سلسله احاديث صحيحه

- " اخرجوا فإذا أتيتم أرضكم فاكسروا بيعتكم وانضحوا مكانها بهذا الماء واتخذوها مسجدا. قالوا: إن البلد بعيد والحر شديد والماء ينشف؟ فقال: مدوه من الماء، فإنه لا يزيده إلا طيبا ".

سیدنا طلق بن علی رضی اللہ عنہ سے روایت ہے ، وہ کہتے ہیں : ہم وفد کی صورت میں نبی کریم صلی اللہ علیہ وسلم کے پاس آئے ، ہم نے آپ صلی اللہ علیہ وسلم کی بیعت کی ، آپ صلی اللہ علیہ وسلم کے ساتھ نماز پڑھی اور آپ صلی اللہ علیہ وسلم کو بتایا کہ ہماری زمین میں ہمارا ایک گرجا ہے ، (ہم وہاں مسجد تعمیر کرنا چاہتے ہیں اس لیے ) ہم نے آپ سے آپ کے وضو کا بچا ہوا پانی طلب کیا ۔ آپ صلی اللہ علیہ وسلم نے پانی منگوایا ، وضو کیا ، کلی کی اور اسے ایک برتن میں ڈال دیا اور ہمیں حکم دیتے ہوئے فرمایا : ”چلے جاؤ ، جب اپنے علاقے میں پہنچو تو گرجا گھر گرا دینا ، وہاں یہ پانی چھڑکنا اور وہاں مسجد تعمیر کر لینا ۔ “ انہوں نے کہا: ہمارا علاقہ بہت دور ہے اور شدید گرمی پڑ رہی ، یہ پانی تو خشک ہو جائے گا ؟ آپ صلی اللہ علیہ وسلم نے فرمایا : ”(راستے میں) اس میں مزید پانی ملاتے جانا ، وہ اس کی پاکیزگی میں اور اضافہ کرے گا ۔ “ ہم نکل پڑے ، حتی کہ اپنے علاقے میں پہنچ گئے ، ہم نے گرجا گھر گرا دیا ، وہاں پانی چھڑکا اور اسے مسجد کا روپ دے دیا ، پھر ہم نے وہاں اذان دی ۔ قبیلہ بنوطی کے ایک پادری نے اذان سنی اور کہا: یہ تو دعوت حق ہے ۔ پھر وہ ایک ٹیلے کی طرف نکل گیا اور اس واقعہ کے بعد ہم اسے نہ دیکھ پائے ۔