ترجمہ و تفسیر کیلانی — سورۃ طه (20) — آیت 65

اس اتحاد کے بعد جادو گر میدان مقابلہ میں آگئے اور موسیٰؑ سے کہنے لگے: ”پہلے تو اپنا شعبدہ دکھاؤ گے یا ہم پہل کریں؟“ انہوں نے موسیٰؑ سے یہ استفسار از راہ تکریم کیا تھا جیسا کہ مقابلہ میں اکثر یہ دستور چلتا ہے۔ اس کا جواب موسیٰؑ نے یہ دیا کہ پہلے تم ہی اپنے شعبدے دکھلاؤ۔ ان کا یہ جواب از راہ تکریم نہیں تھا۔ کیونکہ جادوگر کوئی قابل عزت شے نہیں ہوتا۔ بلکہ اس لئے تھا کہ حق نتھر کر سامنے آجائے۔ باطل اپنا جتنا زور لگا سکتا ہے۔ لگا لے پھر اگر اس کے بعد حق اس پر غالب آگیا تو سب لوگ حقیقت کو جان لیں گے۔