سلسله احاديث صحيحه

سیدنا برا رضی اللہ عنہ بیان کرتے ہیں کہ ایک انصاری آدمی ہتھیاروں سے لیس ہو کر نبی کریم صلی اللہ علیہ وسلم کے پاس آیا اور کہا: اے اللہ کے رسول ! میں لڑوں یا اسلام قبول کروں ؟ آپ صلی اللہ علیہ وسلم نے فرمایا : ”نہیں ، بلکہ اسلام قبول کر پھر جہاد کرنا ۔“ وہ مسلمان ہو گیا ، پھر جہاد کیا اور شہید ہو گیا ۔ رسول اللہ صلی اللہ علیہ وسلم نے فرمایا : ”اس نے (تھوڑا وقت) عمل کیا اور بہت زیادہ اجر و ثواب حاصل کر لیا ۔“

سیدنا ابوہریرہ رضی اللہ عنہ سے روایت ہے ، نبی کریم صلی اللہ علیہ وسلم نے فرمایا : ”سرداری کے شروع میں ملامت ہوتی ہے ، آخر میں ندامت و پشیمانی اور روز قیامت عذاب ہوتا ہے ۔“

سیدنا انس بن مالک رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ”لوگوں کے لیے سردار ہونا ضروری ہے ، ( لیکن ) سردار ہوتا جہنم میں ہے ۔“