے روایت ہے کہ` رسول اللہ صلی اللہ علیہ وسلم نے فرمایا ’’ جو کوئی اپنے مال کی حفاظت کرتا ہوا مارا جائے تو وہ شہید ہے ۔ “ اسے ابوداؤد ، نسائی اور ترمذی نے روایت کیا ہے اور ترمذی نے اسے صحیح کہا ہے ۔

´سیدنا عمران بن حصین رضی اللہ عنہما سے روایت ہے کہ` یعلیٰ بن امیہ رضی اللہ عنہ کی ایک شخص سے لڑائی ہو گئی ۔ ایک نے دوسرے کو دانتوں سے کاٹا تو اس نے اپنا ہاتھ اس کے منہ سے کھینچ کر باہر نکالا تو اس کا سامنے کا دانت ٹوٹ کر گر گیا ۔ دونوں اپنا جھگڑا نبی کریم صلی اللہ علیہ وسلم کی عدالت میں لے گئے ۔ تو آپ صلی اللہ علیہ وسلم نے فرمایا ’’ کیا تم ایک دوسرے کو اس طرح کاٹ کھاتے ہو جس طرح نر اونٹ کاٹتا ہے ۔ اس کے لیے کوئی دیت نہیں ۔ “ ( بخاری و مسلم ) اور یہ الفاظ مسلم کے ہیں ۔

´سیدنا ابوہریرہ رضی اللہ عنہ سے روایت ہے کہ` ابوالقاسم صلی اللہ علیہ وسلم نے فرمایا ’’ اگر کوئی مرد تیرے گھر بغیر اجازت کے جھانکے ( نظر ڈالے ) اور تو کنکری مار کر اس کی آنکھ پھوڑ دے تو تم پر کوئی گناہ نہیں ۔ “ ( بخاری و مسلم ) احمد اور نسائی کے الفاظ ہیں جسے ابن حبان نے صحیح کہا ہے کہ ’’ نہ اس کی دیت ہے اور نہ قصاص ۔ “

´سیدنا براء بن عازب رضی اللہ عنہ سے روایت ہے کہ` رسول اللہ صلی اللہ علیہ وسلم نے فیصلہ فرمایا کہ ’’ دن کے اوقات میں باغوں کی حفاظت و نگرانی مالکان باغ کریں اور رات کے اوقات میں مویشیوں کی حفاظت مالکان مویشی کریں ۔ رات کے اوقات میں جس قدر مویشی کسی کا نقصان کریں گے اس کا تاوان مویشیوں کے مالکان پر ہو گا ۔ “ اس حدیث کو احمد اور چاروں نے روایت کیا ہے سوائے ترمذی کے اور ابن حبان نے اسے صحیح کہا ہے تاہم اس کی سند میں اختلاف ہے ۔

´سیدنا معاذ بن جبل رضی اللہ عنہ سے` ایسے شخص کے متعلق جو پہلے اسلام لایا پھر یہودی ہو گیا تھا مروی ہے کہ میں اس وقت تک نہیں بیٹھوں گا تاوقتیکہ اس کو قتل کر دیا جائے ۔ یہ اللہ اور اس کے رسول کا فیصلہ ہے ۔ چنانچہ اس کے قتل کا حکم دیا گیا اور اسے قتل کر دیا گیا ۔ ( بخاری ومسلم ) ابوداؤد کی روایت میں ہے کہ اسے قتل سے پہلے توبہ کرنے کے لئے کہا گیا ۔

´سیدنا ابن عباس رضی اللہ عنہما سے مروی ہے کہ` رسول اللہ صلی اللہ علیہ وسلم نے فرمایا ’’ جو شخص اپنا دین بدل لے اسے قتل کر دو ۔ “ ( بخاری )

´سیدنا ابن عباس رضی اللہ عنہما ہی سے مروی ہے کہ` ایک نابینا شخص تھا ، اس کی ایک ام ولد لونڈی رسول اللہ صلی اللہ علیہ وسلم کو گالی دیتی اور برا بھلا کہتی تھی ۔ وہ نابینا صحابی رضی اللہ عنہ اسے منع کرتے مگر وہ باز نہ آتی ۔ ایک رات انہوں نے کدال لے کر اس کے پیٹ پر رکھ کر اس پر اپنا بوجھ ڈال کر دبایا اور اسے قتل کر دیا ۔ یہ بات نبی کریم صلی اللہ علیہ وسلم تک پہنچی تو آپ صلی اللہ علیہ وسلم نے فرمایا ’’ تم گواہ رہو اس کا خون رائیگاں اور بیکار گیا ۔ “ ( ابوداؤد ) اس کے راوی ثقہ ہیں ۔