سلسله احاديث صحيحه

- (إنِّي لكم فرَطٌ على الحوض، فإيّاي! لا يأتينّ أحدكم فيُذَبَّ عنِّي كما يُذبُّ البعير الضال، فأقول: فيم هذا؟ فيقال: إنك لا تدري ما أحدثوا بعدك؟! فأقول: سُحْقاً) .

زوجہ رسول سیدہ ام سلمہ رضی اللہ عنہا سے ان کے غلام عبداللہ بن رافع بیان کرتے ہیں ، وہ کہتی ہیں : میں لوگوں کو حوض کا تذکرہ کرتے ہوئے سنتی رہتی تھی ، نبی کریم صلی اللہ علیہ وسلم سے اس موضوع پر کوئی حدیث براہ راست نہیں سنی تھی ، ایک دن میری لونڈی میری گنگھی کر رہی تھی ، میں نے رسول اللہ صلی اللہ علیہ وسلم کو یہ فرماتے سنا : ”لوگو !“ ، میں نے لونڈی سے کہا: پیچھے ہٹ جاؤ ۔ اس نے کہا: آپ صلی اللہ علیہ وسلم نے مردوں کو بلایا ہے نہ کہ عورتوں کو ۔ میں نے کہا: ( آپ صلی اللہ علیہ وسلم نے لوگوں کو بلایا ہے اور ) میں بھی ان میں سے ہوں ۔ رسول اللہ صلی اللہ علیہ وسلم نے فرمایا : ”میں حوض پر تم لوگوں کا پیش رو ہوں گا ۔ میری اطاعت کرتے رہنا ! کہیں ایسا نہ ہو کہ تم وہاں میرے پاس پہنچو اور تمہیں بھٹکے ہوئے اونٹ کی طرح ( مجھ سے دور ) دھتکار دیا جائے ۔ میں پوچھوں : ایسے کیوں ہو رہا ہے ؟ مجھے جواباً کہا: جائے : آپ نہیں جانتے کہ ان لوگوں نے آپ کے بعد کون کون سی بدعات رائج کر دی تھیں ۔ (یہ سن کر ) میں کہوں گا : بربادی ہو ۔“