سلسله احاديث صحيحه

سیدنا انس بن مالک رضی اللہ عنہ سے روایت ہے ، وہ بیان کرتے ہیں کہ رسول اللہ صلی اللہ علیہ وسلم ہماری طرف متوجہ ہوئے اور فرمایا : ”اپنی صفوں کو سیدھا کرو اور مل کر کھڑے ہو جاؤ ، میں تم کو اپنے پیچھے سے دیکھتا ہوں ۔ “

سیدنا نعمان بن بشیر رضی اللہ عنہ سے روایت ہے ، وہ کہتے ہیں کہ رسول اللہ صلی اللہ علیہ وسلم لوگوں کی طرف متوجہ ہوئے اور تین دفعہ فرمایا : ”اپنی صفوں کو سیدھا کرو ۔ اللہ کی قسم ! تم لوگ ضرور ضرور اپنی صفوں کو سیدھا کرو ، یا پھر اللہ تعالیٰ تمہارے دلوں میں مخالف ڈال دے گا ۔ “

سیدنا انس رضی اللہ عنہ سے روایت ہے ، وہ کہتے ہیں : جب رسول اللہ صلی اللہ علیہ وسلم نماز کے لیے کھڑے ہوئے تو تکبیر تحریمہ کہنے سے پہلے ہماری طرف متوجہ ہوئے اور فرمایا : ”صفوں کو مکمل کرو (اور ایک روایت میں ہے : سیدھے ہو جاؤ ، سیدھے ہو جاؤ) اور ایک دوسرے کے ساتھ مل کر کھڑے ہوا کرو، میں تمہیں اپنی پیٹھ پیچھے سے ایسے ہی دیکھتا ہوں جیسے سامنے سے دیکھتا ہوں ۔ “

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا : ”نماز میں صفوں کو سیدھا کیا کرو ، بلاشبہ صفوں کو سیدھا کرنا نماز کا حسن ہے ۔ “

سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا : ”بیشک اللہ تعالیٰ اور اس کے فرشتے صفیں ملانے والوں پر رحمت بھیجتے ہیں اور جو (صف) کے خلا کو پر کرتا ہے ، اللہ تعالیٰ اس کا درجہ بلند کر دیتا ہے ۔ “

سیدہ عائشہ رضی اللہ عنہا کہتی ہیں کہ رسول اللہ صلی اللہ علیہ وسلم نے فرمایا : ”جس نے (صف کے ) شگاف کو پر کیا ، اللہ تعالیٰ اس کے لیے جنت میں گھر بنائے گا اور ایک درجہ بلند کر دے گا ۔ “

سیدنا عبداللہ بن عباس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا : ”نماز دوران صفوں میں خلل سے بچو ۔ “ یعنی دور دور کھڑے نہ ہوا کرو ۔

سیدنا ابوشجرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا : ”صفوں کو سیدھا کرو ، تم نے تو فرشتوں کی صفوں کی طرح صفیں بنانی ہیں ، مونڈھوں کو برابر (ایک لائن میں) رکھو ، صف کے شگافوں کو پر کرو اور شیطان کے لیے کوئی خلا نہ چھوڑو ، جس نے صف کو ملایا ، اللہ تعالیٰ اسے (اپنی رحمت کے ساتھ) ملائے گا ۔ “

سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا : ”تم میں سے بہتر لوگ وہ ہیں جو نماز میں (صفوں میں مل کر کھڑے ہونے کے معاملے میں) نرم کندھوں والے ہیں ۔ اس قدم سے زیادہ کسی قدم پر اجر نہیں جو صف کے شگاف کو پر کرنے کے لیے اٹھایا جاتا ہے ۔ “