صحیح ابن حبان

صالح بن ابوطریف بیان کرتے ہیں: میں نے سیدنا ابوسعید خدری رضی اللہ عنہ سے دریافت کیا: کیا آپ نے نبی اکرم صلی اللہ علیہ وسلم کو اس آیت کے بارے میں کچھ ارشاد فرماتے ہوئے سنا ہے؟ ” عنقریب وہ لوگ جنہوں نے کفر کیا وہ یہ آرزو کریں گے کہ کاش وہ مسلمان ہوتے۔ “
سیدنا ابوسعید خدری رضی اللہ عنہ نے بتایا: جی ہاں میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” اللہ تعالیٰ مومنین میں سے کچھ لوگوں کو جہنم سے نکالے گا یہ اس کے بعد ہو گا کہ جب وہ انہیں سزا دے چکا ہو گا۔ “ نبی اکرم صلی اللہ علیہ وسلم فرماتے ہیں: جب اللہ تعالیٰ نے ان لوگوں کو مشرکین کے ہمراہ جہنم میں داخل کیا ہو گا تو مشرکین یہ کہیں گے کیا تم دنیا میں یہ نہیں کہتے تھے کہ تم دوست ہو، تو پھر تم جہنم میں ہمارے ساتھ کیوں ہو؟ جب اللہ تعالیٰ یہ بات سنے گا، تو وہ شفاعت کرنے کی اجازت دے گا، تو فرشتے اور انبیاء ان لوگوں کی شفاعت کریں گے یہاں تک کہ وہ لوگ اللہ کے حکم کے تحت (جہنم سے) باہر آ جائیں گے۔ جب انہیں نکال دیا جائے گا تو وہ لوگ کہیں گے اے کاش ہم بھی ان کی مانند ہوتے اور ہمیں بھی شفاعت نصیب ہو جاتی اور ہم بھی جہنم سے نکل جاتے، تو اللہ تعالیٰ کے اس فرمان سے یہی مراد ہے۔ ” کفر کرنے والے لوگ عنقریب یہ آرزو کریں گے کہ کاش وہ مسلمان ہوتے۔ “
نبی اکرم صلی اللہ علیہ وسلم فرماتے ہیں: ان لوگوں کا جنت میں نام ” جہنمی “ رکھا جائے گا کیونکہ ان کے چہرے سیاہ ہو چکے ہوں گے۔ وہ عرض کریں گے اے ہمارے پروردگار ہم سے اس نام کو دور کر دے۔ نبی اکرم صلی اللہ علیہ وسلم فرماتے ہیں: تو پروردگار انہیں حکم دے گا وہ جنت کی نہر میں غسل کریں گے، تو ان کی یہ (سیاہی) ختم ہو جائے گی۔