ترجمہ و تفسیر — سورۃ الفرقان (25) — آیت 37

(آیت 37){ وَ قَوْمَ نُوْحٍ لَّمَّا كَذَّبُوا الرُّسُلَ …:} اس قوم کی طرف صرف نوح علیہ السلام آئے تھے، جب کہ اللہ تعالیٰ نے فرمایا ہے کہ انھوں نے رسولوں کو جھٹلا دیا، وجہ اس کی یہ ہے کہ ایک پیغمبر کو جھٹلانا سب کو جھٹلانا ہے، کیونکہ تمام انبیاء کی دعوت ایک ہے۔ ان کی تکذیب اور غرق کی تفصیل کے لیے دیکھیے سورۂ ہود (۲۵ تا ۴۹)۔

اس آیت کی تفسیر پچھلی آیت کے ساتھ کی گئی ہے۔

[48] اس سے معلوم ہوا ہے کہ قوم نوح کی طرف حضرت نوحؑ سے پہلے بھی کچھ رسول آچکے تھے۔ جن کے قرآن میں نام مذکور نہیں ہیں یا اس کا یہ مطلب بھی ہو سکتا ہے کہ چونکہ اصول ِدین میں تمام انبیاء کی تعلیم ایک ہی رہی ہے تو اس لحاظ سے ایک رسول کو جھٹلانے سے از خود باقی سب رسولوں کی تکذیب ہو جاتی ہے۔
[49] نشانی اس لحاظ سے کہ ان ظالموں کی روئے زمین پر نسل ہی ختم ہو گئی۔ طوفان نوح کے بعد حضرت آدمؑ کی نسل صرف ان لوگوں سے چلی جو حضرت نوحؑ کے ہمراہ کشتی میں سوار تھے اور بعض کے نزدیک آئندہ نسل حضرت نوحؑ کے تین بیٹوں حام، سام اور یافث سے چلی۔

اس آیت کی تفسیر اگلی آیات کیساتھ ملاحظہ کریں۔