سوال:

نماز استخارہ کی اہمیت کیا ہے؟

جواب:

خیر و شر ہر کام کے دو پہلو ہیں، کسی بھی کام سے خیر کشید کر لینا اور شر سے سلامتی کے ساتھ گزر جانا انسان کے بس میں نہیں، یہ قدرت صرف اللہ کریم کے پاس ہے اور استخارہ نام ہے خود سپردگی کا، کہ اللہ میں یہ کام کرنے جا رہا ہوں، تو اس کا وکیل ہے، اس میں خیر عطا کرنا۔ ایسا بھی ہوتا ہے کہ ایک کام میں بظاہر خیر نظر آتی ہے، مگر اس میں خیر ہوتی نہیں، یا خیر کے ساتھ شر بھی امڈ آتا ہے، اس لیے چاہیے کہ ہر کام سے پہلے استخارہ کر لیا جائے اور وہ کام اللہ کی نگہبانی میں سرانجام دیا جائے، تا کہ شر ختم ہو اور زندگی خوشیوں کا استعارہ بن جائے۔
❀ حافظ نووی رحمہ اللہ (676ھ) لکھتے ہیں:
فيه استحباب صلاة الإستخارة لمن هم بأمر سواء كان ذلك الأمر ظاهر الخير أم لا.
”ہر کام سے پہلے استخارہ مستحب ہے، اس میں بظاہر خیر ہو یا نہ ہو۔“
(شرح مسلم: 144/5)