سنن سعید بن منصور

سعید بن مسیب رحمہ اللہ سے روایت ہے کہ سیدنا رافع بن خدیج رضی اللہ عنہ نے محمد بن مسلمہ کی بیٹی سے نکاح کیا، پھر اسے طلاق دینا چاہی، تو عورت نے کہا: مجھے طلاق نہ دو، مجھے اپنے نکاح میں رکھو اور میرے لیے جتنا چاہو نفقہ مقرر کر دو، تو اللہ عزوجل نے یہ آیت نازل فرمائی: ﴿وَإِنِ امْرَأَةٌ خَافَتْ مِنْ بَعْلِهَا نُشُوزًا أَوْ إِعْرَاضًا فَلَا جُنَاحَ عَلَيْهِمَا أَنْ يُصْلِحَا بَيْنَهُمَا صُلْحًا﴾، تو سنت جاری ہوگئی کہ اگر کسی شخص کے نکاح میں عورت ہو اور وہ بوڑھی ہو جائے اور شوہر اسے ناپسند کرے اور طلاق دینا چاہے، تو اگر عورت صلح کر لے تو مرد اس کو رکھ سکتا ہے اور جو چاہے اس کے لیے مقرر کرے۔

ہشام بن عروہ رحمہ اللہ اپنے والد عروہ رحمہما اللہ سے روایت کرتے ہیں کہ یہ آیت ﴿وَإِنِ امْرَأَةٌ خَافَتْ مِنْ بَعْلِهَا نُشُوزًا أَوْ إِعْرَاضًا﴾ سیدہ سودہ بنت زمعہ رضی اللہ عنہا اور ان جیسی خواتین کے بارے میں نازل ہوئی، کیونکہ سیدہ سودہ رضی اللہ عنہا عمر رسیدہ ہو چکی تھیں اور انہیں اندیشہ ہوا کہ رسول اللہ صلی اللہ علیہ وسلم ان سے جدا نہ ہو جائیں، اور وہ اپنے مقام کو باقی رکھنا چاہتی تھیں، نیز انہوں نے رسول اللہ صلی اللہ علیہ وسلم کی سیدہ عائشہ رضی اللہ عنہا سے محبت اور ان کے مقام و مرتبہ کو جان لیا تھا، چنانچہ سیدہ سودہ رضی اللہ عنہا نے اپنا دن رسول اللہ صلی اللہ علیہ وسلم کے ساتھ سیدہ عائشہ رضی اللہ عنہا کو ہبہ کر دیا، تو رسول اللہ صلی اللہ علیہ وسلم نے یہ قبول فرما لیا۔