1۔ [1] با برکت [2] ہے وہ ذات جس کے ہاتھ میں (کائنات کی) سلطنت [3] ہے اور وہ ہر چیز پر قادر ہے
[1] سورۃ الملک کی فضیلت :۔
سیدنا ابوہریرہؓ کہتے ہیں کہ رسول اللہ صلی اللہ علیہ وسلم نے فرمایا کہ قرآن میں ایک تیس آیتوں والی سورت ہے۔ اس سورت نے ایک آدمی کی شفاعت کی تاآنکہ اسے بخش دیا گیا اور وہ سورت ﴿تَبَارَكَالَّذِيبِيَدِهِالْمُلْكُ﴾ (الملک) ہے۔ [ترمذی۔ ابواب فضائل القرآن۔ باب ماجاء فی سورۃ الملک] سیدنا جابرؓ فرماتے ہیں کہ رسول اللہ صلی اللہ علیہ وسلم ﴿تَبَارَكَالَّذِيبِيَدِهِالْمُلْكُ﴾ اس وقت تک سوتے نہ تھے جب تک سورۃ المّتَنْزِیْلَ اور ﴿تَبَارَكَالَّذِيبِيَدِهِالْمُلْكُ﴾ پڑھ نہ لیتے۔ [ترمذي۔ ايضاً]
[2] ﴿تَبَارَكَ﴾ کا لغوی مفہوم :۔
﴿تَبَارَكَ﴾ برکت کے معنی کسی چیز میں اللہ تعالیٰ کی طرف سے خیر کا ثابت ہونا ہے (مفردات) یعنی جو کام کیا جائے اس میں متوقع زیادہ سے زیادہ فائدہ ہونے کا نام برکت ہے۔ بشرطیکہ یہ کام خیر کا پہلو رکھتا ہو اور جس چیز میں یہ خیر کا پہلو بارآور ثابت ہو وہ مبارک ہے۔ اور تبرک کا لفظ اللہ تعالیٰ سے مختص ہے اور صرف ان خیر کے کاموں کے لیے آتا ہے۔ جو اللہ تعالیٰ سے مخصوص ہیں۔ اس آیت میں اس سے مراد یہ ہے کہ اللہ تعالیٰ نے اس کائنات کی ہر ایک چیز کو جس بہتر مقصد کے لیے پیدا فرمایا تھا وہ چونکہ بدرجہ اتم وہ مقصد پورا کر رہی ہے لہٰذا اللہ کی ذات تبارک یعنی با برکت ہوئی۔ [3]﴿الْمُلْكُ﴾ یعنی کائنات کی ہر چیز پر مکمل بادشاہت، حکومت اور اختیار۔ اور ایسی قدرت کہ کوئی چیز بھی اللہ کے حکم کے سامنے دم نہیں مار سکتی۔
اہم:
ویب سائٹ یا موبائل ایپ پر کوئی خرابی نظر آئے تو براہِ کرم فوری طور پر
واٹس اپ
پر اطلاع دیں یا
ای میل کریں۔
